Yaburi 119 - ALLALA KUMƐ

Marita Tɔn Wara-Koe

¹ Duwa-dan le wo tigi la min telennɛ, fɛɛ sa a wara-koe la, ado a ye Marila tɔnnu natɔnbagayala.

² Duwa-dan le wo tigi la min bi bilala Marita sereyanu fɛ anubɛ min bi ale nyinina a yisi bɛɛ la.

³ Anu ti ko-yogoma ma. Anu bi tagamana Marita kilɛ le fɛ.

⁴ Mari, i nyɛrɛ le ya ila tɔnnu di ma ma, ado i ya a fɔ ma ye le ko ma ni anu bira lanayɛ la gben!

⁵ N bara a latɛgɛ n yisi rɔ ko fɔ n ba ila labilalɛ bɛɛsi bira lanayɛ rɔ!

⁶ Ni n hɛnkili tora ila tɔnnu ko, n ti yarabi.

⁷ I ye kiti tɛgɛla telenbagayɛ la nya min, n tenbi wo nya-yen-koe rɔ, n si i matɔgɔ n yisi-gbɛnɛ la, yɔ!

⁸ N si ila tɔnnu bira! I yandi, i kana n boloka mumɛ!

Marita Tɔn-Bira-Koe

⁹ Kemini-mɛsɛ si ke a nyɛrɛ lasɔlɔla kama? Fɔ ile Marita tɔn-birɛ fɛ!

¹⁰ N si ita tɔnnu bira n yisi bɛɛ la. N masɛgi ita tɔn-birabɛlitayɛ la.

¹¹ N ya ita kumɛ lamara n yisi rɔ alako n kana hakɛ kɛ i la.

¹² E, Mari, n si i matɔgɔ! N nabila i kɛ-nyanu na.

¹³ I ya tɔn minnu di ma ma, n si n kuli mayɛlɛ wonu karan tinɛ.

¹⁴ Ka ita tɔnnu bira, wo di n ye nɔnfulu-wa-sɔrɔn ko.

¹⁵ N si to n mirila ila tɔnnu ma n kunyɛ rɔ ka ila karan lakɔrɔsi.

¹⁶ Ila tɔnnu ya n nanyagalen. N yili ti bɔ ita sereyanu ko muk!

Sewa-Koe Marita Tɔn Rɔ

¹⁷ Ila wɔli-kɛlɛ le nde la. Kinikini n ma. Wo le si a ma, n ni to n niyi la ka ila kumɛ bira.

¹⁸ N yɛ maka woletɔ n si tonya-kuma-wɛ yen ita sereyanu tɔ.

¹⁹ Sundan le nde la dugu-kole kɛ kuma. I yandi, i kana ila tɔnnu dogon n ma.

²⁰ Ita sereyanu lɔn-sɔgɛ ye n na tuma-wo-tuma, ado wo sɔgɛ ye n na kosɛbɛ!

²¹ I ye wasintenu makumala tolon! Minnu bi ita sereyanu masangbala, wonu bi dankɛ kɔrɔ.

²² Mɔgɔ kana n mayɛlɛn ka n tasɛ bawo n bara ita tɔnnu bira.

²³ Kun-tiginu ya anu nadɛn ka yanfɛ don n ma kɔnɔ n si to ita karan lakɔrɔsila.

²⁴ Ila labilɛ ya a ma, n sewara. N makawandilɛ le ila sereyanu na.

Marita Tɔn-Bira-Ko-Sɔgɛ

²⁵ N bi n masɔrɔkɔnna gbangban rɔ nɔlɛ bolo. I yandi, n niyi lasɛgi n ma tun iko i wara n yili-madiya nya min nun.

²⁶ N ban n nyɛrɛ fɛɛ-koe-bɛɛ rakaranna, i ya n denkun nna madiyalɛ rɔ. N karan i wara-koe ma.

²⁷ A sɔgɛ ye i la, n ni min ma, n dɛnbɛ alako n ni wo lɔn. Wo kɔma, i wara ita kabana-koe minnu kɛ n ye, n si n miri wonu ma.

