Romu 2 - ALLALA KUMƐ

Allala Kiti-Tɛgɛ-Telennɛ Wara-Koe

¹ N diyana-mɔgɛnu, wo ye wo dɛ bilala mɔgɛnuna koe rɔ kɔnɔ wo wa wo bɔnu yiliki tumɛ min, wo ara wo nyɛrɛ le yiliki wo la. Masigima-kuma sa wo bolo worɔ! Ni wo ya a yen n bi wo fɔla bawo anu denu bi min mala, wole nyɛrɛ fanan bi wo le mala.

² Ma ya a lɔn ko minnu bi ko-sufa kɛnu mala, yoe ye Alla bolo ka wonu kiti.

³ Kɔnɔ n bɔnu, wole min bi wo dɛ bilala mɔgɛnuna koe rɔ, wole nyɛrɛ ye ko-sufa wonu mala. Wo miri ko wo si porokɔlɔ Allala kiti kɔrɔ, wa?

⁴ Allala nyimayɛ wo, ata dinyɛ wo, anubɛ ata munyu-waranɛ wo, wo ara tɛgɛ wonu tɔ, nyɛ? Ko Alla ye ko-nyimɛ kɛla wo ye alako wo ni tubi a ma, wo ma wo lɔn, ba?

⁵ Kɔnɔ wo yisi gbɛlɛ, ado wo bannɛ tubi-koe ma feu! Woletɔ Allala diminyɛ anubɛ ala kiti wa bɔ gbɛ rɔ tumɛ min, wo si wola tɔrɔyɛ makofu wulɔn le

⁶ bawo Alla si mɔgɛ bɛɛ sara kelen-kelenyɛ ma anuna kɛwɔlɛla ko la.

⁷ Mɔgɛ donu bi bonyɛ anubɛ gbiliyɛ anubɛ habadan-nimayɛ nyinina Alla bolo min kɛ, woletɔ anu si to ko-nyimɛ kɛla dɛɛ! Tonyɛ le wo la, Alla si habadan-nimayɛ di wonu denu ma.

⁸ Kɔnɔ donu si anu nyɛrɛ keni dɔrɔn ka anu ban ko-telennɛ-kɛ-koe ma. Koe minnu ma telen, anu bilanɛ wonu denu fɛ. Alla si ala diminyɛ anubɛ ala mɔninyɛ rawuya wonu kuma.

⁹ Tɔrɔyɛ anubɛ diminyɛ si bui ko-yogoma-kɛlɛ bɛɛ ma, a Yahudiya wo, a sibolo-gbɛrɛ wo.

¹⁰ Kɔnɔ Alla si bonyɛ anubɛ gbiliyɛ anubɛ yisi-kimɛ di ko-nyima-kɛlɛ bɛɛ ma, a Yahudiya wo, a sibolo-gbɛrɛ wo,

¹¹ ado Alla ti mɔgɔ do lafisaya do ko.

¹² Alla ya tɔn-kitabu min di Nɛbi Musa ma, sibolo-gbɛrɛnu sa tɔn-kitabu wo kalama. Hali anu sa wo kalama, anu si halaki anu nyɛrɛta ko-yogomɛla ko la, ado Yahudiya minnu bi tɔn-kitabu wo kalama, wonu fanan bi ko-yogomɛ kɛla. Wo le ya a to, anu denu fanan bi halakila tɔn-tinyɛ wola ko la.

¹³ Ka tɔn-kitabu wara-koe lamɔɛn dɔrɔn, wo ti mɔgɔ latelen Alla ye. Kɔnɔ ka ata tɔn-kitabu bira, wo le si mɔgɔ latelen Alla ya la.

¹⁴ Yahudiya ma minnu na, wonu sa Nɛbi Musata tɔn-kitabu kalama. Kɔnɔ anu ba ko-latelennɛ kɛ iko tɔn-kitabu ya a fɔ nya min, wo si a yira ko min telenta, anu bi wo kalama. Min ma telen, anu bi wo fanan kalama.

¹⁵ Anu kɛ-nya si a yira ko tɔn-kitabu wara-koe sɛbɛnɛ anu yisi rɔ. Anu sɔndɔmɛ fanan bi sereyɛ bɔla ko tonyɛ le wo la. Wo ye mala bawo wati do, anu nyɛrɛ miriya si anu yiliki. Wati-gbɛrɛ, anu miriya si anu fɛka.

