Nihɛmaya 8 - ALLALA KUMƐ

Tɔn-Karan-Koe Mɔgɛnu ye Ɛsira Bolo

¹ Karɛ wɔrɔ tenbinɛ, a wɔrɔnfila nyɔgɛ ma, wo ya a taran, Isirɛla mɔgɛ bɛɛ ara anu sigi-bole rabɛn anuna soenu tɔ. Karɛ wo tele fɔlɛ ma, tarɛ don-dɛ min tɔgɛ ko Yi, mɔgɛnu ya anu nadɛn wo lu-kole ma Yerusalɛm soe burɔ. Alla ya tɔn min di Nɛbi Musa ma, anu ya Saraka-Masɔla Ɛsira manyinika ko a ni ta tɔn-buku wo bi bawo a ya tɔn wonu kɔrɛ lɔn a nya ma.

² Ale Ɛsira tara a bi ka na a la nyama wo tɛma. Keinu anubɛ musinu bi nyɔ anubɛ dennɛ minnu bara anu hɛnkili sɔrɔn.

³ Ka a bi sɔgɔmɛ ma ha tele latelan, Ɛsira ye a rakaranna anu ye nyɔ. Anu dama ya anu tole masɔ a kin na!

⁴ Ɛsira sɔra bɛndɛ kuma. Wo ladanta wulɔn tele lela ko la. Mɔgɔ wɔrɛ minnu sɔra a bolo-nyimɛ wara la bɛndɛ wo kuma, wonu tɔgɛ le kɛnu na, Matetaya wo, Sɛma wo, Anaya wo, Yuraya wo, Helikaya wo, anubɛ Meyaseya. Mɔgɔ wɔrɔnfilɛ minnu sɔra a bolo-maran wara la bɛndɛ wo kuma, wonu fanan tɔgɛ le kɛnu na, Pɛdaya wo, Misiyɛli wo, Malakiya wo, Hasum wo, Hasibadena wo, Sakaraya wo, anubɛ Mɛsulam.

⁵ Ɛsira sɔnɛ san ma nyɔ wati min, bɛɛ yɛ bɛnnɛ a ma nyɔ. A ya tɔn-buku laka wati min, bɛɛ ya a lasɔ nya-kun-kelen.

⁶ Ɛsira ko, “Mari tanto, Alla-makawanɛ, kɔni.” Mɔgɛ bɛɛ ya a bole layɛlɛ san ma. Anu ko, “Yo!” Wo kɔma, anu dama ya anu maburun dugi ma ka Alla bato.

^7-8 Wo kɔma, anu ya anu nasɔ. Yɛsuwa wo, Bani wo, Sɛrɛbaya wo, Yamin wo, Akubu wo, Sabɛtayi wo, Hodaya wo, Meyaseya wo, Kɛlaita wo, Asaraya wo, Yosabadi wo, Henan wo, anubɛ Pɛlaya, Lifayi kɛnu denu ya Allata tɔn wonu natenbi mɔgɛnu ma. Wo kɔma, anu ya tɔn wo fɛsɛfɛsɛ anu ye ka a kɔrɛ fɔ anu ye alako anu ni a nya-yen.

⁹ Kumɛ min sɛbɛnɛ tɔn wo rɔ, anu ya wonu namɔɛn min kɛ, anu donta diyi-kɛ rɔ bawo kumɛ wonu bara anu sɔn-kunyɛ lamaga. Woletɔ Nihɛmaya min bi anu kun na anubɛ Saraka-Masɔla Ɛsira min bi tɔn-karan-mɔgɔyɛ la, anubɛ Lifayi minnu ya tɔn rakaran anu ye, wonu ya a fɔ mɔgɛnu ye ko, “Tele-sɛnimɛ le bi la mata Mari Alla ye. A ma bɛn, mɔgɔ ni di tele kɛ rɔ.

¹⁰ Bɛɛ ni ta a wara ka fen dɔn. Ni minta dɔn-fan anubɛ minni-fan ma a bɔ a bolo, wo ni wonu kele. Tele-sɛnimɛ le kɛ la wota Mari Alla bolo bi. Funun-tele ma bi la. Mari ye sewɛ min dila wo ma, wo si a ma, wo ni to fanka rɔ.”

¹¹ Lifayinu bi a fɔla mɔgɛnu ye ko anu ni anu tade bawo a ma bɛn, anu ni di bi. Tele-sɛnimɛ le bi la.

¹² Wo kɔma, mɔgɛ bɛɛ tara a warɛ bɔn la ka anu nyɛrɛ ladiya sewɛ rɔ. Anu hinara donu na bawo kumɛ minnu sɛbɛnɛ tɔn-buku rɔ, anu bara wo kɔrɛ lɔn.

Lele -Sɔɛ-Ladɛn Wara-Koe

¹³ Wo banda kɛ, a kebila-kun wo, a saraka-masɔla wo, a Lifayi wo, anu dama tara Ɛsira wara ka anu nadɛn tɔn-karan-koe rɔ.

¹⁴ Anu ya a yen ko Mari ya tɔn minnu di Nɛbi Musa ma, a sɛbɛnɛ wo rɔ ko a bɛnta, anu ni ki lelenu kɔrɔ ladiyɛ ladɛn wo rɔ anu bi min kɛla karɛ wɔrɔnfila nyɔgɛ ma.

¹⁵ Wole ya a ma, anu ya kilayɛ ranyɛnsɛn Yerusalɛm tɛngbɛnya anubɛ soe bɛɛ rɔ ko bɛɛ ni ta kɔnkɛnu tɔ ka na kɔlɔma-tagbanamɛnu na anu bolo. Ɔlifi-kɔn wo, tin-yanba wo, panpa-kɔn wo, anubɛ kɔlɔma donu fanan, anu ni ta wo bolɔnnu tɛgɛ ka na lelenu sɔ iko tɔn ya a fɔ nya min.

¹⁶ Woletɔ mɔgɛnu nara kɔlɔma-bolɔn wonu na ka lele wonu sɔ. Donu ya anutɛ sɔ anuta bon-ralɛɛnɛnu kuma. Donu ya anutɛ sɔ anuta lu-kɔndɛ rɔ. Donu ya anutɛ sɔ Mari Bato-Bon-kata burɔ. Donu ya anutɛ sɔ barɛnu tɔ minnu bi tarɛ don-da filɛ dafɛ. Don-dɛ wonu tɔgɛ le Yi anubɛ Ifɛrɛm.

¹⁷ Mɔgɔ-birani-kɔrɛ wo min bɛɛ nara, wonu denu ya lele wonu sɔ ka ki anu na. Kebi ladɛn-su kɛ kera Nunna den Yasowata wati rɔ, a ma kɛ tun fɔ kɛ wati rɔ. Mɔgɛ bɛɛ niyi lafulenta sewɛ bolo.

¹⁸ Ka a bi ladɛn wo tele fɔlɔtɛ ma, ha a tele laban, tele-wo-tele, anu si do karan Allata tɔn-buku wo rɔ. Tele wɔrɔnfila dɛgɛdɛgɛ, anu bi ladɛn wo kun na. A tele segin nyɔgɛ ma, anu ya ladɛn naban kɛ iko tɔn ya a fɔ nya min.