²⁸ Yisi-tinya ara tenbi n tɔ. Sɛnbɛ di n ma iko i ya n yili-madiya nya min.

²⁹ N masɛgi ko-yogoma-kɛ la feu! N karan ita tɔnnu na i kɛ-nya-nyimɛla ko la.

³⁰ N bara a latɛgɛ feu, ko fɔ n ba ila sereyanu bira. N sɔndɔmɛ sɔnɛ ila sereyanu denu na sokesoke!

³¹ Mari, ita kumɛnu bolokani ma n bolo mumɛ! I yandi, n kana miliyɛ sɔrɔn.

³² I wara n hɛnkili ya maka min kɛ, ita sereyanu bira-sɔgɛ ye n yisi la dɔgɔma-ma-de!

Ko Nya-Yen-Koe Madiyalɛ

³³ Mari, ita tɔnnu kɔrɔ-bɛrɛbɛrɛnu yira n na alako n ni to anu birala burubukai!

³⁴ Ita sereyanu-kɔrɔ-bɛrɛbɛrɛ rakaran n ye. N ti a kelen bɛrɛn boloka. N si a bɛɛ lamara n yisi rɔ.

³⁵ A ma, n ni ila sereyanu bira bawo n ti sewɛ yen kan-bo-kan fɔ nyɔ rɔ.

³⁶ Ita tɔnnu-bira-sɔgɛ ladon n yisi rɔ. Wo fisa n ye nɔnfulu-wa-sɔrɔn ko.

³⁷ N miriya bɔ ko-fuyinu ko. Nyimaya n ma iko i wara n yili-madiya nya min.

³⁸ Ila lanyiri latɔnbagaya nde, ila wɔli-kɛlɛ ye. I ya ila sereya-biralɛnu yili-madiya min na, wo le kɛ la.

³⁹ N tasɛlɛ minnu bi n takilanna, n nakanan wonu masibɛ ma. Nba, ila sereyanu kin.

⁴⁰ Ila tɔnnu-bira-sɔgɛ ye n na gben gben! Ni-kurɛ keni n ye bawo telenbagɛ le i la.

La-Koe Marita Tɔnnu Na

⁴¹ Mari, n di i ye nya min, wo yira n na. N nakanan iko i wara n yili-madiya nya min.

⁴² Woletɔ minnu bi n tasɛla, n si ke wonuna kumɛ-dɛ ratiila bawo n lara ita kumɛ la.

⁴³ N dɛnbɛ, n ni to tonyɛ fɔla wati bɛɛ rɔ bawo n yigi sanɛ ita tɔnnu kuma.

⁴⁴ N si to ita tɔnnu birala dɛɛ! N si wo ma burubukai!

⁴⁵ N si to lafɛrɛ rɔ wo rɔ bawo n bara ita karan bira.

⁴⁶ N si ita tɔnnu wara-koe fɔ mansɛnu ye, ado n ti miliya mumɛ!

⁴⁷ Ita tɔnnu-birɛ si a diya don n tɔ bawo anu di n ye.

⁴⁸ Ila sereyanu gbili n ma, ado anu di n ye. Ila labilɛ wara-koe ti bɔ n kunyɛ rɔ.

Yigi Sa-Koe Marita Tɔnnu Tɔ

⁴⁹ I miri, i wara nde, ita wɔli-kɛlɛ yili-madiya min kɛ. Yili-madiyɛ wo le ya a ma, n yigi sara i kuma.

⁵⁰ Hali n bi nanparan-belebele le tɔ, ita yili-madiyɛ wo si a ma, n ni sewa bawo wo le ya niyi keni n ye.

⁵¹ Wasintenu bi n mayɛlɛnna wati bɛɛ kɔnɔ wo ma n bɔ ita tɔnnu kɔrɔ.

⁵² Ila sereya minnu bi nyɔ kebi kɔrɔma la, n hɛnkili tora bilala wonu ko. Mari, wonu ya n kɔntɔ-diya le.

