Nihɛmaya 9 - ALLALA KUMƐ

Mɔgɛnu Sɔ-Koe Anu Hakɛ La

^1-2 Karɛ wo nyɛrɛ, a tele mogan-ni-nani nyɔgɛ ma, Isirɛla mɔgɛnu ya anu nadɛn ka sunyɛ don alako anu ni anuta yisi-lafinyɛ yira Mari la. Anu ya kasa-kurɛnu kɛ anu ma ka gbangban kɛ anu kunyɛ rɔ ka diyi-kɛ sɔnsɔn a la. Wo si a yira ko anu nimisanɛ. Wo wati ya a taran, anubɛ sibolo-gbɛrɛnu sa gbundu kelen tɔ tun. Anu bara anu fara wonuta gbundi la nun. Wo kɔma, anu ya anu sɔ anu hakɛ la anubɛ anu benbanu bara min tinya.

³ Hawa sawa, Lifayinu bi anuta Mari Allata tɔn-buku karanna anu ye. A nyɔgɔn hawa sawa fanan, Isirɛla mɔgɛnu bi anu sɔla anu hakɛ la ka anuta Mari Alla bato.

⁴ Bɛndɛ do sɔnɛ Lifayinu ye nyɔ. Yɛsuwa wo, Bani wo, Kadamiyɛli wo, Sɛbanaya wo, Buni wo, Sɛrɛbaya wo, Bani wo, Kɛnenayi wo, wonu denu yɛlɛta bɛndɛ wo kuma. Anu ya anu kuli mayɛlɛ anuta Mari Alla matara tinɛ.

⁵ Yɛsuwa wo, Kadamiyɛli wo, Bani wo, Hasabinaya wo, Sɛrɛbaya wo, Hodaya wo, Sɛbanaya wo, Pɛtahaya wo, Lifayi kɛnu fanan ya a fɔ anu kulu-mayɛlɛnɛ la ko, “Wo ni wo lasɔ ka baraka bira wota Mari Alla ye. Wo ni to a matɔgɔla burubukai! Bɛɛ ni a tɔgɛ gbiliya ka a tanto. Kɔnɔ ma ya a lɔn ko hadama-danta matɔgɔlɛ ti a bɔ.”

Matarali-Kɛ-Koe Anu Hakɛla Ko La

⁶ Wo kɔma, Isirɛla mɔgɛnu ya matarali-kɛ. Anu ko, “Mari, ile le kelen pe ye Mariyɛ la. Ile le kelen pe le ya san-kole anubɛ lolenu dan. Ile le ya dugu-kole anubɛ kɔgɔ-yi dan anubɛ fan min bɛɛ ye anu tɔ. I ya niyi di ma dama ma. Melikanu fanan si anu madu i kɔrɔ ka i bato.

⁷ Ile Mari Alla le ya Burama yabɔ ka a labɔ Yuri soe burɔ Babilɔn nyamanɛ rɔ. I ya a tɔgɛ yɛlɛma ko Iburayima.

⁸ I ya a yisi-telennɛ yen i wara la. Wobɛ ya sarama-kan kiri wo nyɔgɔn tɛma. Kenannu siginɛ kan min wo, Hɛtinu anubɛ Amoranu siginɛ kan min wo, Perasanu anubɛ Yebusinu anubɛ Kagasanu siginɛ kan min wo, i ya ale Iburayima yili-madiya ko wonuna nyamanɛ si ma a kegeyɛnutɛ la, ado i wara ila sarama-kan wo latɔnbagaya bawo i telenta.

⁹ “Wo kɔma, ma benbanu tɔrɔta nya min Iyipiti, i ya wo yen de! I ya anu kan-nabɔ-kan lamɔɛn Kɔgɔ-Yi-Wulan dafɛ.

¹⁰ I ya kabana-koenu nadan Iyipiti mansɛ kan ma ka wonu nadan Iyipiti kun-tiginu anubɛ nyamanita-mɔgɛnu kan ma. I ya wo ma le bawo i wara ila mɔgɛnuna tɔrɔya-nya yen anu bolo. I kɛ-nya le ya a ma, i ya tɔgɛ sɔrɔn, ado ha bi, i mankan ye nyɔ.

¹¹ I ya Kɔgɔ-Yi-Wulan fara fila la ila mɔgɛnu ye alako anu ni tenbi dugu-gbalanɛ kuma ka anu yogenu nabui yi rɔ iko kuri. I ya yi keri anu kun na.

