Yaburi 107 - ALLALA KUMƐ

Allata Nyimayɛ Matɔgɔ-Koe

¹ Baraka bira Mari ye bawo a ye ko-nyimɛ kɛla ma ye. Ala keninteyɛ ti ban mumɛ!

² Wole min bɛɛ ara kisi, wo ni to kumɛ kɛnu fɔla Mari matɔgɔ tinɛ tun tun! Ale le ya wo lakanan wo yogenu ma

³ ka na wo la ka bɔ nyamani-gbɛrɛkɛnu tɔ. A tele-bɔɛ wara la wo, a tele-yigi wara la wo, a kantɔ-wara la wo, a dugula wara la wo, ata mɔgɛ bɛɛ nara le ka bɔ wo bɛɛ rɔ.

⁴ Donu taranta yilan-yilanna wulɛ rɔ, kila sa kan min. Anu ma so-ta-kila fenfen yen anu si ta sigi kan min.

⁵ Yigi-wo-yigi ma taran anu bolo nun ka a tɛgɛ kɔnkɛ anubɛ yi-ko-sɔgɛ ma.

⁶ Wo tumɛ anu bi tɔrɔyɛ wo rɔ, anu dira Mari dala. A ya anu kunyɛ bɔ nyankankantan wo rɔ.

⁷ Anu bi tala sigila soe min tɔ, a ya so-ta-kila-telennɛ yira anu na.

⁸ Fɔ anu ni baraka bira Marita keninteya-dannatɛgɛbɛlɛla ko la anubɛ a ya kabana-koe minnu ma anu ye.

⁹ Minnu kan nagbalanɛ, a si wonu kan lakimɛ. Kɔnkɛ ye minnu na, a si wonu nafa pen!

¹⁰ Donu makinikininɛ taranta sigini pinpi rɔ. Anu kirinɛ siginɛ yele la yɔlɔkɛ la

¹¹ bawo anu murutiyara. Anu ma sɔn Alla Sɛnbɛ-Bɛɛ-Tigita kumɛnu birala. Anu ya anu ban ata kawandili la.

¹² Anu bara bandan ka a tɛgɛ wɔli-gbɛlɛmɛ ma. Anu kɛnɛna buila, ado mɔgɔ-wo-mɔgɔ sa min si anu dɛnbɛ.

¹³ Wo tumɛ anu bi tɔrɔyɛ wo rɔ, anu dira Mari dala. A ya anu kunyɛ bɔ nyankankantan wo rɔ.

¹⁴ Anu makinikininɛ bɔra pinpi wo rɔ. A ya yɔlɔkɛ wonu tatɛgɛtɛgɛ kudɛkudɛ!

¹⁵ Fɔ anu ni baraka bira Marita keninteya-dannatɛgɛbɛlɛla ko la anubɛ a ya kabana-koe minnu kɛ anu ye.

¹⁶ A ya sila-kankannu keri ka a balan-nɛgɛnu takerikeri.

¹⁷ Donu mara kun-takolɔnnu na ka a tɛgɛ anu hakɛla ko ma. Woletɔ anu tɔrɔta anuna ko-yogomɛla ko la.

¹⁸ Dɔn-fen-sɔgɔ labɔra anu na lass! Faga-sumɛ sara anu ma.

¹⁹ Wo tumɛ anu bi tɔrɔyɛ wo rɔ, anu dira Mari dala. A ya anu kunyɛ bɔ nyankankantan wo rɔ.

²⁰ A ya anu nakɛndɛya ata kumɛ la. A ya anu nakanan sayɛ le ma.

²¹ Fɔ anu ni baraka bira Marita keninteya-dannatɛgɛbɛlɛla ko la anubɛ a ya kabana-koe minnu kɛ anu ye.

²² Fɔ anu ba baraka-bira-sarakɛnu bɔ a ye. A ara ko-nyimɛ minnu kɛ anu ye, fɔ anu ni wonu takaran bɛti-diyamɛnu tɔ.

²³ Donu taranta sigini kɔgɔ-yi-kuma kulɔnnu tɔ. Anu bi anu beli-fan sɔrɔnna yi kuma nyɔ le.

²⁴ Mari ye min mala, anu bi wo yenna. Anu bi ata kabana-koe dama yenna kɔgɔ-yi-dumɛ rɔ anu yɛ la.

²⁵ Alla wa kuma, mankana-fɔn-belebele ni wuli. A si a ma, kɔgɔ-yi ni to magala-a-rɔ tangbon-tangbon!

²⁶ Kɔgɔ-yi si kulɔn wonu nayɛlɛ lele, wo kɔma, a ni a layigi a kɔrɔ tun sore! Ko sufa kɛnu si a ma, kulun-tawɔli-kɛlɛ wonu mankulan ni bɔ anu ma.

²⁷ Anu bi tola tonko-tankanna iko gbɛɛtoe. Anu kɔndɔfilita pirikali!

²⁸ Wo tumɛ anu bi tɔrɔyɛ wo rɔ, anu dira Mari dala. A ya anu kunyɛ bɔ nyankankantan wo rɔ.

²⁹ A ya fɔn-makilannɛ wo rade don! Yi wo ma tugu-a-rɔ tun!

³⁰ Anu sewara ka a tɛgɛ yi wo rade-koe ma. A ya a ma, anu kɛndɛ kera kulun-kiri-tinɛ wo ma.

³¹ Fɔ anu ni baraka bira Marita keninteya-dannatɛgɛbɛlɛla ko la anubɛ a ya kabana-koe minnu kɛ anu ye.

³² Fɔ anu ni Allata kabana-koe wara-koe fɔ nyama tɛma ka a matɔgɔ mɔgɔ-banu yala.

^33-34 Ka a tɛgɛ karagbɛlɛya-su minnu bi nyɔ, Mari ya bɛnu gbala todo! A ya tenkenu tagbala kerr! A ya dugu-nyimɛ yɛlɛman kɔgɔ-dugi la.

³⁵ Wo kɔma, a ya kɛnkɛn-dugi yɛlɛman yi-kundi-dan-natɛgɛnɛnu na. A ya dugu-gbalanɛ yɛlɛman tenke gbansannu na.

³⁶ A ya a ma, kɔnkɔtoenu sigira nyɔ. Anu ya soe raka anu nyɛrɛ ma nyɔ baraki!

³⁷ Anu ya fui-fannu fui ka ki-fannu ki nyɔ rɔ. Anu ya dɔn-fan sɔrɔn nyɔ duk!

³⁸ Allata duwɛ yigira mɔgɛ kɛnu ma. Wonu yirita bui! Kasara ma sigi anuna ninkinu na tun.

³⁹ Allata mɔgɛnu, anu yogenu ya anu nɔ ka anu namiliya. Ka a tɛgɛ wo ma, anu niyi ragbɛrɛnta ka tɔrɔyɛ sɔrɔn.

⁴⁰ Alla ma mɔgɔ-tɔrɔlɛ wonu lɔn fenfen na. A ya a ma, wonu tora yilan-yilanna wulɛ rɔ kila sa kan min.

⁴¹ A ya bolo-kolɔnnu kunyɛ bɔ tɔrɔyɛ rɔ ka anuna denbayɛnu nasiyaya iko kolo-fen-wɔrɛnu.

⁴² Mɔgɔ-telennɛnu ba wo rayen, anu si sewa kɔnɔ karagbɛlɛnu dɛ si balan gben!

⁴³ Hɛnkilimɛnu ni anu hɛnkili to kumɛ kɛ ko ka anu miri Marita keninteya-dannatɛgɛbɛlɛ ma.