Sɛfanaya 3 - ALLALA KUMƐ

Yerusalɛm Kɛnu Halaki-Koe anubɛ Anu Kunka-Koe

¹ Yerusalɛm soe kɛ lafanɛ mɔgɔ-murutiyanɛnu anubɛ karagbɛlɛnu na. Yan-mɔgɔ-banu bi anuna mɔgɛnu nyagbala. Wola ko la, fɔ soe kɛ wa kasara serr!

² Yerusalɛm kɛnu sa anu tole masɔla Mari la. Anu ti sɔn ka kolo a ma. Anu ma anu yigi sa Mari rɔ. Anu ti a matara anu dɛnbɛn-koe la.

³ Yan-mɔgɔ-banu anubɛ yan-kiti-tɛgɛlɛnu mani de iko yara-kɔnkɔtoenu. Anu ba fenfen sɔrɔn, anu si wo kunyɛ lagbana. Anu ti sinan sigi.

⁴ Fenfen sa yan-nɛbinu da rɔ fɔ nyɛrɛ-matɔgɔ-kumɛnu. Anu bi min fɔla, mɔgɔ ti la wonu na. Fan minnu dantɛgɛnɛ Mari ma, saraka-masɔlɛnu bi wo latinyana, ado Allata tɔnnu minnu sɛbɛnɛ, anu bi wonu tadula alako anu ni fen bɔ mɔgɛnu bolo.

⁵ Kɔnɔ hali wo, Mari ye Yerusalɛm soe kɛ burɔ. Koe min telennɛ, Mari si wo le ma. A ti ko-raduni wo ko-raduni ma. Tuma-wo-tuma, a si telenbagaya-kilɛ yira ala mɔgɛnu na. Kɔnɔ hali wo, karagbɛlɛ minnu bi nyɔ, anu ti miliya karagbɛlɛya-kɛ-tinɛ.

⁶ Mari ko ka a tɛgɛ wole, Isirɛla mɔgɛnuna ko ma, a ara sibolo-siyaman nato nun dogbe! A ya anuna soenu kasara ka anuna tarɛnu anubɛ anuna nyamani-kumafɛlɛn-tinɛnu tinya pɔ! Anuna soenu mara tonbon-bɛrɛbɛrɛ la.

⁷ Mari ko ni wo ya a yen, a ya a ma wo nya, a ya a lɔn nun ko wole, ata mɔgɛnu si a gbiliya ka kolo a ma lɛp! A ko a miri nun ko wo ara kabana-koe minnu tayen wo yɛ la, wo ti nyina wonu ko nun muk! Kɔnɔ a ko a ma mɛ lefan, wo ya wo ya-lamunun karagbɛlɛyɛ la tun!

⁸ Kɔnɔ Mari ko wo ni a makɔnɔ tun! Lunyɛ do, fɔ a wa sibole bɛɛ kiti. Mari ko a ara ban a latɛgɛla ko a si sibole bɛɛsi ladɛn alako anu ni ata diminyɛ-sɛnbɛ lɔn. A ko ata diminyɛ wo si ma tɛ la min si duninya mumɛ halaki.

⁹ Kɛ dama wa ka-a-la tumɛ min, Mari ko a si sibole bɛɛ yɛlɛma ka anu fara anuna bɛsi-kɔ-koe la. A ko mɔgɛ bɛɛ si ale kelen pe bato ka ata kumɛ bira.

¹⁰ Ala mɔgɛ minnu bi nyamani-gbɛrɛnu tɔ wula-yan la, a ko a si na wonu na a bato-tinɛ. Hali Sudan kɛ minnu fɛ-yan, wonu fanan si na.

¹¹ A ko wo wati wa ke tumɛ min, wole Isirɛla kɛnu kana miliya tun ka a tɛgɛ wo ara murutiyɛ min ma Mari ma nun fɔlɔ. Kɔnɔ yanni wo wati ni ke, a ko a si mɔgɔ-wasinɛ bɛɛ firan dugu-kole kɛ kuma. Woletɔ wo ti murutiya Mari ma tun kɔnkɔ-kolo-wɛ kuma ata Bato-Bɔn sɔnɛ kan min.

¹² A ko fɔ mɔgɔ-famayiginɛnu dɔrɔn si to anu niyi la. Wonu denu si ta a wara anu dɛnbɛn-koe la.

¹³ Wole Isirɛla mɔgɛ toe minnu bi tola wo niyi la yan tɔ, wo ti ko-yogoma ma mɔgɛ la, wo ti foninya fɔ, ado wo ti yanfa don. Wo si sigi yisi-kimɛ rɔ. Mɔgɔ-wo-mɔgɔ ti wo maban.

Yili-Madiya Sigi-Sa-Koe Nɛbi Sɛfanaya Bolo

¹⁴ E, wole Isirɛla mɔgɛnu, wo kulu-mayɛlɛnɛ ni sigi sa ka nyagalen wo yisi rɔ! Wole Yerusalɛm kɛnu, wo ni nyagalen wo yisi bɛɛ la.

¹⁵ Mari ara wota tɔrɔyɛ ban. Wo yogo-wo-yogo sa tun. Mari, Isirɛla mansɛ, ye wo fɛ. Wo kilan-kunya fenfen sa.

¹⁶ Wo wati ye nala, mɔgɛnu si a fɔ Yerusalɛm kɛnu ye ko, “Wole Yerusalɛm kɛnu, wo kana kilan yisi-tinya bolo.”

¹⁷ Wota Mari Alla ye wo fɛ. Ata sɛnbɛ si nɔlɛ di wo ma. Mari si nyagalen wo la. A si ni-kurɛ di wo ma bawo wo di a ye. A si nyagalen wo la ka sigi sa.

¹⁸ A si nyagalen iko mɔgɛ minnu bi ladɛn-belebele-wɛ rɔ. Mari ko kilan min dunnɛ wo kuma, a ara wo bɔ nyɔ feu! A ko a ara wola miliyɛ bɛɛsi latɛrɛndɛ ka wonu nakɛ a rɔ pon!

¹⁹ A ko a na-wati ma fɛ-yan tun. A ko minnu bara wo rasɛ nun, a si wonu tɔrɔ. Fɛɛ ye minnu kian la, a ko a si wonu nakanan. Kɛlɛ tara min damasi la, a ko a si na wonu damasi la tun. A ko a si anuna miliyɛ yɛlɛma anu ye gbiliyɛ la. Duninya mumɛ bɛɛ si anu gbiliya.

²⁰ A ko wo wati ma fɛ-yan tun. Wola mɔgɛ min bɛɛsi ra ara nyɛnsɛn nun, a ko a si wo damasi kundɛn anu barɛ tun. A ko a si a ma, wo mankan ni ta wuu! A ko a si a ma, wo wara-koe ni ta yarɔ tun! Mari kan le kɛ la de!