⁵³ N ba karagbɛlɛnu yen ila tɔnnu tinyana. Wo si ma n bolo yisi-bɔɛ la.

⁵⁴ N sigira kan-bo-kan n si bɛti-kurɛnu bɔ ila tɔnnu bara-koe rɔ.

⁵⁵ Mari, n yili si to i ko suyi rɔ ka to n mirila ila tɔnnu ma.

⁵⁶ N si sewɛ sɔrɔn ile bolo bawo n bi ita sereya-birɛ le tɔ.

N Nyɛrɛ Di-Koe Marita Tɔnnu Ma

⁵⁷ E, Mari, n bi nyinina i kelen pe le ma. N bara i yili-madiya ila tɔnnu-bira-koe rɔ.

⁵⁸ N bara i manyinika n yisi bɛɛ la ko i ni kinikini n ma iko i wara lanyiri kiri n ye nya min.

⁵⁹ N bara n sɔnnu nakɔrɔsi n bi nya min. N ya a latɛgɛ n yisi rɔ ko, “Fɔ n ba ita labilalɛnu bira.”

⁶⁰ N gbaranta n nyɛrɛ la, n ko, “Fɔ n ba ila tɔnnu bira le serr!”

⁶¹ Karagbɛlɛnu bara yili lasigi n ye kɔnɔ n ma nyina ita tɔnnu ko.

⁶² N bi n nasɔla su-talɛ ma ka i matɔgɔ bawo i ye kiti sala a kila-bɛrɛbɛrɛ fɛ.

⁶³ Min bɛɛ ye wɔlila ile Mari ye, anu diyana-mɔgɛ le nde la anubɛ minnu bi i sako kɛla ka ita tɔnnu bira.

⁶⁴ Mari, duninya fanɛ ita hinɛ la. N karan ita tɔnnu ma.

Marita Tɔn-Birɛ Tɔnɛ Wara-Koe

⁶⁵ Mari, i ya ila lanyiri latɔnbagaya. I nyimayanɛ nde, ila wɔli-kɛlɛ ma.

⁶⁶ N karan hɛnkili anubɛ ko-kɔrɔ-lɔn la bawo n lara ita tɔnnu na.

⁶⁷ N sa kila-nyima fɛ nun, woletɔ i ya n tɔrɔ kɔnɔ n bi ita sereyanu birala kaka.

⁶⁸ Ila nyimayɛ da-rakolo min kɛ, n karan ita sereyanu ma.

⁶⁹ Mɔgɔ-wasinɛnu bi n dan tinyana ka n kumakiri foninyɛ la kɔnɔ n bi ita karan birala n yisi bɛɛ la.

⁷⁰ Wunduyogoyɛ ye tugula mɔgɛ kɛnu yisi rɔ kɔnɔ ila tɔnnu ya nde hɛnɛ.

⁷¹ Nna tɔrɔyɛ bɛnta n ma bawo wo le ya a ma, n ya ita sereyanu lɔn.

⁷² I ya tɔn minnu di n ma, wo fisa n ye sɛnɛ anubɛ wodi-wa-yirika ko.

Telenbagayɛ Marita Tɔn Rɔ

⁷³ Ile le ya n dan i bole la. I ni ila sereyanu-kɔrɔ-lɔn-hɛnkili di n ma woletɔ n si ita tɔnnu karan.

⁷⁴ Minnu bi i gbiliyala, wonu ba n yen, anu si sewa bawo n lanɛ ita yili-madiyɛ la.

⁷⁵ Mari, n ya a lɔn yati, ko ita kiti-tɛgɛ-nya telennɛ le sekeke! Ni i ye n tɔrɔla kɛ nya, n ya a lɔn ko lanaya-tigi le ile la.

⁷⁶ Alamɛ ila keninteya-dannatɛgɛbɛlɛ ya n niyi radiya iko i wara nde, ita wɔli-kɛlɛ yili-madiya nya min.

⁷⁷ Kinikini n ma alako n ni to n niyi la bawo ila tɔnnu ya n niyi radiya.

