Ruti 2 - ALLALA KUMƐ

Rutila Sangban-Matɔnbɔn-Koe Bowasita Sɛnɛ Rɔ

¹ Neyomila kei kebila-mɔgɛ do ye nyɔ, nɔnfuli ye a bolo anubɛ fanka. Kei wo tɔgɛ le Bowasi.

² Lunyɛ do, Ruti ya a fɔ a mama Neyomi ye ko, “N mama, a sɔgɛ ye n na, n ni ta sangban matɔnbɔn tinɛ. N lara a la ko n si mɔgɛ do taran nyɔ min si sɔn n ni bila a fɛ.” Neyomi sɔnta a ta-koe ma.

³ Woletɔ Ruti fanan tara wɔli-kɛlɛnu fɛ sɛnɛ rɔ. A donta sangban-matɔnbɔn rɔ mɔgɛnu gba ma. Yaga, a tara Bowasila sɛnɛ le tɔ wo la.

⁴ A ma mɛ wo kɔma, Bowasi fanan nara ala wɔli-kɛlɛnu gba ma sɛnɛ rɔ ka bɔ Bɛtalehɛm. A ya anu wɔlɛ bɔ, a ko, “Alamɛ Alla tora wo fɛ.” Anu fanan ya a labira, anu ko, “Alamɛ Alla tora ile fanan fɛ.”

⁵ Bowasi ya wɔli-kunyɛ manyinika ko, “Yonna mɔgɛ le musi wo la?”

⁶ Wɔli-kunyɛ wo ya a fɔ Bowasi ye ko, “Neyomi le nara a la ka bɔ Mohabu nyamanɛ rɔ.

⁷ Kɔnɔ a ya n madiya ko a ni na sangban matɔnbɔn tinɛ ma gba ma. A nara subaga ka wɔlɛ dabira. A bɔ-san le tala a sigila toge kɔrɔ a sulen tinɛ.”

⁸ Bowasi ya a madon Ruti la ka a fɔ a ye ko, “Nna den, i tole masɔ n na. N ni sikɛ bɔ i rɔ. I kana ta sangban matɔnbɔn tinɛ mɔgɔ-wo-mɔgɔ warɛ tun fɔ yan. Ta musi kɛnu kurun tɔ. I ni to wɔlɛla anu gbɛ ma sangban matɔnbɔn tinɛ.

⁹ N bara wɔli-kɛlɛnu makawandi ko anu kana i lafɛya. I kan la wa gbala tuma-wo-tuma, i ni ta i min wɔli-kɛlɛnuna yi la.”

¹⁰ Ruti ya a nyɛnkin ka a madu Bowasi kɔrɔ. A ya a fɔ a ye ko, “Nfen bi nna kinikinɛ donna i yisi rɔ? Nfen bi a mala, i ye ko-nyimɛ mala nde sibolo-gbɛrɛ ye?”

¹¹ Bowasi ko, “Ka a bi ila kei faga-wati ma ha ka a sigi kaka la, i wara ko-nyimɛ min bɛɛsi ma i mama ye, n bara wonu namɔɛn. I ya i fa anubɛ i na boloka nya min, n bara wo lɔn. I bɔra ila nyamanɛ rɔ nya min ka na i sigi ma tɛma yan i ma mɔgɔ lɔn kan min, wo ara fɔ n ye.

¹² Alamɛ Mari ya i sara wo la. I wara na Isirɛla mɔgɛnuta Mari Alla wara ka don a kanban kɔrɔ i kisi-koe la. Alamɛ Alla ya i sara boi!”

¹³ Ruti ko, “N fa, hali n sa iko ila wɔli-kɛlɛnu, i wara kuma n ye nya min kɛ la, wo ara n hɛnɛ feu! Tabarakala i ma boi!”

¹⁴ Kɔndɔn-dɔn-wati kenɛ, Bowasi ya a fɔ Ruti ye ko, “N bɔ, na biredi do bi anubɛ nɔnbɔ-gbɔ-sugunnɛ.” A tora biredi kɛ le dɔnna, Bowasi nara dɔnta-gbɛrɛkɛ la ka wo di a ma. Ruti ya a dɔn ha a fara. A ya a toe to.

^15-16 Ruti tanɛ sangban matɔnbɔn tinɛ tun, Bowasi ya ala wɔli-kɛlɛnu kele ka a fɔ anu ye ko, “Hali a ya a gbɛrɛn wola kirinu ma, wo kana a yisi-magboya-kumɛ fɔ. Min sanɛ wo kuma, wo si do bɔ kirinu na ka wonu to sangban rɔ ale ye.”

¹⁷ Ruti tora sangban-matɔnbɔn la ha wurɛ la. A ya a tɛn tumɛ min, a tora doni, a ni ke pani-nya mogan rɔ.

¹⁸ Ruti ya dunɛ wo bi ka ta a yira a mama la. A ya ala kɔndɔn-toe wo bi ka a di a mama ma.

¹⁹ A mama Neyomi wo ya a manyinika ko, “I ya kɛ dama sɔrɔn kama? I bɔra kɛ la yonna sɛnɛ rɔ? Sɛnɛ-tigi min bara hɔn i la ka, alamɛ Allata duwɛ yigira wo kuma.” Ruti ya a fɔ a ye ko, “N ya sangban-matɔnbɔn kɛ Bowasila sɛnɛ le tɔ.”

²⁰ Neyomi duwara Bowasi ye ko, “Alamɛ Marita duwɛ yigira Bowasi kuma. Ma ara a yen Mari ara ata lanyiri latɔnbagaya furi anubɛ kɛndɛwaganu ye nya min. Nba, min ya kɛ di i ma kɛ la, nna kei na-kelen-nyɔgɛ do le wo la min si ma dunɛ bi gbɛ!”

²¹ Ruti ya a fɔ a mama ye ko, “Ado nfan, a ko n ni to anu gba ma nyɔ ha dɔn-fen-tɛgɛ-wati ni ban.”

²² A mama ya a fɔ Ruti ye ko, “Tonyɛ le wo la, ni i wɔlita Bowasila wɔli-kɛla-musumɛnu fɛ, a si fisaya i bolo. Tumado, ni i tara mɔgɔ-gbɛrɛkɛta sɛnɛ rɔ, wonu si i gboyana-koe telen i la.”

²³ Ruti tora siginɛ a mama fɛ ha anu banta Bowasila sangban-matɔnbɔn la.