Ruti 3 - ALLALA KUMƐ

Ruti Furi Rabɛn-Koe

¹ Wati tenbinɛ, Neyomi ya a fɔ Ruti ye ko, “Fɔ n ba kei nyini i ye alako i si taran furu-bon-nyimɛ la kan min.

^2-3 I wɔlita Bowasi minna wɔli-kɛlɛnu fɛ wo la, i ya a lɔn, nna kei na-kelen-nyɔgɛ do le wo la. N bi nala min fɔla i ye, i ni i hɛnkili to a ko ka wo ma. Ta i ku a kila-bɛrɛbɛrɛ fɛ ka i rabɛn yɔnyɔn, ka sɛnti-suma-diyamɛ kɛ i ma. Bi wurɛ la, i si a taran, Bowasi ye ala fui-fan gbesila. Kɔnɔ i wa ta nyɔ, Bowasi kana a lɔn mumɛ ko i ye nyɔ ha a si ban fen-dɔn-kɛla. Anu ba ban fen-dɔn-kɛla,

⁴ i ni a lakɔrɔsi ka a ki-tinɛ lɔn. A wa ban kinɔgɔla tumɛ min, i si ta ala birinkan kɔrɔbi. I ni i rasagan a kian dugu la. Ile si min ma wo rɔ, a si wo fɔ i ye.”

⁵ Ruti mama ya min bɛɛ fɔ a ye, a sɔnta wo ma.

⁶ Ruti tara gbere ma iko a mama ya a fɔ a ye nya min.

⁷ Bowasi banta fen-dɔn-kɛla ka a kan lakimɛ tumɛ min, a nyagalenta ka ta a sa dɔn-fen-senda-siginɛ dafɛ. A kinɔgɔra tumɛ min, Ruti tara a fɛrɛ ma dɔidɔi! A ya Bowasila birinkan kɔrɔbi ka a rasagan a kian dugu la.

⁸ Su-talɛ gbɛrɛnnɛ, Bowasi kundenta, a ya a yɛlɛma, a tɛrɛnara musi la nyɔ.

⁹ Bowasi ya a manyinika ko, “Yon bi kɛ la?” Ruti ya a yabi ko, “N fa, ila wɔli-kɛlɛ Ruti le. Bawo nna kei na-kelen-nyɔgɛ le ile la, ile le ye n dunɛ bila gbɛ! I yandi, n furu.”

¹⁰ Bowasi ya a fɔ a ye ko, “Alamɛ i ya Marita duwɛ sɔrɔn. I ya i mama fɛ-bira nya min wo, i ya min fɔ n ye kɛ la wo, wo ya a yira ma la ko mala kebilɛ di i ye. A mara bolo-kolɔn la, a mara fen-tigi la, i ya ma bɔ kemini-mɛsɛ-gbɛrɛkɛ la.

¹¹ So-burɔ-mɔgɛ bɛɛ ya a lɔn ko musu-hakikɛ le ile la. I ya ko-wo-ko manyinika, n si wo ma, woletɔ i kana hɔn fenfenna ko la.

¹² I ya min fɔ, tonyɛ le wo la ko mabɛ ila kei gbɛrɛnnɛ ma nyɔgɛ ma kɔnɔ n na-kelen-nyɔgɛ do ye nyɔ anubɛ min gbɛrɛnta anu nyɔgɔn ma ka tenbi nde la.

¹³ I sa ha bandɛ ni ka. Banda wa ka, n si ta wo manyinika ni ale si sɔn i la. Ni a sɔnta i la, min kin, wo le wo la. Kɔnɔ ni a ma sɔn i la, n bara n keli Alla nimɛ rɔ ko nde si i furu. I sa yan ha bandɛ ni ka.”

¹⁴ A sani tora nyɔ ha banda-ka-da-pinpi ma. Yanni waan ra ni ka, Ruti ya a lasɔ bawo a ma di Bowasi ye mɔgɛ ni a lɔn ko musi do kira a kuma.

¹⁵ Kɔnɔ yanni a ni ta, Bowasi ya a fɔ a ye ko, “Ila kurɛ do rasa dugi ma.” Bowasi ya dɔn-fan min wuya kurɛ wo rɔ, a tora doni, a ni ke pani-nya bi-nanɛ rɔ. A ya Ruti layɛlɛ dunɛ wo la. A tara dunɛ wo la a mama wara soe!

¹⁶ A ke a mama ma bɔn la, a mama ya a manyinika ko, “Nfen bɔra ila tagama rɔ? Bowasi ya i bira kama?” Koe min bɛɛ mara tagama wo rɔ, Ruti ya wo dantɛgɛlɛ sa.

¹⁷ Min sanɛ wo kuma, a ya a fɔ a mama ye ko, “A ya a fɔ n ye ko n bolo lakolɔn kana na, woletɔ a ya dɔn-fan kɛ mumɛ di ma ma.”

¹⁸ A mama ya a fɔ a ye ko, “I mun tun. Bowasi ti a sigi bi fɔ a wa ban ila ko-nya rabɛnna.”