Yaburi 129 - ALLALA KUMƐ

Isirɛla Yogenu Nɔ-Ko-Madiyalɛ

¹ Wole Isirɛla mɔgɛnu, wo ni kumɛ kɛ labira ka a fɔ n kɔma, “Kebi n dennɛ, n yogenu bi n niyi ragbɛrɛnna n ma.

² “Ka a bi nna denniya-tumɛ ma, n yogenu bi n bira boloko-yogomɛ-kɛla tolon! Kɔnɔ hali wo, anu ma n nɔ feu!

³ Anu ya n kɔmɛ rafarafara bosɛ la. N kɔmɛ mara iko sara-ninki dugu-sin-gbɛ.

⁴ Kɔnɔ Mari min telennɛ, wo ara n bɔ yɔɔnyɛ rɔ.”

⁵ Yerusalɛm-gboyana-mɔgɛnu, alamɛ ma ya nɔ-ko sɔrɔn wonu ma ka anu gben sɛgila.

⁶ Alamɛ anu mara iko binyɛ min bi fɛrɛnna fara-gbaran ma. Yanni a ni koloya, a ma ara fɔsɔ.

⁷ Hali ka a ladɛn ka kɛ a tɛgɛ la, wo ti ma. Mɔgɔ ti ke a lakirinɛ dunina.

⁸ Mɔgɔ-wo-mɔgɔ tenbira anu dafɛ, wo fenfen ti a fɔ ko, “Marita duwɛ ni yigi wo kuma. Mari ni to wo fɛ.”