⁷⁸ Alamɛ wasintenu miliyara bawo anu bi tɔgɛ sala n na kɔnɔ nde yili ti bɔ ita karan ko.

⁷⁹ Min bɛɛ ya ita tɔnnu lɔn ka i gbiliya, alamɛ wonu ya anu gbɛrɛn n ma.

⁸⁰ Alamɛ n ya ila tɔnnu bira n bolo filɛ le la gben woletɔ n ti miliya n yogenu yakɔrɔ.

Kisi-Ko-Madiyalɛ

⁸¹ Mari, n tafaganɛ ye i makɔnɔna n nakanan-koe rɔ kɔnɔ hali wo, n lara ita kumɛ la.

⁸² N yɛ ara mɛ gbalani kilɛ la, ado a ma ara bira ita lanyirila ko la woletɔ n ya i manyinika ko, “I si n dɛnbɛ muntuma?”

⁸³ Fenfen ma nde la. N mani de iko gbolo-bɔrɔ-kɔrɛ. Hali wo, n ma nyina ila tɔnnu ko.

⁸⁴ N ni i makɔnɔ ha tumɛ nyamintan? I si n yakɔrɔ-mamɔlɛnu tɔrɔ muntuma?

⁸⁵ Wasinte minnu bannɛ ila tɔnnu-bira-koe ma, wonu denu bara denka-filon-bɛnu sin n ye alako anu ni n bira.

⁸⁶ Ila tɔn fenfen ti n baya. N dɛnbɛ! N yogenu bara karamɛ layɛlɛ n ma.

⁸⁷ A ara to sɛ, anu ni n faga kɔnɔ n ma ita tɔnnu boloka.

⁸⁸ Ka a tɛgɛ ila keninteya-dannatɛgɛbɛlɛ ma, nyimaya n ma woletɔ n si ita tɔnnu bira.

La-Koe Marita Tɔn Ma

⁸⁹ Mari, ita kumɛ si to a gbɛ rɔ burubukai, ado a si to a gbɛ rɔ Arinyɛni tɔ fanan tolon!

⁹⁰ Ita lanayɛ ye a gbɛ rɔ tolon! I ya dugu-kole kɛ fanan sigi a gbɛ rɔ, bi ma, ado a tonɛ a gbɛ wo le tɔ.

⁹¹ Ha bi, fan bɛɛ ye a gbɛ rɔ iko i ya a fɔ nya min bawo ila wɔli-kɛlɛ le anu na.

⁹² Ni ita tɔnnu ma n niyi radiya n ma nun, n kunyɛ ye tola nna tɔrɔyɛ le tɔ nun.

⁹³ Ila karan minnu ya n to n niyi la, n ti nyina wonu ko mumɛ!

⁹⁴ I halalɛ le nde la. N nakisi! N bara n taya ila tɔnnu lɔn-koe rɔ.

⁹⁵ Karagbɛlɛnu bi n napɛrɛnna n faga-koe la kɔnɔ n hɛnkili ti bɔ ita tɔnnu ko.

⁹⁶ N ya a yen ko fenfen sa min nasɔlɔnɛ kɔnɔ fɛɛ-wo-fɛɛ sa ita sereyanu na.

Marita Tɔn-Keni-Koe

⁹⁷ Ila tɔnnu di n ye kosɛbɛ! Telen-gbɛn, n bi n mirila anu ma.

⁹⁸ Ita tɔnnu bi n bolo le tele-wo-tele. Wonu si n hɛnkili dɛ laka ka tenbi n yogenu na.

⁹⁹ N hɛnkili da-rakolo n karan-mɔgɛ bɛɛtɛ ko bawo ila karan ma bɔ n kunyɛ rɔ.

¹⁰⁰ Nta lɔnnɛ da ra ara koloya kɛmɔgɛnutɛ ko bawo n hɛnkili banbannɛ ita tɔnnu ma.

¹⁰¹ N ya n masɛgi ko-yogoma-kɛ bɛɛ la bawo a sɔgɛ ye n na, n ni ita kumɛnu bira.