¹² I sɔra anu yarɔ tele rɔ iko banda-fin-gbɛ. I sɔra anu yarɔ suyi fanan tɔ iko ta-mɛlan ka waan raka anu yarɔ kilɛ ma.

¹³ I bɔra san ma wulɔn Sinayi kɔnkɛ kuma. I kumara ila mɔgɛnu ye nyɔ. I ya tɔnnu di anu ma nyɔ min kin, ado tonyɛ le anu na.

¹⁴ Anu si ila Sulen-Tele bira nya min ka a gbiliya, i ya anu karan wo la. I ya ila tɔnnu don ila wɔli-kɛla Nɛbi Musa bolo ka anu karan wo la.

¹⁵ “Kɔnkɛ ya anu bira wati min, i ya biredi layigi anu ma ka bɔ san-kole rɔ. Anu kan lagbalata wati min, i ya yi labɔ anu ye farɛ rɔ. I ya anu yili-madiya nyamanɛ minna ko la, i ya a fɔ anu ye ko anu ni nyɔ bi.

¹⁶ Kɔnɔ ma benbanu mara wasintenu anubɛ tolo-gberenu na. Anu ya anu ban ita kumɛnu bira-koe ma.

¹⁷ Anu ma sɔn anu tole sigila ita kumɛ kɔrɔ. I wara kabana-koe min bɛɛ ma anu ye nun kɔrɔma la, anu nyinara wonu ko salon! Anu bilara anu kun-telenmɛ fɛ ka anuna kun-tigi yabɔ min si anu kunyɛ don yɔɔnyɛ rɔ tun iko anu taranta nya min Iyipiti. Kɔnɔ kinikini-mansɛ le ile la. Anu di i ye, ado i si ko-nyimɛ kɛ anu ye. I fonde ti bɔ anu kuma yona. Ila kinikinɛ kolo anu bara la, ado i ma anu boloka mumɛ!

¹⁸ Anu ya tura-bulanla muninyɛ ladan anuna bɛsɛ la. Anu ya a fɔ ko anuta alla le wo la min ya anu nabɔ Iyipiti. Wo ya a ma, anu bilara i la dɔgɔma-ma-de!

¹⁹ Kɔnɔ hali wo, i ma anu boloka wula-da-rakolɔn rɔ bawo ila kinikinɛ da rakolo. Ta-mɛlan wo, banda-fin-gbɛ wo, i ma wonu bi anu bolo. I tora kilɛ yirala anu na su-ni-tele.

²⁰ I ya i nyɛrɛta ni-bɛrɛ di anu ma alako wo ni anu karan. I ya anu de-nyini ita biredi la ka yi fanan di anu ma.

²¹ San bi-nanɛ wo bɛɛ kɔrɔ, i ye anu makoe nyinyala. Anuna kurɛnu ta ma fara. Anu kiannu ma yiri.”

²² “Anubɛ anu sigi-nyɔgɛ minnu dan-masanɛ, i ya a ma, anu ya wonu nɔ. Anu ya Mansa Saihɔn nɔ min siginɛ Hɛsibɔn soe burɔ. Anu ya Mansa Ɔkuta Basan nyamanɛ nɔ.

²³ I ya a ma, anu yirita bui, ka siyaya iko lolenu. I ya anu benbanu yili-madiya nyamanɛ minna ko la, anu ya anu yogenu nɔ ka anu sigi wonuta nyamanɛ rɔ.

²⁴ Wo kɔma, anu ya Kenan nyamanɛ bi, ado mɔgɛ min siginɛ nyɔ, anu ya wonu nɔ bɛrɛbɛrɛkɛ! I ya a ma, ila mɔgɛnu ya Kenan nyamanɛ nɔ-fanka sɔrɔn wo kɔma, ka anu sakorɔ-koe kɛ anubɛ anuna mɔgɛnu na.

²⁵ Anuna so-latankanɛ wo, anuna wɔli-kɛ-tina-nyimɛnu wo, fen-kolomɛnu bi bɔn minnu na wo, yi lamara tinɛ minnu sinnɛ nun wo, anubɛ ki-fen-su bɛɛ, anu ya wo bɛɛ bi anu bolo. Anu ya anu de-nyini ha anu kunbayara pɔti! I ya fen-nyimɛ min bɛɛ di anu ma nun, wo ya a diya don anu tɔ.”

