Yaburi 106 - ALLALA KUMƐ

Mari Nyimaya-Koe Ala Mɔgɛnu Ye

¹ Tantolɛ ni kɛ Mari ye! Baraka bira Mari ye bawo a ye ko-nyimɛ kɛla ma ye. Ala keninteyɛ ti ban mumɛ!

² Yon si ke Allata kabana-koe bɛɛ rakaranna? Yon si ke a tantola a kilɛ fɛ?

³ Mɔgɔ-sewanɛ le wo tigi la min bi ata kumɛ birala ka to ko-latelennɛ kɛla tolon!

⁴ Mari, i wa wuli ila mɔgɛnu dɛnbɛna, i ni i fonde lamiri nde fanan ma. I tenbi ila mɔgɛnu nakisila, i kana nyina nde fanan ko.

⁵ I ni sɔn, n ni ila mɔgɛnu yen tala yarɔ alako nde fanan ni do sɔrɔn anuta sewɛ rɔ. Nde fanan ni n wasi i la iko ita mɔgɛnu.

⁶ Male ara hakɛ kɛ iko ma benbanu. Ma sɔn ma kin.

⁷ Ma benbanu ma Allata kabana-koenu nya-yen Iyipiti nyamanɛ rɔ. Alla ara ala keninteya-su-siyamɛ minnu yira anu na nun, anu nyinara wonu ko. Anu murutiyara Alla Sɛnbɛ-Bɛɛ-Tigi ma Kɔgɔ-Yi-Wulan dafɛ.

⁸ Kɔnɔ hali wo, a ya anu nakanan iko a ya anu yili-madiya nya min, alako a ni ata sɛnbɛ-wɛ yira anu na.

⁹ A kumara Kɔgɔ-Yi-Wulan ma, wo gbalata a worɔn la todo! A sɔra ala mɔgɛnu yarɔ ka dugu-gbalanɛ wo ratɛgɛ.

¹⁰ A ya anu nakanan anu gboyana-mɔgɛnu masibɛ ma. A ya anu kisi anu yogenu ma.

¹¹ Wo kɔma, yi kerita anu yogenu kun na ka anu yamatogon mɛmɛ! Hali mɔgɔ-den-kelen ma to a niyi la anu tɔ.

¹² Wo kɔma, ala mɔgɛnu lara ata lanyiri wonu na ka a tanto-bɛtinu bɔ.

¹³ Kɔnɔ a ara min bɛɛ kɛ anu ye, anu nyinara wonu ko tiriya! Anu gbaranta anu nyɛrɛ la. Anu ma Allata makawandilɛ makɔni.

¹⁴ Mɛyɛ ya anu bira wula-da-rakolɔn rɔ dɔgɔma-ma-de ha anu ya Alla kɔrɔbɔ.

¹⁵ Woletɔ anu ya min manyinika a bolo, Alla ya wo di anu ma. Kɔnɔ a ya kiraya-yogomɛ fanan nana anu kuma.

¹⁶ Donu ya Nɛbi Musa makeliya wulɛ rɔ nyɔ. Donu fanan ya Marita wɔli-kɛla-sɛnimɛ Aruna makeliya fanan.

¹⁷ Dugi dɛ lakara ka Ɛliyabula dan Datan lakunu. Dugi ya Abairam anubɛ ala denbayɛ fanan togon.

¹⁸ Tɛ bɔra san ma ka yigi anu gba-fɛ-bilalɛnu tɔ kiribo! A ya karagbɛlɛ wonu mintan gburr!

¹⁹ Anu ya ninki-danla muninyɛ ladan sɛnɛ la Sinayi kɔnkɛ kɔrɔ. Wo kɔma, anu sɛgira wo kɔla.

²⁰ Anu ya Allata gbiliyɛ mayɛlɛma ka a di bin-dɔn-sogela muninyɛ kɛ ma.

²¹ Alla min ya anu kisi ata sɛnbɛ-makawanɛ la Iyipiti, anu nyinara wo ko salon!

²² A ya kabana-ko-siyaman ma nyɔ, ado a ya ko-nyima-belebele ma Kɔgɔ-Yi-Wulan la!

²³ A fɔɛ Alla bolo ko a ye ala mɔgɛnu kasarala, ata wɔli-kɛla-yabɔnɛ Musa ya a sɔ Allata mɔgɛ wonuna ko la gben! A ya anu kanan Allata fondo-bɔɛ ma.

