Yaburi 136 - ALLALA KUMƐ

Baraka-Bira-Bɛti

¹ Wo ni baraka bira Mari ye bawo a nyimayanɛ. Ala keninteyɛ dan sa.

² Ale Alla min tenbira bɛsɛ bɛɛ la, ma ni baraka bira wo ye. Ala keninteyɛ dan sa.

³ Ale Mari min kolo mari bɛɛ ko, ma ni to a fɔla wo ye ko, “Nba.” Ala keninteyɛ dan sa.

⁴ Ale le kelen pe si ke kabana-koenu nadanna. Ala keninteyɛ dan sa.

⁵ A ya san-kole ladan ata hɛnkilimayɛ le la. Ala keninteyɛ dan sa.

⁶ A ya dugu-kole rafulen kɔgɔ-yi kuma. Ala keninteyɛ dan sa.

⁷ A ya tele anubɛ karɛ dan. Ala keninteyɛ dan sa.

⁸ Tele si mansayɛ kɛ tele rɔ. Ala keninteyɛ dan sa.

⁹ Karɛ anubɛ lolenu si mansayɛ kɛ suyi rɔ. Ala keninteyɛ dan sa.

¹⁰ A ya Iyipiti kɛnuna sarɛ bɛɛ faga. Ala keninteyɛ dan sa.

¹¹ A ya ata Isirɛla mɔgɛnu nabɔ Iyipiti nyamanɛ rɔ. Ala keninteyɛ dan sa.

¹² A ya wo ma a kɔɛn-tagbɛlɛmɛ le la. Ala keninteyɛ dan sa.

¹³ A ya Kɔgɔ-Yi-Wulan fara fila la. Ala keninteyɛ dan sa.

¹⁴ A ya ala mɔgɛnu natenbi nyɔ. Ala keninteyɛ dan sa.

¹⁵ A ya Iyipiti mansɛ anubɛ ala kɛlɛ-dannu nato yi rɔ. Ala keninteyɛ dan sa.

¹⁶ A sɔra mɔgɛ kɛnu yarɔ ka ta wulɛ rɔ. Ala keninteyɛ dan sa.

¹⁷ A ya mansa-makawanɛnu faga anu ye. Ala keninteyɛ dan sa.

¹⁸ A ya mansa-tɔgɔlamɛnu faga anu ye. Ala keninteyɛ dan sa.

¹⁹ A ya Amora mansa Saihɔn faga. Ala keninteyɛ dan sa.

²⁰ A ya Basan mansa Ɔki faga. Ala keninteyɛ dan sa.

²¹ A ya wonuna nyamanɛnu natenbi ala mɔgɛnu ma. Ala keninteyɛ dan sa.

²² A ya nyamanɛ wonu di ata wɔli-kɛla Isirɛla mɔgɛnu ma. Ala keninteyɛ dan sa.

²³ Ma ye tɔrɔyɛ rɔ wati min, a ya a fonde to ma ko. Ala keninteyɛ dan sa.

²⁴ A ya ma kunyɛ bɔ gbaran rɔ ma yogenu bolo. Ala keninteyɛ dan sa.

²⁵ A ye dɛ min bɛɛ tɛgɛla, a ti wo fenfen takolɔn to, a dali-fan bɛɛ! Ala keninteyɛ dan sa.

²⁶ Ma ni baraka bira Alla ye, Arinyɛnɛ Mansɛ, kɔni. Ala keninteyɛ dan sa.