Nimisa Koe 5 - ALLALA KUMƐ

Kinikini Madiyalɛ Wara-Koe

¹ E, Mari, i miri ma ara tɔrɔ nya min nun, i kolan layigi ma yarabi-nya ma ma yogenu bolo.

² I ya ma halala-dugi don sibolo-gbɛrɛnu bolo kaka. Mala bɔnnu fanan bi anu bolo.

³ Ma yogenu bara ma fanu faga ka ma to kelenniyɛ rɔ. Ma nanu bara ma kɛɛ-musinu na gbɛ!

⁴ Hali mala min-kɛ-yi, ma ye a sanna le, ado fɔ ni ma ya mala sɔgɛnu san.

⁵ Anu bi ma lagbengbenna iko sofɛlɛ-dunumatoe. Ma bandanta dɔgɔma-ma-de kɔnɔ sulen-kunya sa ma bolo.

⁶ Ma ya ma sa Iyipiti kɛnu anubɛ Asiriyanu kɔrɔ dɔn-fen-koe la alako ma si ma beli-fannu sɔrɔn nya min.

⁷ Ma benba minnu bara faga, wonu ya hakɛ min kɛ, male ye wo le tɔrɔyɛ kun na kɛ la kaka.

⁸ Yɔɔnnu bi ma marala, ado kaka, mɔgɔ-wo-mɔgɔ sa min si ma bɔ anu bolo.

⁹ Ma ye ma niyinu sala tiga-fɔrɔn rɔ ka ta dɔn-fen-nyini-tinɛ bawo mɔgɔ-fagalɛnu bi nyɔ waralɛnu tɔ.

¹⁰ Ma fɛrɛ fafanɛ ma ma kɔnkɛ bolo kodokodo, iko biredi bɔ-san tenbi a mintan-tinɛ.

¹¹ Anu diginta mala musinu ma hali Yerusalɛm kɔnkɔ-sɛnimɛ kuma. Anu diginta mala sunkurun-nasɔlɔnɛnu ma Yuda nyamanɛ soe bɛɛ rɔ.

¹² Anu ya mala kun-tiginu bole dan lakiri ka anu dun san ma. Hali mala kinanu, anu ma kinikini wonu ma.

¹³ Anu ya kemini-mɛsɛnu nawɔli dɔn-fen-bunden-tinɛ iko yɔɔn. Mala dennɛnu bi tonko-tankanna sɔgɔ-dunɛ kɔrɔ.

¹⁴ Ma benbanu sa anu nadɛnna tun tarɛ-don-dɛnu na kiti-sa-tinɛ iko fɔlɔ. Mala fonikenu sa tolonna ka fɔli-fannu kɛ-a-rɔ tun.

¹⁵ Sewa mumɛ sa ma yisi rɔ kaka. Mala dɔn-kɛ ara yɛlɛma ma bolo di-kɛ la.

¹⁶ Ma wasinɛ fan min bɛɛla ko la nun, wo fenfen ma to ma bolo tun. Gbalo ye ma kuma bawo ma ara hakɛ min kɛ.

^17-18 Ma yisi tinyanɛ bawo mɔgɔ sa Bato-Bɔn la tun. A la ara kolonya filili! Fɔ sulukinu dɔrɔn, wonu denu sigi tina ye Bato-Bon-tiinɛ wo la. Ma yisi la ara fin ma ma wola ko la. Ma ti ke ko ragbɛla ma ya-yi bolo.

¹⁹ Kɔnɔ ile Mari, habadan-mansɛ le ile la, ado i si to mansayɛ la ma kuma burubukai!

²⁰ Nfenna i kan-kɔ-sɔɛ ma la, wo ara mɛ? I ti i miri ma ma tun doni-bɛrɛni?

^21-22 Ni i ma i ban ma la nun feufeu, ni i ma diminya ma ma ka a dan-natenbi, a ma, ma ni sɛgi i ma tun. E, Mari, i yandi, ma to gbiliyɛ rɔ iko ma ye nya min nun.