Nihɛmaya 11 - ALLALA KUMƐ

Minnu Sigira Yerusalɛm, Wonu Bara-Koe

¹ Kun-tiginu sigira Yerusalɛm soe burɔ, Allata so-sɛnimɛ, kɔni. Mɔgɔ-toenu ya korɔn lakɛ ka a tɛgɛ anu sigi-koe ma Yerusalɛm soe burɔ. Denbaya-tigi tan wa korɔn lakɛ, a si diya denbaya-tigi kelen de la. Wonubɛ ala denbayɛ ni ta anu sigi Yerusalɛm soe burɔ. A to kɔnɔntɛ, wonubɛ anuna denbayɛnu si ta sigi so-nɛnu tɔ.

² Ni min ya a nyɛrɛ bɔ ka ta sigi Yerusalɛm soe burɔ, mɔgɛnu si wo tigi matɔgɔ.

³ Mɔgɔ-toe bɛɛ sigira a benba soe burɔ Yuda nyamanɛ rɔ. Wo kɔma, saraka-masɔlɛ donu wo, anubɛ Lifayi donu wo, anubɛ Bato-Bonna-wɔli-kɛlɛ donu wo, anubɛ Silamɛnita yɔɔn bɔnsɔn wo, wonu sigira anu benba soenu tɔ Yuda nyamanɛ rɔ. Kebila-kunyɛ minnu bɔra Yuda ka ta sigi Yerusalɛm, wonu tɔgɛ le kɛnu na.

⁴ Kɛnu denu bɔra Yuda bɔnsɔn-mɔgɛnu tɔ. Yusayala den Ataya, Sakaraya mamanɛ, kɔni, wo nara sigi Yerusalɛm. Sakaraya wo fa tɔgɛ le Amaraya. Amaraya fa tɔgɛ le Sɛfataya. Sɛfataya fa tɔgɛ le Mahalalɛli. Yudala den Pɛrɛsi, wo sɔrɛ le kɛ dama la.

⁵ Barukila den Meyaseya, Kalihose mamanɛ, kɔni, wo nara sigi Yerusalɛm. Kalihose wo fa tɔgɛ le Hasaya. Hasaya fa tɔgɛ le Adaya. Adaya fa tɔgɛ le Yoyaribu. Yoyaribu fa tɔgɛ le Sakaraya. Yudala den Sela, wo sɔrɛ le doi kɛnu fanan na.

⁶ Pɛrɛsi sɔrɛ minnu malɔnnɛ, wonu yatɛ bɛnta mɔgɔ kɛmɛ nani, mɔgɔ bi-wɔrɔ ani mɔgɔ segin (468) ma. Wonu denu sigira Yerusalɛm soe burɔ.

⁷ Kɛnu denu bɔra Bɛnyamɛ bɔnsɔn-mɔgɛnu tɔ. Mɛsulamna den Salu, Yowɛdi mamanɛ, kɔni, wo nara sigi Yerusalɛm. Yowɛdi wo fa tɔgɛ le Pɛdaya. Pɛdaya fa tɔgɛ le Kolaya. Kolaya fa tɔgɛ le Meyaseya. Meyaseya fa tɔgɛ le Itiyɛli. Itiyɛli fa tɔgɛ le Yɛsaya.

⁸ Kabayi anubɛ Salayi, Salu na-kelen-nyɔgɔ-bɛrɛ le wonu na. Minnu bɔra Bɛnyamɛ bɔnsɔn-mɔgɛnu tɔ ka na sigi Yerusalɛm soe burɔ, wonu yatɛ bɛnta mɔgɔ kɛmɛ kɔnɔntɔ, mɔgɔ mogan-ni-segin (928) ma.

⁹ Wonuna kun-tigi le Sikirila den Yowɛli la. Wo tatugunnɛ le Sɛnuwala den Yuda la.

¹⁰ Saraka-masɔlɛ minnu nara Yerusalɛm soe burɔ, wo le kɛnu na. Yoyaribula den Yɛdaya anubɛ

¹¹ Yakin anubɛ Helikayala den Sɛraya, Mɛsulam mamanɛ, kɔni, wonu denu nara sigi Yerusalɛm. Mɛsulam kɛ fa tɔgɛ le Sedoki. Sedoki fa tɔgɛ le Mɛrayoti. Mɛrayoti fa tɔgɛ le Ahituba, saraka-masɔla-kun-tigi-wɛ, kɔni.

¹² Mɔgɔ kɛmɛ segin, mɔgɔ mogan-ni-fila (822), wonu denu bɔra Sɛraya bɔnsɔn rɔ ka na Bato-Bon-wɔli-kɛ-tinɛ. Yɛrohamna den Adaya, Pɛlalaya mamanɛ, kɔni, wonu nara sigi Yerusalɛm. Pɛlalaya fa tɔgɛ le Amasi. Amasi fa tɔgɛ le Sakaraya. Sakaraya fa tɔgɛ le Pasura. Pasura fa tɔgɛ le Malakiya.

