Yaburi 140 - ALLALA KUMƐ

N Natanka-Ko Madiyalɛ

¹ E, Mari, n nakisi wunduyogenu masibɛ ma. N nakanan karagbɛlɛnu ma.

² Anu bi karagbɛlɛya-ko-yanfɛ kirila ka kɛlɛ tɛgɛ mɔgɛnu tɛma.

³ Anu dɛ-marɛ ye a la iko duguma-fantɛ. Anu kuman-kan mani de iko birɛ wa a duri pusen.

⁴ E, Mari, n nakisi karagbɛlɛnu sɛnbɛ ma. Minnu bi n nabui-koe rɔ, wonu kana na n nɔ.

⁵ Wasintenu bara gbɛrɛ lasigi n ye. Anu bara sogo-bira-yalɛ rafulen n yarɔ. Kan-birɛ lasiginɛ n ye anu bolo.

⁶ N kɛnɛna a fɔla ile Mari ye ko nta Alla le ile la. I wɔlɔ matɔlɔ n worondo-kan la.

⁷ N tigi Mari, n kumafunfanna-wɛ le ile la. I wara n kunyɛ bɔ kɛlɛ rɔ.

⁸ Mari, karagbɛlɛnu bi min nyinina, i kana wo di anu ma. I ni a ma, anuna yanfɛ ni to anu tɔ tode!

⁹ I kana sɔn, n yogenu ni nɔ-ko sɔrɔn n ma. Anu bi n tagbɛran min kɛla, a ma, wo ni sɛgi anu denu kɔgɔ rɔ.

¹⁰ Alamɛ ta-wɔlɔn rawuyara anu ma. I ni a ma, anu na ni fili denka-rayan-bɛ rɔ, anu ti ke bɔla min tɔ.

¹¹ Minnu bi ma tɔgɛ malibi-libila, alamɛ wonu wara-koe diginta bore la map! Minnu bi wunduyogoyɛ mala, alamɛ karagbɛlɛyɛ ya wo manɛgɛn ka wo lato dogbe!

¹² Mari, n ya a lɔn de serr, i si bolo-kolɔnnu fɛka le. I si a ma, makolamɛnu ni anu yoe sɔrɔn.

¹³ Telenbagɛnu si i matɔgɔ ka baraka bira i ye. A sɔgɛ si anu bira ka to i yakɔrɔ tolon!