Yaburi 102 - ALLALA KUMƐ

Kemini-Mɛsɛta Tɔrɔyɛ Madiyalɛ

¹ E, Mari, i wɔlɔ matɔlɔ nta madiyali-kan la. N tenbi dila i dala n dɛnbɛn-koe rɔ, i ni wo fanan namɔɛn.

² N ba tɔrɔyɛ sɔrɔn wati min, i kana i kan-kɔ sɔ n na. I wɔlɔ matɔlɔ n na alako n ba i rakele, i ni a labira tiriya!

³ N niyi bɔmatoe le iko ta-sisi. N fɛrɛ ye mintanna iko tɛ le siginɛ a la.

⁴ N yisi gbalanɛ iko anu bara binyɛ min dɛn. Dɔn-fen-sɔgɔ-wo-sɔgɔ sa n birala.

⁵ N bi kurɔn min kɛla n kan-mayɛlɛnɛ la, wo ara a ma, n bara bara wonkan!

⁶ N kuman-kan manɛ iko gbingbinnyagantɛ min bi wula-da-rakolɔn rɔ. N makinikininɛ iko kɛrɛn-kona.

⁷ Ki-kudu, n ti kinɔgɔ. N mani de iko kona min kelen pe ye bɔn kuma.

⁸ Telen-gbɛn, n yogenu bi n manyinina. Minnu bi n mɔɛnna, wonu bi n tɔgɛ mala dankali-kɛ-fan la.

⁹ Ta-gbangban le manɛ nna dɔn-fan la. N tenbi n minna, n ya-yi ye kɛla yi-lafɛ rɔ

¹⁰ bawo ita fondo-bɔɛ ara n bi ka n nafili a rɔ pirr!

¹¹ N siyi-fɛ ara wuruya iko wurala-ninɛ. N bara gbala n kin kun na iko bin-gbalɛ.

¹² Kɔnɔ Mari, ile le mansɛ la tolon! Mɔgɛ bɛɛ si to a mirila i ma burubukai!

¹³ I si i lakɔɛnma ka kinikini Yerusalɛm soe ma. A wati ara ke ka kinikini a ma. Wati-yabɔnɛ ara ke, yɔ!

¹⁴ Hali Yerusalɛm soe ara tinya, nyɔ di Isirɛla mɔgɛnu ye. Hali nyɔ ara tii bolo-wo-bolo, ala kinikinɛ ye Isirɛla mɔgɛnu tɔ.

¹⁵ Sibolo-gbɛrɛnu bi kilanna Mari tɔgɛ la. Duninya-mansɛ bɛɛ kilannɛ ata sɛnbɛ la.

¹⁶ Mari wa Yerusalɛm sɔ a kurɛ la tun, ata gbiliyɛ si bɔ gbɛ rɔ wo rɔ.

¹⁷ Ale ara a ban mɔgɛ minnu na nun, a si a wɔlɔ matɔlɔ wonuna madiyali-kɛ-kan la.

¹⁸ Mari ara min kɛ, wo ni wo sɛbɛ wo mamanɛnu ye alako minnu ma sɔrɔn bɛ, wonu ni a matɔgɔ.

¹⁹ Mari ya a kolan layigi ka bɔ ata kan-tina-sɛnimɛ rɔ. A tora san ma ka dugu-kole mafɛlɛn.

²⁰ A ye wo mafɛlan kun na tumɛ min, a ya mɔgɔ-biranɛnu kurun-kan lamɔɛn. Minnu faga-ko-lɔgɔ la ara ban tɛgɛla, a ya wonu kunyɛ bɔ fagalɛ kɔrɔ.

²¹ A ya wo ma le alako wonu ni to a wara-koe fɔla Yerusalɛm soe burɔ. Wonu si to a matɔgɔla nyɔ.

²² Sibolenu anubɛ nyamanɛnu ba anu nyɔgɔn kundɛn, anu si Mari bato wo tumɛ rɔ.

²³ N bi n pose rɔ wati min, Mari ya n tafaga. A ara n siyi-fɛ wuruya.

²⁴ E, Alla, bawo n ma kɔrɔya wɛ, i kana n natuntun kanbɛ rɔ fɔlɔn. E, Mari, i ye nyɔ tolon!

²⁵ Bi ma, duninya dan i bolo. I ya san-kole dan i nyɛrɛ kɔɛn le la.

²⁶ Fan bɛɛ si tunu yen, fɔ ile min kelen pe ye tola. Anu na si murun iko kura-kore. I si anu nakɛ a rɔ iko kura-nɔgɔnɛ.

²⁷ Kɔnɔ i ti yɛlɛma muk! Ile siyi ti ban mumɛ!

²⁸ Kɔnɔ mala dannu ti to nyagbɛ rɔ. Wonu kegeyɛnu si to lafɛrɛ rɔ. Anuna dannu si taran ila matankalɛ kɔrɔ.