Nihɛmaya 6 - ALLALA KUMƐ

Yanfɛ Rabɛn-Koe Nihɛmaya Kan Ma

¹ Sanbalati wo, Tobaya wo, Kesɛm wo, anubɛ ma yogo-toenu ya a lamɔɛn ko tarɛ la ara bila a nyɔgɔn ma, ado a la ara ban, fɔ a don-dɛ minnu na ma ban togonna wɛ.

² Ale Sanbalati anubɛ Kesɛm ya anu sara n bara ko n ni anu taran so-nɛ do rɔ Ono Lɛɛ rɔ. Kɔnɔ nde ya a lɔn ko n bira-mɔlɔnɛ le wo la anu bolo ka koe do sigi n ma.

³ Nde fanan ya n sara anu bara. N ko, “N bi sɛbɛna-wɔlɛ le la yan. N ti ke tala wo wara kaka. N ti sɔn wɔlɛ ni tinya nyɔ-ta-koe la kaka.”

⁴ Anu ya kilaya-su kɛ lana n ma gbaranda nani. Nde fanan ya anu yabilɛ lata anu ma wo nya na iko nani.

⁵ Wo kɔma, Sanbalati ya ala wɔli-kɛlɛ lana n ma. Kilayɛ loli nyɔgɛ le wo la. A ya kɛdi min don n bolo, dogonta-ko ma wo la tun bawo a don-dɛ gbalɔnni ma.

⁶ Kɛdi wo ko, “Kesɛm ya a fɔ n ye ko a ye gbuguru-gbuguru-kumɛ lamɔɛnna mala foolɛ rɔ ko wole Yahudiyanu bi murutiya-koe le tɔ, woletɔ wo ye tarɛ wo sɔla. A ko fanan, a sɔgɛ ye i la, i ni i nyɛrɛ ma mansɛ la.

⁷ A ko i wara a rabɛn ko nɛbi donu ni na a mayon Yerusalɛm soe burɔ ko mansɛ le ile Nihɛmaya la Yuda nyamanɛ rɔ. Nde, Sanbalati lanɛ a la ko fɔ Mansa Atasakasi wa kɛ lamɔɛn. N lanɛ a la fɔ malebɛ ile ni bɛn kan tinɛ do rɔ alako ma si ko sufa kɛ sa nya min.”

⁸ Nde, Nihɛmaya ya kɛdi wo kɔfili lata ale Sanbalati ma. N ko, “I wara kumɛ min bɛɛsi sɛbɛ kɛ la, tonya-wo-tonya sa a do-wo-do rɔ. I kelen pe leta miriya sɛbɛnɛ kɛdi kɛ rɔ.”

⁹ N ya a yen ko anu bi ma rakilan-koe le tɔ alako ma kana na wɔlɛ kɛ kɛ. N ya Alla matara ko, “Alamɛ n sɛnbɛ makofura.”

¹⁰ A ma mɛ wo kɔma, n tara Dalayala den Sɛmaya kɔndɔn tinɛ, Mahatabɛli mamanɛ, kɔni. N ya a taran, dɛ latogonnɛ a ma bɔn la. Wo ya a fɔ n ye ko fɔ mabɛ ni ta ma dogon Bato-Bon Sɛnima Tinɛ rɔ. A ko ma ni wo dɛ balan ma ma nyɔ bawo anu bi nala n faga tinɛ. A ko anu bi nala n faga tinɛ su-wo-su rɔ gbɛ!

¹¹ N ya a fɔ a ye ko, “Wo mɔgɔ-su ma nde la min bi a burila ka a dogon. Saraka-masɔla ma nde la iko n bi tala n niyi-lakisi-koe rɔ Bato-Bɔn la. N ta-tina ma nyɔ la, ado n ti ta nyɔ mumɛ!”

¹² N ya n miri kumɛ kɛ ma a kila-bɛrɛbɛrɛ fɛ, n ya a lɔn ko Alla ma kuma Sɛmaya kɛ ye. Tobaya anubɛ Sanbalati le ya a sara kumɛ kɛ fɔ-koe la.

¹³ Anu ya a sara ka n bolo labira alako n si ko-yogomɛ kɛ nya min, ado ni n ya wo ma, anu si n tɔgɔ tinya ka n namiliya.

¹⁴ Woletɔ n ya matarali-kɛ. N ko, “Nta Alla, Tobaya anubɛ Sanbalati bara min ma n na, i fonde lamiri wo ma ka anu tɔrɔ. Hali Nɛbi-Musi Nowadaya anubɛ nɛbi-siyaman bara anu taya ka n takilan nya-wo-nya, i fonde lamiri mɔgɛ wonu ma.”

Tara Sɔ-Ko-Wɔlɛ Kundon-Koe

¹⁵ Karɛ min tɔgɛ Eluli, wo tele mogan-ni-lolɛ ma, ma ya tara-ko-wɔlɛ ban. Ma ya tele bi-loli ani tele fila le bɔ a wɔlɛ rɔ.

¹⁶ Ma yoge min bɛɛsi ye mala foolɛ rɔ, wonu ya a lamɔɛn min kɛ ko ma ara wɔlɛ kundon, anu miliyara bawo anu bara a lɔn ko mata Alla ara ma dɛnbɛ wɔlɛ kɛ rɔ.

¹⁷ Kɛ wati mumɛ bɛɛ kɔrɔ, Tobaya anubɛ Yahudiyanuna kun-tigi donu bi kɛdi sɛbɛla anu nyɔgɔn ma.

¹⁸ Yuda mɔgɔ-siyaman sɔra Tobaya fɛ nun bawo Tobaya biran-kei le Arala den Sɛkanaya la. Min sanɛ wo kuma, Tobayala den Yɛhohanan ya Bɛrɛkayala den Mɛsulamna dunmusi furu.

¹⁹ Min sanɛ wo kuma, hali Tobaya kɔma kilɛ la, mɔgɛnu si a matɔgɔ n ya la. Nde ya kuma-wo-kuma fɔ, anu si ta wo rakaran ale Tobaya ye fanan. Tuma-wo-tuma, ale Tobaya si to kɛdi sɛbɛla n ma alako a ni n makilan.