Yaburi 144 - ALLALA KUMƐ

Baraka-Bira-Koe Alla ye Mansɛ Bolo

¹ Ma ni Mari tanto, nna kisilɛ, kɔni. A ye n karanna kɛlɛ ma ka n tabɛn kɛlɛ-kɛ-koe la.

² N keninte le ale la min si n kumafunfan. N kandannɛ anubɛ nna kisilɛ le ale la. Nna nɛgɛ-lufɛ le ale la min si n kandan kɛlɛ rɔ. A ye sibolo-gbɛrɛnu nɔla n ye ka n ma mansɛ la wonu kuma.

³ E, Mari, nfenna hadama-dan wara-koe gbili ile ma? Nfenna i gbu ye i mirila hadama-dan wara-koe ma?

⁴ Hadama-dan-niyi mani de iko ni-lafɛ kelan i yala. A si tunu yen, iko ninɛ.

⁵ E, Mari, i ni san-kole fara ka yigi n dafɛ yan, ado i kɔɛn wa tugu kɔnkɛ min na, wo si a sisi labɔ.

⁶ I ni san-gbalamɛ layigi n yogenu ma ka anu tanyɛnsɛn. I ni ila kalabɛnnu nakɛ anu ma alako anu ni anu buri.

^7-8 I ni i kɔɛn layigi ka n bɔ dumɛ rɔ. N kana faga sibolo-gbɛrɛnu bolo tɔ, ado anu ti tonyɛ fɔ. Hali gboroli-kɛ-tinɛ, anu si foninyɛ fɔ.

⁹ E, Alla, n si bɛti-kurɛ bɔ i ye. N si bɔlɔn fɔ ka sigi sa i ye.

¹⁰ I ye nɔlɛ dila mansɛnu ma ka nde, ila wɔli-kɛlɛ Dawuda latanka.

¹¹ N natanka n yogenu ma minnu karagbɛlɛ. N kana faga sibolo-gbɛrɛkɛnu bolo tɔ, ado anu ti tonyɛ fɔ. Hali gboroli-kɛ-tinɛ, anu si foninyɛ fɔ.

¹² Mala dannu tenbi fonikeyɛ rɔ, i ni a ma, anu ta ni gbɛlɛya iko kɔlɔma. Mala dunmusinu ni kinya iko sɛnbɛrɛn-kɔn minnu bi mansɛla bolɔn rabirala.

¹³ Alamɛ mala bondɔnnu nafara fui-fen-su bɛɛ la. Alamɛ mala sagɛnu yirita bui, ka dannu sɔrɔn waga-wagayɛ ma.

¹⁴ Alamɛ mala ninkinu tora dannu sɔrɔnna. Anu bu kana tinya ha anu ni tunu yen! Alamɛ yerelen-tɛgɛ-kan kana taran mala soenu tɔ.

¹⁵ Mɔgɔ-sewanɛ le wo mɔgɛ la, min bi duwa-sufa kɛ sɔrɔnna. Mɔgɔ-sewanɛ le wo mɔgɛ la minna Alla bɛnnɛ Mari ma.