¹⁰² Ila karan-sɔgɛ la ma bɔ n na bawo n karan-mɔgɔ-bɛrɛbɛrɛ le ile la.

¹⁰³ Ila karan di n ye kosɛbɛ! A di n ye ka tenbi liyi la.

¹⁰⁴ Ita karan ya a ma, n ya ko lɔn. Ko-yogomɛ bɛɛ gbo n ye tɛrr!

Marita Tɔn Wan-Takɛ Wara-Koe

¹⁰⁵ Ila kumɛ ye waan rakala n ye iko lɛnpu min biranɛ n yarɔ-kilɛ la. A ye waan rakala n kin kɔrɔ.

¹⁰⁶ N ya n dakan don ila tɔn min bira-koe rɔ, n si n kan wo latɔnbagaya gben-gben!

¹⁰⁷ Mari, n tɔrɔ-nya kɛ ma kin. N niyi lasɛgi n ma iko i wara n yili-madiya nya min.

¹⁰⁸ E, Mari, i yandi, sɔn nna baraka-bira-madiyalɛ la. I ni n karan ita tɔnnu ma.

¹⁰⁹ N mabɛnnɛ n ni-fili-koe la kɔnɔ hali wo, n ti nyina ita sereyanu ko.

¹¹⁰ Karagbɛlɛnu bi yili lasigila n ye kɔnɔ n ma ita tɔnnu tinya.

¹¹¹ N halalɛ le ila tɔnnu na tolon! N ni-radiya-fan le anu denu na.

¹¹² N bara ban a latɛgɛla, n ko, “Fenfen ti n bɔ ila tɔnnu kɔrɔ fɔ saya.”

Latanka-Koe Marita Tɔn Rɔ

¹¹³ Lanayabɛlɛnu gbo n ye kɔnɔ ita tɔnnu keninɛ n bolo.

¹¹⁴ Nna kandannɛ anubɛ n kumafunfannɛ le ile la. N yigi sanɛ ita yili-madiyɛ rɔ.

¹¹⁵ Wole ko-yogoma-kɛlɛnu, wo ni wo masɛgi n na. Ndeta Alla ye min fɔla n ye, n bi wo le birala.

¹¹⁶ N sɛnbɛ don iko i wara lanyiri kiri n ye nya min woletɔ n si to n niyi la. Yigi min bi n bolo kɛ la, a ma, n kana baya wo rɔ mumɛ!

¹¹⁷ N bira. Wo si a ma, n ni kisi. Wo si a ma, n yili ni to ila sereyanu ko habadan!

¹¹⁸ Ile ara i ban wonu na minnu bi ila sereyanu tinyana. Yanfante-kɔrɛ kɛnu bi yanfɛ min tabɛnna, fufafuyi le wonu na.

¹¹⁹ I si karagbɛlɛnu bira boloko-yogomɛ-kɛ iko nyama-nyama, woletɔ ila karan di n ye.

¹²⁰ N fɛrɛ ye a burila n ma bawo n bi kilanna i la. N kumakɔnɛ kilan bolo ka a tɛgɛ ila kitila ko ma.

Marita Tɔn-Bira-Koe

¹²¹ N ya ko-latelennɛ anubɛ ko-nyimɛ le ma. I kana n boloka ka n don n yogenu bolo tɔ.

¹²² N yili-madiya ko i si nde, ita wɔli-kɛlɛ dɛnbɛ. I kana sɔn wasintenu ni a lakunaya n kuma.

¹²³ N yɛ ara mɛ kilɛ la, ado n yɛ ma ara bira kisi-koe makɔnɔna iko i ya n yili-madiya nya min.

¹²⁴ To n fɛ iko ila keninteya-dannatɛgɛbɛlɛ ye nya min. N karan ita sereyanu na.

¹²⁵ Ita wɔli-kɛlɛ le nde la. Ko-kɔrɔ-lɔn di n ma woletɔ n si ita karan nya-yen.

¹²⁶ Mari, ita sɛnbɛ-mayira-tumɛ le bawo mɔgɛnu bi ita tɔnnu tinyana.

