Yaburi 103 - ALLALA KUMƐ

Allata Keninteyɛ Wara-Koe

¹ N ni Mari matɔgɔ n sɔndɔmɛ bɛɛ la. N fɛrɛ mumɛ bɛɛ ye Mari tɔgɔ-sɛnimɛ tantola.

² N ni Mari matɔgɔ n sɔndɔmɛ bɛɛ la. A ye ko-nyimɛ minnu kɛla n ye, n kana nyina wo do-wo-do ko.

³ A ye n hakɛ mumɛ bɛɛ makotola ka nna kirayɛ bɛɛ dandan.

⁴ A ye n kandanna kanba-masibɛ ma. Ala duwɛ ye yigila n kuma ka hinɛ anubɛ kinikinɛ di n ma.

⁵ A ye ko-nyima-su bɛɛ dila n ma alako n tagbɛlɛyanɛ ni to n pose rɔ nya min iko kokɛ.

⁶ Mɔgɔ-tɔrɔnɛ minnu bi kun-tigi-karagbɛlɛnu kɔrɔ, Mari ye ko-latelennɛnu kɛla wonu ye ka yo di anu ma.

⁷ Mari ya a miriyanu yira Nɛbi Musa la. A ya a ma, Isirɛla mɔgɛnu ya ata kabana-koenu tayen.

⁸ Ala kinikinɛ anubɛ keninteyɛ da rakolo. A ti diminya yona, ado dan sa ata keninteyɛ la.

⁹ A ti to nyɛɛla ma ma. A ti mala ko sigi a burɔ.

¹⁰ A ti to ma tɔrɔla iko a bɛnta, ma ni tɔrɔyɛ sɔrɔn nya min. A ti ma sara boloko-yogomɛ-kɛ iko ma hakɛ anubɛ mala ko-yogoma-kɛ ye nya min.

¹¹ Iko san-kole fɛ-yan dugu-kole la nya min pon, Allata keninteyɛ makawara mɔgɛnu ye wo nya na le, minnu bi ale gbiliyala, kɔni.

¹² Iko tele-bɔɛ fɛ-yan tele-yigi la nya min, a ye ma hakɛ masɛgila ma la wo nya na le.

¹³ Iko fa nyimayanɛ ala dan ye nya min, Mari fanan nyimayanɛ mɔgɛnu ye minnu bi a gbiliyala.

¹⁴ Ma ladanta nya min, a ya wo lɔn bawo a ya a lɔn ko bɔnkɛ le ma la dɔrɔn.

¹⁵ Hadama-den-niyi manɛ iko binyɛ. Ma si koloya ka kinya iko bin-fere.

¹⁶ Fɔnyɔ wa a fɛ, a si sagan a la soee! Mɔgɔ ti a yen tun!

¹⁷ Kɔnɔ minnu bi Mari gbiliyala, ala keninteyɛ ti ban wonu ye mumɛ! Ata nyimayɛ dan sa wonubɛ anu kegeyɛnu bara la.

¹⁸ A ye wo nya na le wonu ye minnu bi anuta sarama-kan latɔnbagayala, minnu bi ata tɔnnu birala lanayɛ rɔ, kɔni.

¹⁹ Mari ya ata mansaya-waganɛ sigi san-kole rɔ. Ale le mansayɛ la fan bɛɛ kun na.

²⁰ Wole melika-makawanɛnu, wo ni Mari tanto! Wo ye ala tɔnnu birala. A ye kumɛ min fɔla, wo ye wo tole masɔla wonu na.

²¹ Wole san-kole sɛnbɛ-tiginu, wo ni Mari tanto! Ala wɔli-kɛlɛ le wole la. Wo ye a sako kɛla.

²² Ala dali-fan bɛɛ ni Mari tanto! Wo ye kan-bo-kan, a ye wo kun na nyɔ. N ni Mari tanto n sɔndɔmɛ bɛɛ la!