Sakaraya 4 - ALLALA KUMƐ

Ko-Rayirɛ Loli Nyɔgɛ

Lɛnpu Yen-Koe

¹ Melika min bi ko-rayirɛ kɛ kɔrɛ yirala n na, wo nara n nakunden iko n bi kinɔgɔlɛ le tɔ nun.

² A ya n manyinika, a ko, “I ye nfen yenna kaka?” N ya a fɔ a ye ko, “Sɛnɛ-lɛnpu. A tulu-kɛ-tinɛ ye a kuma. A lamalan-tina wɔrɔnfila ye ala foolɛ rɔ. Saraba wɔrɔnfilɛ ye anu kelen-kelennamɛ-bɛɛ ma.

³ Ɔlifi kuru fila ye tulu-kɛ-tinɛ wo dafɛ, a tɔnkɔn filɛ rɔ.”

⁴ Wo kɔma, n ya ale melika manyinika, n ko, “N fa, kɛ wo kɔrɛ ye nfenna?”

⁵ Ale fanan ko, “I ma a lɔn?” N ko, “Ɔn-ɔn, n fa, n ma a lɔn.”

⁶ A ya a fɔ n ye ko, “Mari kolan wɔrɔnfilɛ min bi duninya mumɛ mafɛlɛnna, wonu tamasere le lɛnpu wɔrɔnfilɛ kɛ la.”

¹¹ Wo kɔma, n ya a manyinika tun, “Ɔlifi kuru filɛ kɛ, wonu kɔrɛ ye kama?

¹² Tuli ye bɔla ɔlifi-kɔn bolon filɛ minnu tɔ ka tenbi sɛnɛ-burinu tɔ ka ta tulu-kɛ-tinɛ, wonu fanan kɔrɛ ye kama?”

¹³ Ale fanan ko, “I ma a lɔn?” N ko, “Ɔn-ɔn, n fa, n ma a lɔn.”

¹⁴ A ko, “Mɔgɔ filɛ le kɛnu na duninya-mumɛ-tigi Mari ara minnu yabɔ ka ma ala wɔli-kɛlɛnu na.”

Lanyiri Kiri Koe Alla Bolo Sarababulu Ye

¹⁵ Ale melika min bi ko-rayirɛ kɛ kɔrɛ yirala n na, wo ya a fɔ n ye ko n ni Mari Sɛnbɛ-Bɛɛ-Tigita sarakanɛ latenbi Sarababulu ma ko a si a munanfaga. A ko kɛlɛ-dannuta fanka ma, a nyɛrɛta fanka ma kɔnɔ Marita sɛnbɛ le ye a mala, a ni a munanfaga.

⁷ A ko hali fan minnu kolo iko kɔnkɛ, wo si tunu Mansa Sarababulu yarɔ yen! Wo si ma iko lɛɛ. A ko ale Sarababulu si Bato-Bɔn sɔ-kura-kɛ tun, ado ale ye Bato-Bon-kuri laban sigila tele min ma, mɔgɛnu si a fɔ ko, “Alamɛ Marita duwɛ tora a kuma.”

⁸ Nde, Sakaraya ya Marita sarakani-gbɛrɛ lamɔɛn.

⁹ A ko Sarababulu ara ban Bato-Bɔn kurunna. A ko fɔ a wa a toe laban. Mari ko a wa a kundon tumɛ min, wo ye a lɔnna wo le ma ko ale le ya n sɔ wo ma.

¹⁰ A ko hali mɔgɛnu yisi tinyanta Bato-Bon-ko-wɔlɛla ko la bawo a sa tala yarɔ tiriya kɔnɔ anu ba a yen, a kun bara don Sarababulu bolo, anu si sewa dɔgɔma-ma-de!