Romu 3 - ALLALA KUMƐ

¹ Ka sɔrɔn Yahudiyayɛ rɔ, wo si nfen nyinya mɔgɔ ma worɔ? Kemininyɛ si nfen nyinya mɔgɔ ma?

² A tɔnɛ kolo a nya ma! A fɔlɔtɛ, Alla ya ala sarakanɛ don Yahudiyanu denu bolo.

³ Kɔnɔ Yahudiyanubɛ Alla ya sarama-kan min kiri, ni Yahudiyanu bara anutɛ tinya, wo ti a ma, Alla ni atɛ tinya, wa?

⁴ A sa wo nya hali! Hali mɔgɛ bɛɛ mara foninya-fɔlɛ la kɔnɔ Allatala wo telenta. Iko a sɛbɛnɛ Allala kitabu do rɔ nya min, a ko, “Tonyɛ ye i bolo kuma tinɛ. Yoe ye i bolo kiti bɛɛ kun na.”

⁵ Ni mala telenbɛlitayɛ ya Allala telenbagayɛ labɔ gbɛ rɔ, wo ye kama? Ma si nfen fɔ worɔ? Mɔgɛnu bi kɛ le fɔla, yɔ! Ni Alla ya ma yiliki, ma si a fɔ ko a ma telen, wa?

⁶ Ade! Ni Alla ma telen, a si duninya kiti kama?

⁷ Tumado, donu bi a fɔla ko, “Ni nta foninyɛ ye Alla gbiliyala ka ala tonyɛ labɔ gbɛ rɔ, nfenna ko la Alla ye n yilikila iko hakɛ-tigi?”

⁸ Ni tonyɛ le wo la, fɔ ma wa ko-yogomɛ kɛ alako ko-nyimɛ ni bɔ gbɛ rɔ. Minnu bi wo fɔla, a bɛnta, wonu ni yiliki sɔrɔn, ado mɔgɛ donu bi a fɔla ko nde, Pɔli fanan bi kɛ le fɔla serr!

Mɔgɔ Kelen Sa min Telennɛ

⁹ Kɛ ye kama? Male Yahudiyanu fisa sibolo-gbɛrɛnu ko, wa? Ade! Ma ara ban a labɔla gbɛ rɔ ko a Yahudiya wo, a sibolo-gbɛrɛ wo, hakɛ ara sɛnbɛ sɔrɔn ma bɛɛsi kun na.

¹⁰ Iko a sɛbɛnɛ Allala kitabu rɔ nya min ko, “Hali mɔgɔ kelen sa min telennɛ,

¹¹ hali kelen sa min si ko nya-yen. Wo mɔgɔ sa min si Alla nyini.

¹² Mɔgɛ bɛɛ ara a kan-kɔ sɔ Alla la. Anu dama ara to telenbɛlitayɛ rɔ. Mɔgɔ-den-kelen sa min si ko-nyimɛ kɛ.

¹³ Anuna darɔ-gboyɛ manɛ iko kanba-lakanɛ. Fenfen sa anu da rɔ fɔ yanfanteya-kumɛnu. Niyi-ragbɛrɛn-kumɛnu bi bɔla anu da rɔ iko duguma-fen-marɛ.

¹⁴ Anu dɛ burɛ lafanɛ dankali-yogomɛnu na.

¹⁵ Anu natiri mɔgɔ-tanban anubɛ mɔgɔ-fagɛ la.

¹⁶ Anu ba tenbi kan min, fenfen ti to anu kɔma fɔ kasarɛ anubɛ mɔnɛ gbansan!

¹⁷ Yisi-kima ti taran anuna foolɛ rɔ!

¹⁸ Kilan sa anu tɔ Alla wara la muk!”

¹⁹ Nba, ma ya a lɔn ko minnu bi Allata tɔn wara-koe kɔrɔ, tɔn-kitabu kɛ sɛbɛra wonu denu ye. Wo sɛbɛnɛ alako mɔgɛna masigima-fɔɛ ni ban ka duninya-mɔgɛ bɛɛ lana Allala kiti kɔrɔ,

²⁰ ado hali mɔgɔ ya a raya tɔn-bira-koe ma, wo tigi ti ma mɔgɔ-telennɛ la Alla yala mumɛ! Tɔn-kitabu wo sɛbɛra le alako bɛɛ ni hakɛ-kɔrɛ lɔn.

Mɔgɔ Latelen-Nya Alla Bolo

²¹ Kɔnɔ kaka, Alla si mɔgɔ latelen a nyɛrɛ ye nya min, wo ti ma tɔn-birɛ fɛ mumɛ! Mɔgɛ si telen Alla ye nya min, Nɛbi Musala tɔn-kitabu anubɛ nɛbinuta kitabunu ya wo ragbɛ ma ye.

²² A si bɛɛ latelen dɛnkɛninyɛ fɛ Yisa, Allata-Mɔgɔ-Yabɔnɛ ma, kɔni. Mɔgɛ bɛɛ kelen Alla ya la bawo

²³ ma bɛɛsi ara hakɛ kɛ, ado Alla ara gbiliyɛ min tabɛn ma ye, ma ara foo wo la.

²⁴ Bɛɛ ara telen Alla ye ata keninteya-wɛ baraka rɔ. Sanbɛ le wo la mɔgɔ ti ke min sanna. Ma bɛɛ si na hɔrɔya hakɛ bolo Yisa, Allata-Mɔgɔ-Yabɔnɛ baraka rɔ.

²⁵ Alla ya ale Yisa ma hakɛ-sarakɛ la alako a ni mɔgɛnuna hakɛ makoto ata sayɛ fɛ. Min ba dɛnkɛninya wo ma, wo tigi la si telen Alla yala worɔ. Fɔlɔ-nun, Alla ya a mun mɔgɛnuna hakɛ kɔrɔ

²⁶ kɔnɔ kaka, a ye mɔgɛnuna hakɛ makotola alako ata telenbagayɛ ni bɔ gbɛ rɔ, ado minnu bara dɛnkɛninya Yisa ma, a ara wo bɛɛ latelen.

²⁷ Nyɛrɛ-matɔgɛ sa kɛ fenfen tɔ bawo Alla ma ma latelen a nyɛrɛ ye tɔn-birɛ fɛ. Ka a tɛgɛ mata dɛnkɛninyɛ ma Yisa ma, a ara ma latelen a nyɛrɛ ye,

²⁸ ado ma ara a yen worɔ ko mɔgɛnu na ara telen Alla ye dɛnkɛninyɛ fɛ. Ma la ma telen tɔn-birɛ fɛ de!

²⁹ Alla ye Yahudiyanu denu dɔrɔnna ko la, wa? Sibolo-gbɛrɛnu fananta Alla ma ale la? Wonutɛ le ale fanan na.

³⁰ Alla kelen de! A si ma bɛɛ latelen a nyɛrɛ ye dɛnkɛninyɛ fɛ, a Yahudiya wo, a sibolo-gbɛrɛ wo.

³¹ Dɛnkɛninyɛ si tɔn-kitabu wara-koe ma fuyi la worɔ? Wo ma de! Dɛnkɛninyɛ le si a ma, ma ni tɔn-kitabu gbiliya kati!