Yaburi 101 - ALLALA KUMƐ

Lanyiri Kiri-Koe Mansa Dawuda Bolo

¹ E, Mari, n si bɛti bɔ ila keninteyɛ anubɛ telenbagayɛ wara-koe la. N si tantoli-bɛti bɔ i ye.

² N kɛ-nya si bɛn i ya la. I ye nala n bara muntuma? N bi sɔn-nyimayɛ rɔ nna bɔn la.

³ Ka ko-yogomɛ-mafɛlɛn, wo ma di n ye muk! Minnu kan-kɔ sɔnɛ ile Alla la, wonu kɛ-nya gbo n ye kosɛbɛ! Ka tenbi wo la, nta sa anu bara-koe rɔ.

⁴ N ti sɔn defan, mɔgɔ-telenbɛlɛnu ni anu gbɛrɛn n ma. N hayu mumɛ sa ko-yogomɛ la.

⁵ N si tɔn sigi wɛwɛ-salɛnu na minnu si nyɔgɔn-kɔma-kumɛ fɔ. N ti ke n muinna mɔgɔ-wasini fenfen kɔrɔ.

⁶ Minnu telennɛ Alla ye, wonu di n ye. Wonu ni sigi n barɛ bolɔn la. Mɔgɔ-lasɔlɔnnɛnu si wɔli n ye.

⁷ Kɔnɔ yanfante-wo-yanfante ti sigi nna bolɔn la. Foninya-fɔla fenfen ti sɔ n yakɔrɔ.

⁸ Karagbɛlɛ minnu bi nyamanɛ kɛ rɔ, n si to wonu bara-koe kala-a-la tele-wo-tele alako karagbɛlɛyɛ ni ban Marita soe burɔ.