Sakaraya 7 - ALLALA KUMƐ

Sun-Fuyi Wara-Koe

¹ Dariyasila mansayɛ san nani nyɔgɛ ma, a karɛ kɔnɔntɔ nyɔgɛ min tɔgɛ Kisilɛfi, wo tele nani nyɔgɛ ma, Mari ya sarakanɛ don nde, Sakaraya bolo.

^2-3 Wo wati ya a taran, Bɛtɛli so-burɔ-mɔgɛnu bara Sarisa anubɛ Rigɛm-Mɛlɛki anubɛ mɔgɔ filɛ wonuta mɔgɛnu nata Mari Sɛnbɛ-Bɛɛ-Tigi Bato-Bɔn la. Anu ya anu nata duwa nyini tinɛ Mari bolo. Anu ya saraka-masɔlɛnu anubɛ nɛbinu manyinika ko, “San-bo-san, a karɛ loli nyɔgɛ ma, ma durunɛ sun-don min na ka a tɛgɛ Bato-Bɔnla tinyɛ ma, ma ni to wo le mala, wa?”

⁴ Woletɔ Mari Sɛnbɛ-Bɛɛ-Tigita sarakanɛ nara n ma.

⁵ A ko n ni a fɔ saraka-masɔlɛnu anubɛ mɔgɛ bɛɛ ye ko anu ya sunyɛ don min kɛ ka di a karɛ loli nyɔgɛ anubɛ a karɛ wɔrɔnfila nyɔgɛ ma san bi-wɔrɔnfilɛ kɛ kɔrɔ, anu ma wo kɛ ale Mari ye.

⁶ A ko fanan, anu taranta anu de-nyinina anubɛ minni kɛla, anu ya wo kɛ anu nyɛrɛta sewɛla ko la.

⁷ Wo tumɛ Yerusalɛm sabatinɛ, ado a lafanɛ mɔgɛnu na, Mari ya kuma kelan kɛ le fɔ ala fɔlɔ-nɛbinu ye nun. Wo wati rɔ, mɔgɛnu sigini ma soela foolɛ dɔrɔn tɔ. Anu siginɛ tala ha Iyipiti nyamanɛ dan la anubɛ gburukulinu bi kan min tele-yigi wara la.

Mɔgɛnu Bira Koe Ka A Tɛgɛ Kuma-Birabɛlitayɛ Ma

^8-9 Mari Sɛnbɛ-Bɛɛ-Tigi ya sarakanɛ kɛ le don nde, Sakaraya bolo tun. A ko bi-ko-ma wo la, a ya tɔn kɛnu di wole, ata mɔgɛnu ma. A ya a fɔ wati wo rɔ ko fɔ wo ni ko-latelennɛ kɛ ka kinikini wo nyɔgɔn ma.

¹⁰ A ya a fɔ fanan ko wo kana a ragbɛlɛya kɛɛ-musinu anubɛ kelennɛnu anubɛ sibolo-gbɛrɛnu kuma minnu siginɛ wo tɛma. A ko wo kana a lagbɛlɛya fugarɛnu fanan kuma. Wo kana wo miri ko-yogomɛ ma wo nyɔgɔn kan ma.

¹¹ A ko kɔnɔ wo ma sɔn wo tole masɔla a kuman-kan wo la. A ko wo ya wo tole gbere

¹² ka wo yisi gbɛlɛya iko kuri bawo a ko ale Mari Sɛnbɛ-Bɛɛ-Tigi ya ala nɛbinu nana ka wo karan min ma ata Niyi baraka rɔ, wo ma sɔn wo bira-koe ma. Woletɔ ale fonde bɔnɛ.

¹³ A ko wo ma sɔn wo tole sigila ata kumɛnu kɔrɔ, woletɔ a ma a wɔlɔ matɔlɔ wola madiyali-kannu na.

¹⁴ A ko wo le ya a ma, a tara wo ranyɛnsɛn nyamani-gbɛrɛkɛnu tɔ iko fɔnyɔ wa fen ranyɛnsɛn. A ya wola nyamani-hakikɛ kɛ rakolonya. A kasaranɛ tora pɔ!