Romu 6 - ALLALA KUMƐ

Ka Faga Hakɛ Rɔ—Ka Nimayɛ Kɛ Kirasiti Rɔ

¹ Ma si nfen fɔ worɔ? Ma ni to hakɛ kɛla alako Allala hinɛ ni wara, wa?

² Ade! A manɛ iko ma ara faga alako hakɛ kana sɛnbɛ sɔrɔn ma kuma tun. Ma si to hakɛ kɛla kama worɔ tun?

³ Ado nfan, wo ya kɛ lɔn serr, ko ma dɛnkɛninyara Yisa, Allata-Mɔgɔ-Yabɔnɛ ma tumɛ min ka batasi a tɔgɛ rɔ, mabɛ wo mara mɔgɔ kelen na ala sayɛ fɛ.

⁴ Ma batasira tumɛ min, mabɛ Yisa togonta ma nyɔgɔn fɛ. Wo le, iko Kirasiti wulita nya min ka bɔ furinu tɛma ma Fa Allata gbiliyɛ anubɛ sɛnbɛ fɛ, male fanan ni to ni-kurɛ rɔ wo nya na le.

⁵ Ado nfan, mabɛ Yisa fagara ma nyɔgɔn fɛ min kɛ, ma si wuli iko a wulita nya min,

⁶ ado ma ya a lɔn ko ma sɔn-kɔrɛ wo, wo ara faga Kirasiti fɛ ata kɔlɔma ma. Wo mara le alako hakɛ kana sɛnbɛ sɔrɔn ma kuma tun ka ma to hakɛ-yɔɔnyɛ kɔrɔ.

⁷ Ni mɔgɔ fagara wati min, wo tigi ara hɔrɔya hakɛ-sɛnbɛ ma.

⁸ Mabɛ Kirasiti fagara ma nyɔgɔn fɛ min kɛ, ma lanɛ a la ko mabɛ ale si na nimayɛ kɛ fanan ma nyɔgɔn fɛ,

⁹ ado ma ya a lɔn ko Kirasiti ara wuli ka bɔ furinu tɛma. A ti faga tun mumɛ! Sɛnbɛ sa sayɛ bolo ale kuma hali!

¹⁰ Ata fagɛ kelan wo ara a ma, hakɛ ti nɔ-ko sɔrɔn a ma. A ye a niyi la kaka alako a ni Alla sako kɛ.

¹¹ Wo ni wo miri wo nyɛrɛ ma iko wo faganɛ, woletɔ hakɛ ti nɔ-ko sɔrɔn wo ma. Wo ni Alla sako kɛ kaka Kirasiti baraka rɔ.

¹² Wo kana sɔn, hakɛ ni nɔ-ko sɔrɔn wo ma alako wo ni to wo nyɛrɛ wasala wo diyana-koenu tɔ.

¹³ Wo kana wo nyɛrɛ bagbuyi lasɔnnaya hakɛ ye. Fɔ ka wo nyɛrɛ lasɔnnaya Alla ye telenbagaya-kɛ-tinɛ bawo wo ara bɔ sayɛ rɔ ka sɛgi nimayɛ rɔ,

¹⁴ ado nɔ-wo-nɔ sa hakɛ bolo wo kuma tun bawo wo sa Nɛbi Musata tɔnnu kɔrɔ tun fɔ Allata hinɛ.

Telenbagayɛta Yɔɔnyɛ

¹⁵ Nba, a ye kama worɔ? Ma ye Allala hinɛ kɔrɔ min kɛ, ma sa tɔn kɔrɔ tun, ma ni to hakɛ kɛla worɔ, wa? Ade!

¹⁶ Ado nfan, wole ya a lɔn ko wo wa wo nyɛrɛ lasɔnnaya iko yɔɔn ka mɔgɛ dola kumɛ bira, wo ara ma yɔɔn la kun-tigi wo ye. Ni wo tora hakɛ kɛla, wo si ma yɔɔn la hakɛ kɔrɔ, min si a laban sayɛ ma, ni wo ma, wo si ma Allala yɔɔn la ala kuma-birɛla ko la, min si a laban ko-latelennɛ ma Alla ye.

¹⁷ Fɔlɔ-nun, wo ye yɔɔnyɛ rɔ hakɛ kɔrɔ kɔnɔ kaka, ma si Alla tanto! Wo ara karan min sɔrɔn Alla wara-koe rɔ, wo ye wo birala wo yisi bɛɛ la.

¹⁸ Nba, wo ara hɔrɔya hakɛ ma ka ma yɔɔn la telenbagayɛ ye.

¹⁹ (N ya yɔɔnya-koe ma misalɛ la wo ye bawo wo si wo le nya-yen, ado wo rafaganɛ Alla wara-koe rɔ.) Fɔlɔ-nun, wo ya wo nyɛrɛ to ko-yogomɛ anubɛ sɔn-yogoyɛ kɔrɔ iko yɔɔn. Kɔnɔ kaka, fɔ wo ni wo nyɛrɛ to ko-sɛnimɛ anubɛ telenbagayɛ kɔrɔ iko yɔɔn alako wo si ma Allata mɔgɔ-kɛndɛnu na nya min.

²⁰ Wo ye hakɛ-yɔɔnyɛ kɔrɔ tumɛ min, Alla diyana-koe bɔrɔbɔnɛ wo ye.

²¹ Wo ya koe minnu ma fɔlɔ-nun, wo miliyanɛ minnu na kaka, wo ya nfen tɔnɛ sɔrɔn wonu tɔ? Wonuna ban le sayɛ la.

²² Kɔnɔ kaka, wo ara hɔrɔya hakɛ ma ka ma Allala yɔɔnnu na. Woletɔ wo si tɔnɛ min sɔrɔn, wo le sɛninyɛ la Alla ye, ado tɔ-a-la, wo si habadan-nimayɛ sɔrɔn.

²³ Hakɛ sarɛ le sayɛ la kɔnɔ Allala sanbɛ le habadan-nimayɛ la ma Mari Yisa, Allata-Mɔgɔ-Yabɔnɛ baraka rɔ.