¹²⁷ Ita tɔnnu di n ye kosɛbɛ! A di n ye sɛnɛ-bɛrɛ ko.

¹²⁸ Ita sereya bɛɛ biranɛ n bolo. Ko-korɔn bɛɛ gbo n ye.

Marita Tɔn-Bira-Ko-Sɔgɛ

¹²⁹ Ita karan kin dɔgɔma-ma-de! Woletɔ anu bɛɛ biranɛ n yisi rɔ.

¹³⁰ Ita kumɛnu sanɛ gbɛ le ma n ye. Wo le wara waan raka n ma. A si hɛnkilimayɛ di ko nya-yenbɛlɛ ma.

¹³¹ Ila tɔnnu-sɔgɛ ya n bira kosɛbɛ, fɔ n tora n niyi lafɛla iko wuli.

¹³² I tintan n na. I ni kinikini n ma iko i ya a ma i diyana-mɔgɛnu ye nya min.

¹³³ I kana sɔn, n ni bui iko i wara n yili-madiya nya min. I kana sɔn, hakɛ ni don n kun na.

¹³⁴ N nakanan n tagbɛrɛnnɛnu ma woletɔ n si ita tɔnnu bira gben!

¹³⁵ I ni nyimayɛ kɛ nde, ita wɔli-kɛlɛ ye. I ni n karan ita sereyanu na fanan.

¹³⁶ N ya-yi ye yigila iko bɛ bawo mɔgɛnu sa sɔnna ita tɔnnu bira-koe ma.

Marita Tɔn-Telennɛnu

¹³⁷ Mari, telenbagɛ le ile la, ado ila tɔn bɛɛ latelennɛ.

¹³⁸ Lafisayali sa ila sereyanu tɔ, ado a bɛɛ latelennɛ.

¹³⁹ N yisi ye kerunna n burɔ bawo n yogenuna ko sa ila tɔn kɛnu wara-koe rɔ.

¹⁴⁰ Sika-wo-sika sa ita yili-madiyɛ rɔ. Ila kumɛ di nde, ita wɔli-kɛlɛ ye dɔgɔma-ma-de!

¹⁴¹ Fenfen ma nde la, ado n gbo mɔgɛnu ye kɔnɔ n ti ila karan boloka mumɛ!

¹⁴² Ila telenbagayɛ si to burubukai! Tonyɛ le ila tɔn la dɛɛ!

¹⁴³ Tɔrɔyɛ da ra ara koloya n kuma. A nyɔmɛ-nyɔmɛ tora haminyɛ bolo kɔnɔ ita tɔnnu bara sewɛ di n ma.

¹⁴⁴ Ila karan bɛɛ latelennɛ le! Hɛnkilimayɛ di n ma woletɔ n si to n niyi la.

Kanan-Ko-Madiyalɛ

¹⁴⁵ N ya i rakele n yisi bɛɛ la, n ko, “Mari, n denkun.” Wo si a ma, n si ita sereya bɛɛ bira.

¹⁴⁶ N ya i rakele, n ko, “N nakisi.” Wo si a ma, n si ita sereyanu bira.

¹⁴⁷ Yanni sun-tele ni tii, n ya n nasɔ ka i rakele n dɛnbɛn-koe ma. N ya n yigi sa ita yili-madiyɛ rɔ.

¹⁴⁸ N bi kila n ya la alako n ni to n mirila ita karan ma.

¹⁴⁹ E, Mari, i wɔlɔ matɔlɔ n na. Kinikini n ma ka n to n niyi la bawo ita keninteyɛ ti maga.

¹⁵⁰ N yoge minnu bara a lagbɛlɛya n kuma, wonu denu bi anu gbɛrɛnna n ma. Wonu ti sɔn ila tɔnnu bira-koe ma mumɛ!

¹⁵¹ Kɔnɔ ile Mari gbɛrɛnnɛ n ma. Ita tɔn fenfen ti ban.

¹⁵² N bara ita tɔnnu karan nun. Bi ko ma wo la. I ya anu nadan de ko anu ni to tɛban!