²⁴ Anu ma la Allata lanyiri la min kɛ, woletɔ anu ya anu ban nyamani-hakikɛ wo la.

²⁵ Anu sigira anuna fani-bɔnnu na ka don gbunya-kuma-fɔɛ rɔ. Anu ma sɔn anu tole masɔla Mari la mumɛ!

²⁶ Woletɔ a ya anu makawandi a sɛbɛ-kuna-wɛ la ko anu kunyɛ si to wula-da-rakolɔn kɛ rɔ serr!

²⁷ Wo kɔma, a ko a si anu kegeyɛnu tanyɛnsɛn Alla-batobɛlɛnu tɛma ka a ma, anu ni faga nyamani-gbɛrɛnu tɔ.

²⁸ Allala mɔgɛnu kofura Beyali-kɔlɛnu ma Piyɔri kɔnkɛ ma. Niyi sa bɛsɛ minnu tɔ, anu bi wonu kɔ-fan dɔnna.

²⁹ Anu kɛ-nya ya a ma, Mari fonde bɔra dɔgɔma-ma-de! Kiraya-fitinɛ donta anu kun na.

³⁰ Kɔnɔ Finihasi ya a sɔ gben, ka ko-yogoma-kɛlɛ tɔrɔ woletɔ tɔn sigira kiraya-fitinɛ wo la.

³¹ Mɔgɛnu si to anu mirila Finihasila ko-nyimɛ ma ka a yatɛ telenbagɛ la tolon!

³² Mɔgɛnu ya a ma, Mari fonde bɔra Sɔnkɔ-Sɔnkɔ-Tenke dafɛ ha anu ya Musa don nanparan rɔ.

³³ Anu ya a ma, Musa diminyara dɔgɔma-ma-de ha a kumara yona, a ma a miri.

³⁴ Anu ma sibolo-gbɛrɛnu faga iko Alla ya a fɔ anu ye nya min.

³⁵ Kɔnɔ furu-nyɔgɔnyɛ donta anubɛ wonu tɛma. Anu ya Alla-lɔnbɛlɛnu kɛ-nya bi.

³⁶ Allata mɔgɛnu ya bɛsɛnu kɔ. Wo nara kasarɛ la anu ma.

³⁷ Anu ya anuna den-keinubɛ anuna dunmusinu ma sarakɛ la Kenan kɛnuna bɛsɛnu ye.

³⁸ Dan minnu sa ko kalama, anu ya wonu faga. Mɔgɔ-fagɛ wo ya nyamanɛ wo rakɔsɔ.

³⁹ Anu kɛ-nya ya anu natinya, ado anu denu ma telen Alla ye.

⁴⁰ Woletɔ Mari fonde bɔra ala mɔgɛnu kuma. Anu sɔgɔ labɔra a la lass!

⁴¹ A ya anu kunyɛ don sibolo-gbɛrɛnu bolo alako anu yoge wonu ni anu mara.

⁴² Anu yogenu ya anu niyi ragbɛrɛn anu ma, ha anu tora maralɛ wo kɔrɔ gben!

⁴³ Mari mɛra ala mɔgɛnu nakisila. Kɔnɔ wonu denu sɛgira murutiyala a ma. Anu tununta anu hakɛ rɔ pɔɛ!

⁴⁴ Kɔnɔ hali wo, Mari ya anu di-kɛ-kan lamɔɛn. A ya a fonde lamiri anuna tɔrɔyɛ ma.

⁴⁵ Ka a tɛgɛ wo ma, a ya a miri anu tɛma-sarama-kan ma. A ya a miriya yɛlɛman ala keninteya-belebele-wɛla ko la anu bara la.

⁴⁶ A ya a ma, anu tɔrɔyalɛ wonu kinikinita anu ma.

⁴⁷ E, mata Mari Alla, ma lakisi. Ma bɔ sibolo-gbɛrɛnu yala, i ni na ma la tun, woletɔ ma si i wɔli-nyimɛ lɔn ka i tɔgɔ-sɛnimɛ tanto.

⁴⁸ Tantolɛ ni di Isirɛlata Mari Alla ma ka to a matɔgɔla burubukai! Mɔgɛ bɛɛ ni a fɔ ko, “Amina!” Tantolɛ ni kɛ Mari ye!