Taita 3 - ALLALA KUMƐ

Dɛnkɛninya-Mɔgɛnu Kɛ-Nya

¹ I ni ila mɔgɛnu hɛnkili bila ko anu ni sonnɛya kun-tiginu anubɛ sɛnbɛ-tiginu ye. Anu ni wonuna kumɛ bira. Anu ni anu tabɛn kɛwɔli-nyimɛ-bɛɛ kɛ tinɛ.

² A fɔ anu ye ko anu kana kuma-yogoma fɔ mɔgɔ-wo-mɔgɔ ma. Anu kana ma kɛlɛ-tɛgɛlɛnu na. Anu ni ko-nyimɛ kɛ ka anu munyu mɔgɛnu kɔrɔ, ado anu kana sɔnkɔ mɔgɛnu ma.

³ Fɔlɔ-nun, kuntan anubɛ kuma-birabɛlɛ anubɛ ko-yogoma-kɛlɛ le male la. Mɔgɛnu ya ma yanfa ko ma ni ma yɔɔnnu na fɛrɛ-nata anubɛ nyɛrɛ-diyana-ko-sufa-bɛɛ bolo. Ma ya mala wati bɛɛ tinya wunduyogoyɛ anubɛ keliyɛ rɔ. Ma gboyara mɔgɛnu ye, ado anu fanan gboyara ma ye.

⁴ Kɔnɔ ma kisilɛ, Allata nyimayɛ anubɛ keninteyɛ bɔra gbɛ rɔ ma ye tumɛ min,

⁵ a ya ma kisi. A ma ma kisi ka a tɛgɛ ma nyɛrɛta kɛwɔli-nyimɛnuna ko la de! A ya wo ma ala kinikinɛ lela ko la. A ya ma kisi ata Ni-Sɛnimɛ baraka rɔ min bi sɔrɔn-nya-kurɛ anubɛ ni-kurɛ dila ma ma. Ale le si mɔgɔ yisi ku ka a sɔn sɛninya,

⁶ ado Alla ara ata Ni-Sɛnimɛ labɔn ma kuma bui! A ya wo ma ma kisilɛ Yisa Kirasiti baraka le tɔ.

⁷ Woletɔ ma lanɛ a la ko ma si habadan-nimayɛ sɔrɔn. Yigi wo ye ma bolo bawo ma la ara telen Alla ye Allata hinɛ fɛ.

⁸ Tonyɛ le kɛ la. N bi a fɛ, i ni karan wonu bira bɛrɛkɛ, woletɔ minnu dɛnkɛninyanɛ Alla ma, wonu si to ko-nyimɛ kɛla wati bɛɛ. Wo kin, ado a bɛnnɛ mɔgɛ bɛɛ ma.

⁹ Kuntanya-kumɛ wo, benba-tɔgɔ-rakaran wo, sɔsɔli-sɛ wo, tɔn-wara-ko-kɛlɛ wo, i fara wonu na. Wonu ti ko-wo-ko nyinya. Ko-fuyi le wonu na dɔrɔn.

¹⁰ Ni mɔgɛ do ye faralɛ kɛla, i ni wo makawandi kinyama fila. Wo kɔma, i makoe kana taran wo la tun,

¹¹ bawo i ya a lɔn ko wo mɔgɔ-sufa hɛnkili rabasannɛ de! A hakɛ ye a yirala a nyɛrɛ la ko ko-yogoma-kɛlɛ le ale la.

Kuma-Kundon

¹² N ba Arimatiya, ni wo ma, Tikika, lata i ma tumɛ min, i raya ka na ke n ma Nikapoli soe burɔ bawo n bara a latɛgɛ ko n ni samɛ kɛ nyɔ.

¹³ I raya ka Apalasi anubɛ n fɛkalɛ Sinasi dɛnbɛ ko anu ni kilɛ bira. Anu makoe taranta fan min bɛɛ la, i ni a ma, anu ni wonu sɔrɔn.

¹⁴ I ni ila mɔgɛnu karan ko-nyima-kɛ la alako anu ni mɔgɛnu dɛnbɛ anu mako-nyinyɛ la. Anu kana ma mɔgɔ-fuyinu na.

¹⁵ N fɛ-mɔgɛnu bi i kɔndɔnna. I ni dɛnkɛninya-mɔgɛ-bɛɛ kɔndɔn nyɔ. Allala hinɛ ni to wo dama fɛ.