Nimisa Koe 3 - ALLALA KUMƐ

Yigi Sɔrɔn Fɔ-Koe Yɛrɛmaya Bolo

¹ Nde le wara Allata diminyɛ tɔrɛ rayen n yɛ la.

² Ale le ya n nata pinpi-makilanni-bɛ rɔ alako n ni nyɔ ratagama.

³ Telen-gbɛn, a ya n matɔntɔn. A ma kinikini n ma.

⁴ A ya n bɔ n konde rɔ ka n kolenu takeri gbesili bolo.

⁵ A ya n bira ka n nafoo mɔnɛ anubɛ tɔrɔyɛ la.

⁶ A ya n to pinpi-makilanni-bɛ rɔ iko mɔgɔ-fagani-kɔrɛ minnu bi kanbɛ rɔ.

⁷ A ara n kiri yɔlɔkɔ-gbiliyanɛnu na. N masansannɛ, ado n purukulu-kunya sa.

⁸ N ba Alla rakele n dɛnbɛn-koe la, a ti a wɔlɔ matɔlɔ n na.

⁹ N ba ta kan-bo-kan, n si nyɔ-gbosonɛ taran n ya rɔ. Nna kilɛ bɛɛ radunɛ.

¹⁰ A manɛ iko sogo-dalamɛ le ye n makɔnɔna ka kɛ n ma.

¹¹ A ya n gben kila-kole ma ka n bira. Wo kɔma, a ya n tafarafara ka n boloka nyɔ rɔ.

¹² A ya ala kalabɛn rasagan n kan ma ka n ma ala kalabɛn-mafɛlɛn-tinɛ la.

¹³ A ara ala kalabɛnnu nakɛ n ma. Wonu tununta n tɔ poɛ!

¹⁴ Mɔgɛ bɛɛ yɛlɛnta n ma. N mara anu bolo yɛlɛnma-sigi-sɛ la.

¹⁵ A ara a ma, n bara tɔrɔ iko bɛsi-kuna-minnɛ.

¹⁶ A ya a ma, n ya kuru-kundi rakin ha n nyin bɛɛ kerita. N tasɔnsɔnnɛ bore rɔ.

¹⁷ Kɛndɛyɛ wo, yisi-kimɛ wo, anubɛ sewɛ, n miriya ma ke wonu ma tɔrɔyɛ bolo.

¹⁸ N ya a lɔn nun ko Mari si a ma, n ni faga tiriya! N niyi ma ara dɔgɔya n fɛrɛ rɔ.

¹⁹ N ba n miri n tɔrɔya-nya ma, ado n barɛ fɛ-yan n na, wo si ma n ye iko dawarɛ.

²⁰ Ni n tora n mirila nna tɔrɔyɛ dama ma n burɔ, n yisi si tinya pɔ!

²¹ Kɔnɔ n ba n miri ko kelen pe ma, wo le si a ma, n yigi ma ni diya.

²² Wo le iko Marita keninteya-dan-natɛgɛbɛlɛ anubɛ ata kinikinɛ min ti ban.

²³ Anu kurɛ le sɔgɔma-wo-sɔgɔma. Ala telenbagayɛ kolo.

²⁴ Mari kelen pe le nde bolo. N mako-nyinyalɛ le ale la. N si n yigi sa ale rɔ.

²⁵ Mari si ko-nyimɛ kɛ mɔgɛ wonu ye minnu bi a nyinina anu yisi bɛɛ la.

²⁶ Min fisa, fɔ ka i munyu alako Mari si na ma lakisi nya min.

²⁷ A fisa, mɔgɛ tenbi a pose rɔ, a ni munyu-koe makaran.

²⁸ Mari tenbi mɔgɛ kɔrɔbɔla, a kin wo tigi-radenɛ ni a sigi don!

²⁹ A ni a munyu Mari kɔrɔ hali a kɛnɛ bɔnkɛ rɔ bawo tumado yigi ye nyɔ anu nakisi-koe rɔ.

³⁰ Hali anu ya gbesili anubɛ mɔɛn sigi ma ma, ma si ma munyu wonu kɔrɔ.

³¹ N Tigi Mari kinikinite. A ti a ban ma la hali!

³² Hali a ye tɔrɔyɛ sigila mɔgɔ ma, a si kinikini a ma bawo ata keninteyɛ da rakolo.

³³ A ma di Mari ye a ni mɔgɔ tɔrɔ ha a kɔndɔ ni fili pirikali!

