Nihɛmaya 4 - ALLALA KUMƐ

Nihɛmaya Manyini-Koe Sibolo-Gbɛrɛnu Bolo

¹ Sanbalati ya a lamɔɛn min kɛ ko male Yahudiyanu bara don tara-sɔɛ rɔ, a diminyara dɔgɔma-ma-de! A donta ma mayɛlan rɔ fanan.

² A kɛnɛna a fɔla a na-kelen-nyɔgɛnu anubɛ Samariya kɛlɛ-dannu yala ko, “Yahudiya-manyimanɛ kɛnu miri ye nfen ma? Soe kɛ mumɛ ladan-sɔgɛ le ye anu na, wa? Kɛnu miri ko anu si banna soe kɛ mumɛ bɛɛsi ladanna tele kelen kɔrɔ saraka-bɔɛ fɛ? Anu si buriburi-mintantɛ-kɛ yɛlɛma kurinu na ka bɔn sɔ anu na?”

³ Amon kɛ Tobaya fanan sɔnɛ a dafɛ nyɔ. Wo ko, “Kɛnu si ke tarɛ sufa nyamintan nadanna? Hali fira-nyɛnkumɛ wa a sisa a la, a si bui.”

⁴ Woletɔ n ya Alla matara, n ko, “E, Alla, i wɔlɔ matɔlɔ ma rasɛlɛnu bi min fɔla ma ma. Ma mayɛlɛn-kan ni sɛgi anu kɔgɔ rɔ. I yandi, a ma, mɔgɛ donu ni na anu bira ka ta anubɛ anu bolo-fannu na pon!

⁵ Bawo anu bi ma mayɛlɛnna wɔlɛ kɛla ko la, i yandi, i kana anu makoto anu hakɛ wo la hali ka nyina anu sɔn-yogomɛ ko.”

⁶ Ma ban matarali-kɛla, ma ya mala wɔlɛ dabira tun. A ma mɛ lefan, ma ya tarɛ wo labila a nyɔgɔn ma ka a mayɛlɛ gbagba ha a tɛma bawo ma sɛbɛ donnɛ wɔlɛ wo ma a nya ma.

⁷ Sanbalati wo, Tobaya wo, Arebiyanu wo, Amonnu wo, anubɛ Asadadi kɛnu ya a lamɔɛn min kɛ ko ma ara yanfa Yerusalɛm tara-sɔɛ rɔ, ado anu bara don a labilɛ rɔ anu nyɔgɔn ma, anu dama diminyara kosɛbɛ!

⁸ Woletɔ anu ya yanfɛ kiri ma ma alako anu ni na ma kɛlɛ Yerusalɛm soe burɔ ka ma kɔndɔfili.

⁹ Male ya Alla matara ka kila-makandannɛnu sigi su-ni-tele.

¹⁰ Ma ye wɔlɛ kɛ kun na tumɛ min, Yuda kɛnu ya sigi do sa. Anu ko, “Male dunu-madununɛnu bara bandan. Ma ye buriburi min madununa, wo siya kati! Male dɔrɔn ti ke tarɛ kɛ sɔla.”

¹¹ Ma yogenu miri ko ma ti anu yen. Anu miri ko anu bi ma latɛrɛnala le ka ma faga alako tɔn ni sigi mala wɔlɛ kɛ la.

¹² Kɔnɔ ma yogenu ba gbundi min kiri ma ma, Yahudiya minnu siginɛ anu tɛma, wonu si na ma lalɔn wo la tuma-wo-tuma.

¹³ Woletɔ n ya kɛlɛ-mirannu don wɔli-kɛlɛnu bolo, faan wo, tanba wo, kalabɛn wo. Kan tinɛ minnu na ma ban bɛ, n ya anu sigi tarɛ kɔma iko anu kebilɛ ye nya min.

¹⁴ N ya a yen min kɛ ko kilan ye anu tɔ, n ya a fɔ kun-tiginu anubɛ a mɔgɔ-ba-toenu ye ko, “Ma kana kilan ma yogenu na wona. Wo ni wo miri Mari makawa-nya ma. Ma sibolenu wo, mala dannu wo, mala musinu wo, mala bɔnnu wo, wo ni kɛlɛ kɛ wonuna ko la.”

¹⁵ Ma yogenu ya a lɔn min kɛ ko anuna gbundu bu ara tii, anu ya a yen ko Alla ara anu miriya tinya. Wo kɔma, male dama nara don tara-sɔɛ rɔ tun.

¹⁶ Ka a dabira wati wo ma, mɔgɛ donu bi tara-sɔɛ la, a toe wonubɛ anuna kɛlɛ-kɛ-mirannu sɔnɛ ka anu makandan. A nɛgɛ-fagbatarɛ min sanɛ anu kɔgɔ-dɛ ma wo, a kalabɛn wo, a tanba wo, a nɛgɛ-walan min si kɛlɛ-dan matanka wo, wonu bi anu bolo, ado mala mɔgɔ-banu ya anu se koe kɛ

¹⁷ tara sɔ-ko-wɔlɛ rɔ. Hali minnu bi tarɛ wo sɔ-mirannu madununa, kɛlɛ-kɛ-fan ye wonu bolo kelan rɔ.

¹⁸ Minnu fanan bi wo sɔla, faan kirinɛ wonu bu tɛma. Buru-fɛlɛ sɔnɛ nde fɛ min si ma labila ma yogenu bara-koe la.

¹⁹ N ya a fɔ kun-tiginu anubɛ anuna mɔgɔ-banu anubɛ nyama-toe ye ko, “Wɔlɛ ara siyaya min kɛ, ha ma ma ara sɛgi ma nyɔgɔn na,

²⁰ ni wo ya buru-kan lamɔɛn tumɛ min, wo damasi si na ka kofu n ma. Mata Alla si kɛlɛ kɛ ma ye.”

²¹ Woletɔ tele-wo-tele, ka a bi sɔgɔma ha a la si fin pɔɛ, donu tenbi wɔlɛ kun na, a toe wonubɛ anuna tanbɛnu sɔnɛ.

²² Wo kɔma, n ya a fɔ wɔli-kɛlɛ bɛɛ ye ko wonubɛ anu madɛnbɛnɛnu ni to kila Yerusalɛm soe burɔ yan kɛ wati rɔ. Ni wo mara, wo si a ma, anu ni soe makandan suyi rɔ ka to wɔlɛ kɛla tele rɔ.

²³ Nde wo, n ta-nyɔgɛnu wo, nna wɔli-kɛlɛnu wo, n makandannɛnu wo, ma do-wo-do ma to ma mayɛlɛmana suyi rɔ. Ma dama tora mala kɛlɛ-mirannu namarala ma dafɛ.