Ruti 4 - ALLALA KUMƐ

Ruti Furu Latɛgɛ-Koe

¹ Bowasi tara anuna kundɛn tinɛ soe tarɛ-don-dɛ dafɛ. A ya a sigi mɔgɔ-banu tɛma nyɔ. Kei min gbɛrɛnta Ruti benba Ilimilɛki ma ka tenbi Bowasi la, wo tenbimatoe, Bowasi ya wo kele, a ko, “N bɔ, na i mayigi yan de!”

² Kei wo nara a mayigi tumɛ min, Bowasi ya mɔgɔ-ba tan kele ko wonu ni kofu anu ma. Wonu fanan ya anu mayigi tumɛ min,

³ Bowasi ya a fɔ kei wo ye ko, “Neyomila nɛ ka bɔ Mohabu nyamanɛ rɔ, a sɔgɛ ye a la ka ma na-kelen-nyɔgɛ Ilimilɛkila dugi mayira.

⁴ A fisa, ile fanan ni ko lɔn wo rɔ. Ni a san-sɔgɛ ye i la, ile ni a san mɔgɔ-ba kɛnu yala. Ni a san-sɔgɔ sa i la, nde si a san kɔnɔ nyɔ-san-sereya ye i bolo ka tenbi nde la.” Kei wo ya a fɔ ko, “Tumado n bi nyinina a ma.”

⁵ Bowasi ya a fɔ a ye tun ko, “Awa, ni i ya dugi wo san Neyomi ma, a kin kɔnɔ i ni la a la fɔ i wa mala kɛɛ-musi Ruti bi, Mohabu dunmusi, kɔni, anubɛ dugi wo alako dugi wo kana bɔ furinɛta kebilɛ la.”

⁶ Kei wo ya a fɔ ko, “Nba, ni wo le, n ma la a la ni n bi a sanna bawo kɛɛ-dugi wo ti to nna dannu ye. Nde ara n bolo bɔ a rɔ. Ile ni a san.”

^7-8 Kei wo ya ala sanbarɛ kin kelan bɔ a kian rɔ ka a don Bowasi bolo. A ko, “Nba, ile ni dugi wo san.” (Wo wati rɔ, anuna sereya le kɛ la. Ni min bi a bɔla kebila-dugi do ma, sereya ye ale min bolo ka a sɔrɔn, a si ala sanbarɛ kin kelan bɔ a kian rɔ ka a don dugu-sannɛ wo bolo. Ni Isirɛla mɔgɛ minnu ya kɛ sufa ma dugu mayira tinɛ, wo si ma tamasere la ko anu tɛma-koe la ara kiri a kilɛ fɛ.)

⁹ Bowasi ya a fɔ mɔgɔ-ba wonu ye ko, “Wole ara ma sereyɛ la bi. Fan minnu bi Ilimilɛki bolo anubɛ ala den-kemini filɛ, Kaliyɔn anubɛ Malɔn bolo, n bara wo damasi san Neyomi ma bi.

¹⁰ Nba, min sanɛ wo kuma, Malɔn ya kɛɛ-musi min to a kɔma, Mohabu nyamanɛ dunmusi Ruti, wo ara to nde ye bi. Wo si a ma, furinɛ kɛnu bolo-fannu ni to anuna kebilɛ la. Woletɔ anu tɔgɛ ti tunu anuna kebilɛ la anubɛ anuna soe rɔ. Wole mɔgɔ-banu bara ma n sere la.”

¹¹ Mɔgɔ-ba wonu ya a fɔ ko, “Male ara ma i sereyɛ la.” Mɔgɔ-ba wonu ya duwɛ dabira Bowasi ye, anu ko, “Alamɛ ila musi Ruti yirita iko ma benba Yakobata musinu Resɛli anubɛ Liya yirita nya min. Alamɛ ile mara bana la Ɛfarati kebilɛ la ka ma tɔgɔ-tigi la Bɛtalehɛm soe kɛ rɔ.

¹² Iko Yakobala den-kei Pɛrɛsi yirita nya min Tema ya minnu sɔrɔn, alamɛ Alla ya den-siyamɛ di wobɛ Ruti ma wo nya na le.”

Neyomi Nyagalen-Koe Tun

¹³ Wo kɔma, Ruti tora Bowasi ye. A tara a la a warɛ bɔn la. Allata duwɛ yigira Ruti kuma. A ya buyi bi ka den-kei sɔrɔn.

¹⁴ Musinu ya a fɔ Neyomi ye ko, “Alla tanto! I wara i mamanɛ sɔrɔn bi min si i fɛ-bira. Alamɛ den-kei wo mara tɔgɔ-tigi la Isirɛla nyamanɛ kɛ rɔ. I di Ruti ye. Ale ara min ma i ye, wo tenbira den-kei wɔrɔnfilatɛ la.

¹⁵ A ara i mamanɛ min sɔrɔn kɛ la, i wara yigi-kurɛ sɔrɔn wo fɛ. I fɛ-biralɛ le wo la min si i niyi sa i fɛrɛ rɔ tun.”

¹⁶ Neyomi ya dan wo bi ka a sa a kɔnkɔn tɔ ka a fɛ-bira.

¹⁷ Nyɔ-musinu ya den-kurɛ wo tɔgɔ sa Obɛdi. Anu ya a fɔ soe kan tinɛ bɛɛ rɔ ko, “Neyomi ara a mamanɛ sɔrɔn, den-kei.” A mɛra ha, Obɛdi wo ya Yɛsi sɔrɔn. Yɛsi wo ya Mansa Dawuda sɔrɔn.

^18-22 Pɛrɛsi kebila-mɔgɛ le kɛnu na ka a dabira ale Pɛrɛsi ma ha ka ta a sigi Dawuda la. Pɛrɛsi ya Hɛsirɔn sɔrɔn Hɛsirɔn ya Rama sɔrɔn Rama ya Aminadabu sɔrɔn Aminadabu ya Neson sɔrɔn Neson ya Salaman sɔrɔn Salaman ya Bowasi sɔrɔn Bowasi ya Obɛdi sɔrɔn Obɛdi ya Yɛsi sɔrɔn Yɛsi ya Dawuda sɔrɔn.