¹⁶ Dogonta-koe min bɛɛsi ye mɔgɔ yisi rɔ, Alla si wo bɛɛ kiti Yisa, Allata-Mɔgɔ-Yabɔnɛ bolo kiti-tɛgɛ-wati iko a fɔra kibara-nyimɛ rɔ nya min, ado n bi wo le kawandili bɔla.

Yahudiyanu anubɛ Allata Tɔn Kitabu

¹⁷ Wole don? Wo ye wo nyɛrɛ kelela ko Yahudiyanu. Wo ye wo yigi bɛɛ sala tɔn-kitabu wara-koe kuma ka wo nyɛrɛ matɔgɔ ko Allatɛ le wo la.

¹⁸ Alla ye a fɛ, wo ni min ma, wo ya wo lɔn bawo wo ara ko-latelennɛ wo karan tɔn-kitabu rɔ.

¹⁹ Wo ya wo nyɛrɛ lɔn fiyon-bolo-biralɛ le la, ado wo miri ko wo ye waan rakala pinpirɔ-mɔgɛnu denu ma.

²⁰ Wole miri fanan ko sɔn-yogoma-tiginu anubɛ ko-lɔnbɛlɛnu karan-mɔgɛ le wole la. Allata tɔn-kitabu ye wo bolo min kɛ, wo miri ko lɔnnɛ anubɛ tonya-bɛrɛ ye wole le bolo.

²¹ Wo ye donu karanna, nfenna wo ti wo nyɛrɛ karan? Wo ye kawandili bɔla ko, “Mɔgɔ kana kankanyɛ kɛ,” kɔnɔ wole don? Wo sa kankanyɛ kun na?

²² Wo ko, “Mɔgɔ kana yɛlɛnyɛ kɛ,” kɔnɔ wole don? Wo sa yɛlɛnyɛ kɛla? Wo ko bɛsi-kɔɛ ma di wo ye kɔnɔ wo sa kankanyɛ kɛla bɛsi wonu kɔ tinɛnu tɔ?

²³ Wo ye wo nyɛrɛ matɔgɔla ko Allala tɔn-kitabu ye wole le bolo kɔnɔ wole don? Wo sa Alla lamiliyala wola tɔn-tinyɛ fɛ, wa?

²⁴ Ado nfan, a sɛbɛnɛ Allala kitabu rɔ ko, “Ka a tɛgɛ wole Yahudiyanu sɔn ma, sibolo-gbɛrɛnu bi Alla rasɛla.”

²⁵ Ni minnu ya tɔn-kitabu wara-koe bira, anuta kemininyɛ si ko nyinya anu ma. Kɔnɔ ni minnu ma tɔn-kitabu wara-koe bira, a fisa, anu bilakore ni to nun.

²⁶ Sibolo-gbɛrɛ minnu kemininyani ma, ni wonu ya tɔn-kitabu wara-koe bira, Alla si anuna kemininyabɛlitayɛ wo yɛlɛma anu ye kemininyɛ la.

²⁷ Wole Yahudiyanu, hali wo kemininyara, wo si miliya sibolo-gbɛrɛnu ye bawo wole ye Nɛbi Musata tɔn-kitabu tinyana, hali wo ye tɔn-kitabu wo kalama. Anu denu kemininyabɛlɛ kɔnɔ anu bi tɔn-kitabu wara-koe birala.

²⁸ Bagbuyita-kemininyɛ dɔrɔn ti mɔgɛ ma Yahudiya-bɛrɛ la bawo kemininya-bɛrɛ sa mɔgɛ fɛrɛ ma.

²⁹ Kɔnɔ Yahudiya-bɛrɛ le wo mɔgɛ la min telennɛ Alla ye. Woletɔ kemininya-bɛrɛ ye mɔgɔ-yisi le tɔ. Allala Ni-Sɛnimɛta wɔlɛ le wo la. Tɔn-birɛ mako sa wo la. Yahudiya-bɛrɛ si matɔgɔlɛ sɔrɔn Alla bolo. A ti a sɔrɔn mɔgɛ bolo.