Yaburi 135 - ALLALA KUMƐ

Tantoli-Bɛti

¹ Ma ni Mari tanto. Wole Marita wɔli-kɛlɛnu, wo ni Mari matɔgɔ.

² Wole minnu bi wɔlila Mari Bato-Bɔn la, wo ni Alla matɔgɔ.

³ Wo ni Mari tanto ata nyimayɛla ko la. Wo ni bɛti bɔ a ye bawo a si ko-nyimɛ kɛ wo ye.

⁴ Ale le ya Yakoba yabɔ a nyɛrɛ ye. A halalɛ le Isirɛla mɔgɛnu na.

⁵ N ya a lɔn ko Mari makawara. A kolo bɛsɛ bɛɛ ko.

⁶ San-kole kuma wo, dugu-kole kuma wo, kɔgɔ-yi rɔ wo, kɔgɔ-yi-dumɛ rɔ wo, min ba diya ale ye, a ye wo le mala.

⁷ A si banda-finyɛ lana ka bɔ dugu-dan la. A ye san-sɛran anubɛ bandɛ lanala. A si fɔn-barɛ dɛ laka duninya kuma.

⁸ A ya den fɔlɔtɛ bɛɛ faga Iyipiti nyamanɛ rɔ, a mɔgɔni-gbu wo, a sogo wo, a keimɛnu, kɔni.

⁹ A ya kabana-ko-siyaman ma Iyipiti nyamanɛ rɔ. A ya tɛ ragbɔngbɔn Iyipiti mansɛ anubɛ ala nyamanita-mɔgɛnu ma.

^10-11 A ya mansa-makibirinɛ wonu faga, Amora mansa Saihɔn wo, Basan mansa Ɔki wo, anubɛ Kenan mansɛ bɛɛ ka sibolo-siyaman kasara.

¹² A ya anuna nyamanɛ toronde anu na ka a di ata Isirɛla mɔgɛnu ma.

¹³ Mari, i mankan si to fɔla. I wara-koe la ti nyina ma kegeyɛnu na muk!

¹⁴ I si ila mɔgɛnu kumafunfan ka kinikini ila wɔli-kɛlɛnu ma.

¹⁵ Sibole doinuta bɛsɛnu nadannɛ sɛnɛ anubɛ wodi-gbɛnu na. Wonu nadanta hadama-den-bole le la.

¹⁶ Dɛ ye anu bolo kɔnɔ anu ti kuma. Anu yɛ makanɛ kɔnɔ anu ti fen yen.

¹⁷ Tole ye anu bolo kɔnɔ anu ti ko lamɔɛn. Anu ti ke anu niyi lafɛla.

¹⁸ Minnu bi bɛsɛ kɛnu nadanna anubɛ minnu lanɛ anu na, alamɛ wonu mara iko anuna bɛsi-ladannɛ wonu.

¹⁹ Wole Isirɛla mɔgɛnu, wo ni Mari matɔgɔ. Wole Allata saraka-masɔlɛnu, woni Mari tanto.

²⁰ Wole Lifayi bɔnsɔnnu, wo ni Mari tanto. Wole min bɛɛ ye a batola, wo ni a matɔgɔ.

²¹ Wole Yerusalɛm kɛnu, wo ni Mari matɔgɔ a warɛ nyɔ. Bɛɛ ni Mari tanto!