³⁴ Yelela-mɔgɛnu bira-boloko-yogomɛ ma di n Tigi Mari ye.

³⁵ Alla Min Bi Fan Bɛɛ Kun Na ko ni mɔgɛ ya lafisayalɛ kɛ ka ko-yogomɛ sigi i mɔgɔni-fin-nyɔgɛ la, wo ma di Mari ye.

³⁶ Anu ba mɔgɔla tonyɛ radu kiti-sa-tinɛ, wo ma di n Tigi Mari ye, ado a kolan sɔnɛ wo bɛɛ la.

³⁷ Yon si ke kumɛ fɔla, a ni bɔ-a-la, ni n Tigi Mari ma sɔn wo ma fɔlɔ nun, ba?

³⁸ Alla Min Bi Fan Bɛɛ Kun Na, tɔrɛ anubɛ duwɛ sa bɔla wo le bolo, wa?

³⁹ Mari tenbi hadama-dan tɔrɔla a hakɛla ko la, nfenna a ye gbɛngbɛrɛnna?

⁴⁰ Ma ni ma tagama-nya fɛsɛfɛsɛ a kila-bɛrɛbɛrɛ fɛ, wo kɔma, ma ni ma sɔ ma hakɛ la Mari ye.

⁴¹ Alla min bi san ma, ma ni a madiya ma yisi bɛɛ la ka a fɔ a ye ko,

⁴² “Male ara murutiya ile Mari ma ka ko-yogomɛ kɛ, ado i ma ma yulumu kafari.

⁴³ “I fondela bɔɛ ye a mala, i ye ma sagaranna ka ma faga. Ma sa ita kinikinɛ yenna.

⁴⁴ A manɛ iko mala madiyalɛ sa tenbila tarɛ min tɔ.

⁴⁵ I wara ma ma yefe-gbalɛ anubɛ sundu-kunyɛ la sibolo-gbɛrɛnu yala.”

⁴⁶ Ma yoge bɛɛsi ara ma lafɛya ka ma mɔɛn.

⁴⁷ Kasarɛ anubɛ tinyɛ siginɛ ma kuma sodo! Fenfen ma to fɔ kilan anubɛ kumakɔɛ.

⁴⁸ Ka a tɛgɛ nna mɔgɛnuna kasara-nya ma, n ya-yi ye yigila iko bɛ.

⁴⁹ N ya-yi ye yigila iko yi min ti gbala

⁵⁰ ha Mari ni a kolan layigi n ma ka bɔ san ma n dɛnbɛn-tinɛ.

⁵¹ N yisi-tinyanɛ ka a tɛgɛ n bi min yenna sigila Yerusalɛm fonike-musinu ma.

⁵² N yogenu bi yili lasigila n ye iko kona. N ma n gboya-kunya yen anu bolo.

⁵³ Anu ya n nafili denkɛ rɔ ka denkɛ wo dɛ latogon kuri la n ma.

⁵⁴ Yi ara fɔlɔla n yamatogonna denkɛ wo burɔ. N niyi ragbɛrɛnta n ma.

⁵⁵ E, Mari, n ya i rakele denkɛ wo kole la.

⁵⁶ N ya i madiya n dɛnbɛn-koe la tumɛ min, i ya a lamɔɛn de, yɔ!

⁵⁷ I ya i gbɛrɛn n ma ka a fɔ n ye ko n kana kilan.

⁵⁸ “E, n Tigi Mari, i ni n niyi kumafunfan kiti kɛ rɔ.

⁵⁹ I wara n kensunya-nya yen n yogenu bolo. I ni n yo sa kumɛ kɛ rɔ.

⁶⁰ Yanfɛ min tabɛnnɛ n kan ma n yogenu bolo, i ya wo bɛɛ lɔn.

⁶¹ “I wara n mamɔɛn-kan lamɔɛn anu bolo, ado anu bara yanfɛ min bɛɛ kiri n ma, ile Mari ya wo bɛɛ lɔn.

⁶² Telen-gbɛn, anu bi anu kɔnkɔnna n ma ka n tafɔ.

⁶³ Anu sigini, anu sɔni, nde le manɛ yɛlɛnma-fan la anu bolo.

⁶⁴ “E, Mari, anu tɔrɔ iko anu wɔli kɛ-nya.

⁶⁵ Ko-yogomɛ sigi anu na alako anu yisi ni tinya pɔ!

⁶⁶ Anu manɛgɛn ka anu wara-koe ka-a-la duninya kɛ rɔ.”