Romu 12 - ALLALA KUMƐ

Ma Niyi Di-Koe Alla Ma

¹ Nba, n na-kelen-nyɔgɛnu, ka a tɛgɛ Allata kinikini-belebele-wɛla ko ma male ye, n bi wo madiyala ko wo ni wo nyɛrɛ ma saraka-nimɛ la Alla ye. Wo sɛninyanɛ ni taran Alla yala ka a kɔntɔ-diya-koenu kɛ. A bato-nya-bɛrɛ le wo la wo si min ma.

² Wo kana wo raya ka wo nyɛrɛ kɛnya duninya kɛ koenu ma fɔ wo ni sɔn ko Alla ni wo sɔndɔmɛ yɛlɛma ka hɛnkili-kurɛ di wo ma. Wo si a ma, wo ni ke Alla sako lɔnna. Alla ye nyinina min ma, wo kin, wo si a diya don a rɔ, ado mɔgɛ ti ke fɛɛ yenna a la.

³ Alla ara n kɔ ata hinɛ rɔ alako n ni kɛ fɔ wo kelen-kelennamɛ-bɛɛ ye. Wo kana wo miri wo nyɛrɛ ma ko wo nyɔgɔn sa. Min fisa, wo ni wo famayigi wo miriya rɔ. Alla ara dɛnkɛninyɛ min nyɔgɔn di wo ma, a bɛnta, wo kelen-kelennamɛ-bɛɛ ni wo lɔn wo nyɛrɛ ma.

⁴ Ma bagbuyi faranɛ sigi-tina-siyaman na, ado wo bɛɛta wɔlɛ ye a dan na.

⁵ A ye wo nya na le fanan male dɛnkɛninya-mɔgɛnu tɛma. Hali ma siya, bagbu kelen de ma la Kirasiti rɔ. Ma dama latugunnɛ bagbu kelan wo la.

⁶ Woletɔ Alla ara hinɛ min nyɔgɔn di ma ma, ma ni mala sanbɛnu nawɔli wo nya na le worɔ. Ni mala sanbɛ le ka Allala kilayɛ lake, ma ni wo ma iko mala dɛnkɛninyɛ ye nya min.

⁷ Ni matɛ le ka mɔgɛnu dɛnbɛ, ma ni wo ma. Ni karan le, ma ni karan kɛ.

⁸ Ni mala sanbɛ le ka donu sɛnbɛ don, ma ni wo ma. Ni nɔnfuli ye min bolo ka donu kɔ, ma ni wo ma ma yisi bɛɛ la. Ni mata sanbɛ le kun-tigiyɛ la, ma ni wo kɛ a kilɛ fɛ. Ni mata sanbɛ le ko-nyima-kɛ la, ma ni a kɛ sewɛ la.

⁹ I ni keninteyɛ yira mɔgɛnu na i yisi bɛɛ la. Bɛɛ ni ko-yogomɛ kɔn. Min kin, wo ni kiri wo le ma.

¹⁰ Wo ni wo nyɔgɔn keni a kilɛ fɛ iko na kelannu Kirasiti rɔ. Bɛɛ ni anu nyɔgɔn gbiliya ka tenbi a nyɛrɛ la.

¹¹ Wo ni wola wɔlɛ kɛ bɛrɛkɛ! Mɔgɔ kana tinya-mansayɛ kɛ. Wo ni wɔli Mari ye wo yisi bɛɛ la sewɛ rɔ.

¹² Yigi min bi wo rɔ, wo ni wo mara sewɛ rɔ. Wo ni wo munyu wola tɔrɔyɛnu kɔrɔ ka Alla madiya tumɛ bɛɛ.

¹³ Dɛnkɛninya-mɔgɔ bolo-kolɔn minnu bi wo tɛma, wo ni hɔn wonu na. Wo ni sundannu tabira.

¹⁴ Minnu bi wo niyi ragbɛrɛnna, wo ni duwa anu ye. Wo kana anu danka fɔ ka duwa anu ye.

¹⁵ Sewa wonu fɛ minnu bi sewala. Di wonu fɛ minnu bi dila.

¹⁶ Wo kana lafisalayɛ kɛ. Wo kana wasi fɔ ka wo famayigi. Wo kana wo nyɛrɛ lɔn hɛnkili-bɔrɔ-tigi la.

¹⁷ Ni mɔgɛ do ya ko-yogomɛ ma wo la, wo kana wo tayili sara ko-yogomɛ la. Koe minnu kin mɔgɛ bɛɛ yala, wo ni wo raya koe wonu ma tinɛ.

¹⁸ Wo ni wo sɛ-koe-bɛɛ kɛ ka to yisi-kimɛ rɔ mɔgɛ bɛɛ fɛ.

¹⁹ N diyana-mɔgɛnu, wo kana wotɛ lasɛgi. Wo ni wotɛ to Alla ma, ado a sɛbɛnɛ Allata kitabu rɔ ko, “Mari si wo tayili sara.”

²⁰ Woletɔ iko a sɛbɛnɛ Allata kitabu rɔ nya min, a ko, “Ni kɔnkɛ ye i yoge la, i ni a de-nyini. Ni a kan-lagbalanɛ, i ni yi di a ma. I tenbi wo mala, a si miliya i ye ka a tɛgɛ a sɔn wo ma.”

²¹ Wo kana sɔn, ko-yogomɛ ni nɔ-ko sɔrɔn wo ma. Wola ko-nyimɛnu ni nɔ-ko sɔrɔn ko-yogomɛnu ma.