²⁶ “Kɔnɔ ita mɔgɛnu murutiyara i ma ka i kan bɔ a gbɛ rɔ. Anu ya anu kan-kɔ sɔ ila tɔn la. Nɛbi minnu ya anu makawandi, anu ya wonu faga bawo wonu bi anu makawandila ko anu ni sɛgi i ma. Tuma-wo-tuma, i lafɛyanɛ anu bolo.

²⁷ Woletɔ i ya a ma, anu yogenu ya anu bira ka to anu kun na. Tɔrɔyɛ wo le ya a ma, anu ya anu kan nabɔ i ma anu dɛnbɛn-koe rɔ, ado i ya anuna matarali-kan yabi san-kole rɔ. I ya kun-tiginu nana minnu ya anu nakanan anu yogenu masibɛ ma bawo i kinikinite.

²⁸ Tiriyante wo rɔ, yisi-kimɛ sɔrɔnnɛ anu bolo tun, anu ya hakɛ-kɛ dabira. Woletɔ i ya a ma, anu yogenu ya anu nɔ tun. Anu ya anu sɔ anu hakɛ la tumɛ min ka i matara anu kanan-koe la, i nara to kinikinina anu ma ka to anu kunyɛ bɔla gbaran rɔ.

²⁹ I ya anu makawandi alako anu ni ila tɔnnu bira kɔnɔ anu ya anu kan-kɔ sɔ ila tɔn la, ado anu niyi-sɔrɔn-kunyɛ le tɔn-birɛ la. Anu ya anu ban i bolo pat!

³⁰ San-bo-san, i ye i munyuna anu kɔrɔ ka to anu makawandila tolon! I tora kumɛ donna ila nɛbinu da rɔ ka wo latenbi anu ma kɔnɔ mɔgɛnu tole gberenɛ gben! Woletɔ i ya a ma, sibolo-gbɛrɛnu ya anu nɔ tun.

³¹ Kɔnɔ hali wo, bawo ita kinikinɛ da rakolo, i ma anu boloka. I ma anu nato. E, Alla, ila nyimayɛ anubɛ kinikinɛ da rakolo.”

³² “E, mata Alla, i makawara. I makilannɛ ita sɛnbɛ la. Sarama-kan min kirinɛ ma tɛma, ile ara itɛ latɔnbagaya. Kebi Asiriya mansɛnu ya ma tɔrɛ min dabira, ha bi, ma ye tɔrɔya kelen wo le kun na. Mala mansa wo, mala kun-tigi wo, mala saraka-masɔla wo, mala nɛbi wo, ma benbanu wo, anubɛ mala mɔgɛ toenu wo, ma dama ye tɔrɔyɛ wo rɔ. I yandi, i miri mala tɔrɔyɛ yirika ma.

³³ Ma tɔrɛ i bolo, wo bɛnta le, yɔ! Hali male ara hakɛ kɛ duk, ile telennɛ ma ye.

³⁴ Ma benbanu wo, mala mansa wo, mala kun-tigi wo, mala saraka-masɔla wo, ma fenfen ma ila tɔnnu bira. Anu ma anu tole sigi ila makawandili-kumɛnu kɔrɔ.

³⁵ Wati wo rɔ, anu taranta sigini anuna mansɛnu kɔrɔ yisi-kimɛ rɔ nyamani-nyimɛ kɛ rɔ ile ya min di anu ma. Kɔnɔ hali wo, anu ma anu fara hakɛ-kɛ la ka ile sako kɛ.

³⁶ I ya nyamanɛ min di ma ma, ma siginɛ wo rɔ iko yɔɔnnu. Ile ya nyamanɛ kɛ di ma ma le alako ma ni sigi a tɔnɛ kun na kɔnɔ yaga, ma ye yɔɔnyɛ le la yan tɔ.

³⁷ Ma ara hakɛ kɛ min kɛ, mala nyamanɛ kɛ tɔnɛ bɛɛ ara ban tola sibolo-gbɛrɛ-mansɛnu denu ye. Koe minnu di anu ye, anu bi wo le sigila mabɛ mala kolo-fannu ma. Ma ye tɔrɔya-belebele le kɔrɔ kɛ la.”

Mɔgɛnu Bole Sa-Koe Mana Rɔ

³⁸ Ka a tɛgɛ koe min bɛɛsi ara ma kɔrɔma la, male Isirɛla mɔgɛnu sarata ko kelen de ma ka kɛdi sɛbɛ ka ma bole sa mana rɔ. A kun-tigi wo, a Lifayi wo, a saraka-masɔla wo, ma dama ara ma tɔgɛ sɛbɛ.