Tarali-Koe Dɛnbɛnɛla Ko La

¹⁵³ N tɔrɔ-bole kɛ mafɛlɛn. I yandi, n nakanan bawo n ma nyina ita tɔnnu ko.

¹⁵⁴ I ni ma n kumafunfannɛ la ka n kun nadiya. N nakisi iko i wara n yili-madiya nya min.

¹⁵⁵ Karagbɛlɛnu ti kisi bawo anu sa ita tɔnnu birala.

¹⁵⁶ Kɔnɔ Mari, ita hinanteyɛ da-rakolo. Kinikini n ma ka n nakisi.

¹⁵⁷ N yogenu siya duk, ado anu bi a lagbɛlɛyala n kuma kɔnɔ n ma fara ita tɔn-birɛ la.

¹⁵⁸ N ya n yɛ sɔ yanfantenu na min kɛ, tɛ sigira n sɔn la bawo anu sa ila tɔnnu birala.

¹⁵⁹ Mari, i wara a yen, ita karan di n ye. Ila keninteyɛ ti yɛlɛma, woletɔ i yandi Mari, n nakanan.

¹⁶⁰ Ila tɔn-kole ma fenfen na fɔ tonyɛ. I ye kiti sala telenbagayɛ min na, wo ti ban!

Yisi-Gbɛlɛya-Koe Marita Tɔn Rɔ

¹⁶¹ Sɛnbɛ-tiginu nara baga n ma fufafu kɔnɔ ita tɔn gbiliyanɛ n bolo.

¹⁶² N sewanɛ dɔgɔma-ma-de ka a tɛgɛ ila yili-madiyɛ ma iko mɔgɛ min bi tɛrɛnala nɔnfuli la.

¹⁶³ Foninya-sɔgɔ labɔnɛ le n na lass! Kɔnɔ ita tɔnnu di n ye kati!

¹⁶⁴ Ka a tɛgɛ ita kiti-sa-nya-latelennɛ ma, n si baraka bira i ye tele kɔrɔ iko wɔrɔnfila.

¹⁶⁵ Ita tɔnnu di minnu ye, wonu yisi-kimani de poi! Fenfen sa nyɔ min si anu nabui.

¹⁶⁶ Mari, n bi i makɔnɔna n nakanan-koe rɔ, ado i wa min fɔ n ye, n bi wo le mala.

¹⁶⁷ N ya ita tɔnnu bira. Anu di n sɔn-kole ye.

¹⁶⁸ N ya ita tɔnnu anubɛ ita karan bira. N bi ko-wo-ko da kun tɔ, ile ye wo yenna.

Dɛnbɛn-Koe Madiyalɛ

¹⁶⁹ Mari, i wɔlɔ matɔlɔ n di-kɛ-kan la. I ni ko-kɔrɔ-lɔn-hɛnkili di n ma iko i wara n yili-madiya nya min.

¹⁷⁰ I wɔlɔ matɔlɔ nna madiyali-kɛ-kan la. I ni n nakisi iko i wara n yili-madiya nya min.

¹⁷¹ N si to i matɔgɔla dɛɛ bawo i wara n karan ita tɔnnu ma.

¹⁷² N si ita tɔnnu sigi sa bawo ila sereyanu natelennɛ.

¹⁷³ I rabɛnnɛ le n dɛnbɛn-koe ma wati bɛɛ bawo n bi ita tɔnnu birala.

¹⁷⁴ E, Mari, a sɔgɛ ye n na, i ni n dɛnbɛ ka n nakanan. N si sewɛ sɔrɔn ita tɔnnu denu tɔ.

¹⁷⁵ Niyi keni n ye woletɔ n si i matɔgɔ, alamɛ ita karan ya ko nyinya n ma.

¹⁷⁶ Ni n tora yilan-yilanna iko saga-tununɛ, i ni i kolan layigi nde, ila wɔli-kɛlɛ ma alako n ni kanan bawo n ma ita tɔnnu boloka mumɛ!