Nimisa Koe 2 - ALLALA KUMƐ

Yerusalɛm Kasara-Koe Mari Bolo

¹ N Tigi Mari ya ala diminyɛ burun Yerusalɛm kuma iko banda-finyɛ. A ara Isirɛla mɔgɛnuna fen-kolomɛ bɛɛ to fu! Ata diminyɛ ara a ma, hali a Bato-Bɔn, a ara a kɔɛn bɔ wo wara-koe rɔ feufeu!

² N Tigi Mari ma kinikini so-mɛsɛ fenfen ma Yuda nyamanɛ rɔ. A ara anu bɛɛ halaki pɔ! So-latankanɛ min bɛɛ ye Yuda nyamanɛ lakanan-koe la, a ara wo bɛɛ labui fugbu! A ya nyamanɛ anubɛ a mɔgɔ-banu fɛrɛn dugi la yarabiyi bolo.

³ Mari ya Isirɛla fanka ratii ala diminyɛ bolo mɛmɛ! Ma yogenu nanɛ, a ma sɔn ma dɛnbɛn-koe ma mumɛ! Ala diminyɛ ya male Isirɛla mɔgɛnu ban iko ta-belebele si ala foolarɔ-fannu ban nya min.

⁴ Mari ara ala kalabɛn rasagan ma kan ma iko a yoge le ma la. A ya mala mɔgɔ-hakikɛ bɛɛ faga. A ara ala diminyɛ rawuya Yerusalɛm soe ma iko tɛ.

⁵ Ma Tigi Mari ara ma ma yoge la ka Isirɛla nyamanɛ tinya. Tarɛ mininɛ soe minnu ma wo, a bon-kinyɛnu wo, a ara wo bɛɛ halaki pɔ! A ara male Yuda kɛnuna tɔrɔyɛ layiriba kosɛbɛ!

⁶ Ma ye a batola bɔn min na fɔlɔ nun, a ara nyɔ-daga-koro-tiyi kɛ. A Sulen-Tele wo, a ladiya-ladɛn wo, a ya tɔn sigi wo dama ma. A mansa wo, a saraka-masɔla wo, wo dama bɛnta ata diminyɛ rɔ.

⁷ N Tigi Mari ya a kan-kɔ sɔ aleta saraka-mintan-tinɛ anubɛ a Bato-Bɔn la. A ya a ma, ma yogenu ya Bato-Bon-dandan labui. Male ye batoli kɛla kan min nun sewɛ la, ma yogenu bi wasawasɛ layɛlɛla nyɔ.

⁸ Mari ara banna Yerusalɛm soe tarɛ bu-koe latɛgɛla. A ara tarɛ wo suman alako hali doni kana to sɔni. A bɛɛ ni tii mɛmɛ! A kan-tina-layan-ba wo, a tara wo, wo bɛɛ ye dila anu nyɔgɔn fɛ bawo anu tinyanɛ.

⁹ Tarɛ wo don-da-wɛnu tora sani yefe-gbalɛ rɔ. A dɛ-balan-kɔnnu ta ara kerikeri. Nna mansɛ anubɛ nna mɔgɔ-banu bi biralɛ rɔ nyamani-gbɛrɛkɛnu tɔ. Nta saraka-masɔlɛnu sa mɔgɛnu karanna tɔn ma tun. Mari sa wɔlɔyiya-kumɛnu yirala nta nɛbinu ma tun.

¹⁰ Yerusalɛm mɔgɔ-banu-makinikininɛ sigini dugi ma. Gbangban kɛnɛ anu kunyɛ rɔ. Kasa-kurɛ bilanɛ anu kan na alako ka a yira ko anu bi saya-di-kɛ tinɛ. Hali sunkurun-mɛsɛnu, wonu sanɛ dugi ma yisi-tinya bolo.

¹¹ N yɛ wulennɛ puipui, di-kɛ bolo. N yisi tinyanta feu! N tora ma yogenu yenna ma fagala min kɛ, n bandanta di-kɛ bolo. Dennɛnu bi belenna kirɔnna-a-la da-wo-da kɔnkɛ bolo soe burɔ.

