Sakaraya 10 - ALLALA KUMƐ

Lanyiri Kiri-Koe Kisi-Koela Ko rɔ Mari Bolo

¹ Wo ni Mari matara ko a ni bandɛ lana a tumɛ rɔ, ado Mari ye a mala, bandɛ ye nala. Ale le ye bandɛ lanala hadama-dan ye alako ki-fannu ni ma-a-la wɔli-kɛ-tinɛnu tɔ.

² Mɔgɛnu si ta bɛsɛnu anubɛ bolo-tafɛlɛnnɛnu bara kɔnɔ anu sa fenfen namɔɛnna nyɔ fɔ kun-takolonya-kumɛ anubɛ foninyɛ. Kiyo-kɔrɔ-takarannɛ le donu na kɔnɔ anu sa fenfen kun na fɔ ka namɛ ladu wo ye. Anu bi wo yisi-kima-koe min fɔla, wo bɛɛ fu! Woletɔ mɔgɛ bɛɛ ye yilan-yilanna iko sagɛ min bara to-a-rɔ. Anu bi nanparan rɔ bawo anu fɛ-birala sa anu bolo mumɛ!

³ Mari ko minnu bi ala mɔgɛnu kun na mansayɛ la, a fonde tɔrɔnɛ a ma wonuna ko la. A ko fɔ a wa kun-tigi wonu tɔrɔ. Mari Sɛnbɛ-Bɛɛ-Tigi ko atɛ le Yuda mɔgɛnu na. A ko anu kumafɛlɛnnɛ le ale la. A ko a si anu ma mɔgɔ-makilannɛnu na iko soee-kɛlɛ-tatalɛnu.

⁴ A kun-tigi wo, a mɔgɔ-ba wo, a kɛlɛ-kurugba wo, a ko wonu dama si bɔ Yuda bɔnsɔn rɔ ka to ala mɔgɛnu kuma.

⁵ A ko anu si nɔ-ko sɔrɔn iko kɛlɛ-dan minnu si anu yogenu matɔrɔngba bore rɔ. A ko anu si kɛlɛ kɛ bawo ale Mari ye anu fɛ. Hali kɛlɛ-dan minnu siginɛ soee la, anu si wonu nɔ.

⁶ Mari ko a si a ma, Yuda mɔgɛnu ta ni gbɛlɛya. A ko a si Isirɛla mɔgɛnu kunyɛ bɔ gbaran rɔ. A ko a si kinikini anu ma ka na anu na anu barɛ tun. A ko a si ma iko a ma anu kɔn tele-kelen-bɛrɛni! A ko anuta Mari Alla le ale la. Ale le si anu madiyali-kan lamɔɛn.

⁷ A ko Isirɛla mɔgɛnu ta si gbɛlɛya iko kɛlɛ-kurugba-bananu. Anu si sewa iko baantoenu. Anu kegeyɛnu fanan si anu miri nɔ-ko-sɔrɔn-koe kɛ ma. Anu si sewa ka a tɛgɛ ale ara min ma.

⁸ Mari ko a si ala mɔgɛnu kele ka anu kundɛn kan-tina-kelen. A ko a si anu kunyɛ bɔ gbaran rɔ ka anu nasiyaya iko fɔlɔ.

⁹ A ko hali ale ara a ma, anu ta ara nyɛnsɛn sibolo-gbɛrɛnu tɛma, hali anu bi wula-yan wonu na, anu si anu miri ale ma. A ko anubɛ anuna dannu si to anu niyi la ha anu ni anu kɔ sɛgi anu nyɔgɔn fɛ.

¹⁰ Minnu bi Iyipiti anubɛ Asiriya nyamanɛ rɔ, a ko a si wonu nana anu barɛ. A ko a si a ma, anu ni na sigi anu barɛ nyamanɛ rɔ tun. A ko a si anu sigi Kaliyadi anubɛ Lɛbanan nyamanɛnu tɔ. A ko nyamanɛ wo mumɛ si fa mɔgɛnu na penpen!

¹¹ Ala mɔgɛnu ba wuli tɔrɔya-yi tɛgɛla, Nayɛli bɛ ye tugi min kɛla a rɔ anu kan ma, a ko ale nyɛrɛ si bɛ wo bira a rɔ a daga rɔ. A ni gbala todo! Asiriya min wasinɛ, a si wonu makimɛ. Iyipiti min kolo gbɛlɛ, a si wonu fanka latɛgɛ.

¹² A ko a si ala mɔgɛnu tagbɛlɛya. Anu si a bato ka a kan to a gbɛ rɔ. Ale Mari kan le kɛ la.