Sɛfanaya 1 - ALLALA KUMƐ

¹ Mari ya kilayɛ min di nde, Nɛbi Sɛfanaya ma, wo le kɛ la. Kilayɛ kɛ fɔra n ye wo tumɛ Amonna den Yosaya ye mansayɛ la Yuda nyamanɛ rɔ. Yuda Mansa Hɛsakaya bɔnsɔn-mɔgɛ do le nde, Nɛbi Sɛfanaya la. Ale Mansa Hɛsakaya ya Amaraya sɔrɔn. Amaraya ya Kɛdalaya sɔrɔn. Kɛdalaya ya Kusayi sɔrɔn. Kusayi ya nde, Nɛbi Sɛfanaya sɔrɔn.

Marita Kiti-Tɛgɛ-Tele Wara-Koe

² Mari ya a fɔ nde, Nɛbi Sɛfanaya ye ko a si na duninya rakolonya feu!

³ A ko a si nima-fan bɛɛ ban fegba, a hadama-den wo, a sogo wo, a koni wo, anubɛ a yɛgɛnu. A ko a si karagbɛlɛnu wara-koe ka-a-la. Hali mɔgɔ-den-kelen ti to a niyi la. Ale Mari kuman-kan le kɛ la.

⁴ Mari ko a si a kɔɛn lata wole Yuda nyamanita-mɔgɛnu anubɛ Yerusalɛm so-burɔ-mɔgɛnu kan ma ka wo tɔrɔ. A ko a si Beyali bɛsi-kɔlɛnu ban yan fegba! Hali Beyalita saraka-masɔlɛnu tɔgɛ si tunu mɔgɛnu tɛma.

⁵ Mɔgɔ-wo-mɔgɔ yɛlɛta kan-tina-layan-bɛ kuma alako a ni tele anubɛ karɛ anubɛ lole bato nyɔ, Mari ko a si wo tigi kasara pɔ! Minnu bi Mari batola ka telenbagaya-lanyiri kiri a ye, wo kɔma, a ni ta a gboro bɛsɛ wo rɔ min tɔgɛ Molɛki, Mari ko a si wonu fanan kasara.

⁶ Minnu bara anu kan-kɔ sɔ Mari la ka anu bɔ aleta kilɛ fɛ, a ko a si wonu bara-koe ban. Anu sa hɛnkili nyinina a bolo tun.

⁷ Marila kiti-tɛgɛ-tele ara gbɛrɛn ma ma wona, woletɔ mɔgɛ bɛɛ ni a sigi-a-la Mari ye don! Mari ara a rabɛn ka male ata mɔgɛnu ma sarakɛ la. A ara ma yogenu kele ma kan ma alako wonu ni na ma bolo-fannu bi ma bolo Yuda nyamanɛ rɔ.

⁸ Mari ko a wa ma yogenu nana ma faga-tinɛ tumɛ min, tɔrɔyɛ wo da si bira mansɛla mɔgɔ-banu anubɛ ala dannu ma anubɛ minnu bi sibolo-gbɛrɛnuna namunyɛ bila.

⁹ Minnu si sibolo-gbɛrɛnuta namunyɛ bi bɛsi-kɔ-tinɛ, wonubɛ minnu bi mɔgɔ-fagɛ anubɛ kankanyɛ kun na alako anu ni anu tiginuna bɔnnu nafa, Mari ko a si wonu tɔrɔ.

¹⁰ Mari ko wo-wulɔn-tele rɔ, ma si di-kɛ-kan lamɔɛn Yerusalɛm soe burɔ yan, don-dɛ min tɔgɛ Yɛgɛ, wo telen tɔ. Ma si mɔgɛnu gbele-gbelen-kannu namɔɛn soe tonke wo rɔ, anu ban-san min nadanna, kɔni. Ma si bɔnnu nawuya-kannu namɔɛn Yerusalɛm kɔnkɛnu kuma.

¹¹ Minnu bi soe ya-layigi ma, anu si yilayɛ kɛ kan min, anu ni di anu sɛbɛ-kuna-wɛ la bawo yilanu si ban fagala.

¹² Mari ko wo wati wa ke, a si lɛnpu bi ka a yɛ lakalan Yerusalɛm soe tonke bɛɛ rɔ. Ni a ya mɔgɔ-wo-mɔgɔ taran min wasinɛ, ado a lanɛ a nyɛrɛ la, Mari ko a si wo tigi tɔrɔ. Wo tigi ye belenna a fɔla a nyɛrɛ ma ko, “Mari ti ko-wo-ko sigi a ma, a mara a nyima la wo, a mara a yogoma la wo.”

¹³ A yogenu si a bolo-fannu bi ka ala bon-nakolɔn to. A si bɔn sɔ kɔnɔ a ti ki a la. A si nɔnbɔ-gbɔ-sɛnɛnu sa kɔnɔ a ti a yi min.

¹⁴ Marita kiti-tɛgɛ-wati ara gbɛrɛn, ado a ti mɛ! Wo tele si gbɛlɛya kati! Hali kɛlɛ-den-tagbɛlɛmɛnu si di bawo anu yigi ara tɛgɛ tɔrɔya-sufa wonuna ko la.

¹⁵ Wulɔn si ma Marita diminyɛ-yira-tele la ma la. Wulɔn si ma tɔrɔya-tele la mɔgɛ bɛɛ ye. Wo wati si ma bolo-fan damasi-tinya-wati anubɛ halakiyi-wati la. Tɔrɔyɛ si pinpi lana ma kuma bɛff! A si ma iko tele ma bɔ lunyɛ min.

¹⁶ Wo wulɔn-tele si ma kɛlɛ-kɛ-buri-fɛ-lunyɛ la. Ma yogenu tenbi donna so-latankanɛnu tɔ tumɛ min, anu si a lawɔyɔ ka na nyamanɛ-kumafɛlɛn-tinɛnu kan ma.

¹⁷ Mari ye a fɔla ko a si kasara-su min nana hadama-dannu kuma, wo si a ma, mɔgɛ bɛɛ ni ta a bole mɛmɛla iko fiyɔn. Anu bara hakɛ kɛ Mari la ka bila a la, woletɔ anu yele si to bɔla iko yi, ado anu suyi si to sani dugi ma kan-bo-kan ka tuli.

¹⁸ Mari fonde ye bɔla tele min ma bɛrɛbɛrɛkɛ, mɔgɛnuna sɛnɛ anubɛ wodi-gbɛnu ti anu bɔ tɔrɔyɛ wonu tɔ wo wulɔn-tele rɔ. Marita diminyɛ si ma iko tɛ ka duninya kɛ bɛɛ mintan. A si duninya-mɔgɛ bɛɛ lato nya-kun-kelen dogbe!