¹² Anu kɛnɛna dila anu nanu da la kɔnkɛ anubɛ kan-nagbalɛla ko la. Anu kɛnɛna kirɔnna-a-la soe burɔ iko mɔgɛ min bara tanban boloko-yogomɛ-kɛ. Anu kɛnɛna anu niyi makawala kinyɛ da rɔ.

¹³ N si ile Yerusalɛm soe sanka nfen ma? Mɔgɔ-wo-mɔgɔ sa nyɔ min tɔrɔnɛ iko ile. I ni-radiya-kuma sa n da rɔ mumɛ! Ita tɔrɔyɛ kolo iko kɔgɔ-yi kolo nya min. Yigi wo-yigi sa i bolo.

¹⁴ Ila nɛbinu sa fenfen fɔla i ye fɔ foninyɛ gbansan! Anu ma sɔn ila mɔgɛnu hakɛ yirala anu na min si a ma nun, anu kana ta biralɛ rɔ. Ka wo sɔn wo hakɛ la, anu bi a mala wo bɔrɔbɔnɛ wo ye.

¹⁵ Mɔgɛ min tenbi tenbila, wo ye a dɛ bosila a kɔrɔ Yerusalɛm soe ma. Min ba ke Yerusalɛm tinyanɛ ma, wo si a bole sa a dɛ la ka kawa. Anu bi a fɔla ko, “So-kinyɛ wo le ma kɛ la nun? Duninya sa anu diyala kɛ le la nun?”

¹⁶ I yoge bɛɛ ye i mayɛlɛnna. Anu bi i lafɛyala ka i rasɛ. Anu bi a fɔla ko, “Male le ya a kasara. Nba, ma ara mɛ tele min makɔnɔna, wo le kɛ la, yɔ!”

¹⁷ Mari ara a fɔ ko a ye min mala nun, a ara wo le ma kɛ la. A ara ban Yerusalɛm soe kasara-koe latɛgɛla nun, ado a ara wo le ma kɛ la gbɛ! A ara a ma, ma yogenu bara sewa bawo soe ara tinya.

¹⁸ E, Yerusalɛm, ila tarɛ ni to dila biribiri, n Tigi Mari dala iko mɔgɔ-nimisanɛ. I ya-yi ni to yigila su-ni-tele iko bɛ. I kana fara di-kɛ la mumɛ!

¹⁹ Ile Yerusalɛm soe ni to i lasɔla suyi rɔ ka di n Tigi Mari dala i dɛnbɛn-koe rɔ. I sɔndɔmɛ lagbɛ Mari ye ka a madiya alako a ni kinikini ila dannu ma. Ila dannu bi fagala kɔnkɛ bolo lu-kole ma belenna soe burɔ.

²⁰ E, Mari, i kolan lata mɔgɛ kɛnu ma. Ha bi, i wara yon tɔrɔ iko kɛnu? I ma a yen, musinu bi anu diyana-dannu soge dɔnna? Ma yogenu bi saraka-masɔlɛnu anubɛ nɛbinu fagala ita Bato-Bɔn la.

²¹ A fonike wo, a kinan wo, bɛɛ furi-bolokanɛ ye belenna da-wo-da soe burɔ. Ma yogenu bara ban mala fonikenu tasɔgɔ-sɔgɔla faan la. Ita diminya-belebele le ya a ma, ma yogenu ya ma boso.

²² I ya ma yogenu kele ma kan ma alako anu ni ma kɛlɛ kan-tinɛ bɛɛ rɔ. Anu tugura ma kan ma iko anu keleta dɔn-fan le ma. Mɔgɔ-wo-mɔgɔ ma ke a sɔrɔnna anu na. Mɔgɔ ma to a niyi la min si a rakaran. Hali ma diyana-dan minnu siginɛ ma kɔnkɔn tɔ, anu ya wonu faga.