¹³ Kebila-kun mɔgɔ kɛmɛ fila, mɔgɔ bi-nani ani mɔgɔ fila (242) bɔra bɔnsɔn kɛ rɔ. Asarɛlila den Amasayi, Ahesayi mamanɛ, kɔni, wo nara sigi Yerusalɛm. Ahesayi fa tɔgɛ le Mɛsilemoti. Mɛsilemoti fa tɔgɛ le Imɛri.

¹⁴ Kebilɛ kɛ rɔ, mɔgɔ kɛmɛ anubɛ mɔgɔ mogan-ni-segin mara kɛlɛ-den-tagbɛlɛnu na. Anuna kun-tigi le Hagidolila den Sabadiyɛli la.

¹⁵ Lifayi minnu nara sigi Yerusalɛm soe burɔ, wonu tɔgɛ le kɛnu na. Hasubula den Sɛmaya, Asiraikam mamanɛ, kɔni, wo nara sigi Yerusalɛm. Asiraikam fa tɔgɛ le Hasabaya. Hasabaya fa tɔgɛ le Buni.

¹⁶ Sabɛtayi anubɛ Yosabadi, wonu denu bi Bato-Bon-kata-burɔ wɔli-kɛlɛnu kun na.

¹⁷ Maikala den Matanaya, Sabadi mamanɛ, kɔni, wo nara sigi Yerusalɛm. Sabadi fa tɔgɛ le Esafi. Anu tenbi baraka-bira-bɛti bɔla, Matanaya wo le bɛti-bɔlɛnu ya rɔ. Matanaya kan-kɔrɔ-sigilɛ le Bakibukiya la. Samowala den Abida, Kelali mamanɛ, kɔni, wo nara sigi Yerusalɛm. Kelali fa tɔgɛ le Yɛdutun.

¹⁸ Lifayi mɔgɛ minnu sigira Yerusalɛm, Allata so-sɛnimɛ, kɔni, wonu yatɛ bɛnta mɔgɔ kɛmɛ fila, mɔgɔ bi-segin ani mɔgɔ nani ma.

¹⁹ Bato-Bon-da-makandannɛ minnu nara Yerusalɛm, wonu tɔgɛ le kɛnu na. Akubu anubɛ Talamɔn wonubɛ anu na-kelen-nyɔgɔ mɔgɔ kɛmɛ ani mɔgɔ bi-wɔrɔnfila ani mɔgɔ fila (172) le nara sigi Yerusalɛm.

²⁰ Kɔnɔ Isirɛla mɔgɛ toenu anubɛ saraka-masɔla-toenu anubɛ Lifayi-toenu, wonu sigira anu halala-fannu kun na soe donu tɔ Yuda nyamanɛ rɔ.

²¹ Bato-Bonna-wɔli-kɛlɛnu sigira Yerusalɛm soe tɔnkɔn do rɔ min tɔgɛ Ofɛli. Wonu wɔlita Saiha anubɛ Kesepa kɔrɔ.

²² Lifayi minnu siginɛ Yerusalɛm, wonu wɔlita Banila den Yusayi kɔrɔ, Hasabaya mamanɛ, kɔni. Hasabaya fa tɔgɛ le Matanaya. Matanaya fa tɔgɛ le Maika. Yusayi bɔra Esafi kebilɛ rɔ. Wonu denu bi Bato-Bɔn fɔli-kɛ anubɛ a sigi-sɛ kun na.

²³ A bɛnta, kebilɛnu ni to sigi sala tele-wo-tele nya min, wo tɔn siginɛ mansɛnu bolo.

²⁴ Mɛsɛsabɛlila den Pɛtahaya min bɔra Sera kebilɛ rɔ Yuda bɔnsɔn rɔ, Pasiya mansɛ hɛnkili-kɔlɛ le wo la ka bɔ Isirɛla mɔgɛnu tɔ.

Soe Doinu Bara-Koe Yuda Nyamanɛ rɔ

²⁵ Mɔgɔ-siyaman sigira anuna soenu tɔ anuna sɛnɛnu bi minnu da kɔrɔ. Yuda bɔnsɔn-mɔgɛnu sigira Kiriyati-Araba anubɛ Dibon anubɛ Yɛkabisɛli soenu tɔ anubɛ nyɔ-dafɛ-so-mɛsɛnu tɔ.

²⁶ Anu sigira fanan Yɛsuwa anubɛ Moleda anubɛ Bɛti-Pɛlɛti

²⁷ anubɛ Hesa-Suwali anubɛ Biri-Siba soenu tɔ anubɛ nyɔ-dafɛ-so-mɛsɛnu tɔ.

²⁸ Anu sigira Sikilagi anubɛ Mɛkona soenu tɔ anubɛ nyɔ-dafɛ-so-mɛsɛnu tɔ fanan.

²⁹ Anu sigira fanan Ɛnrimɔn anubɛ Sora anubɛ Yaramuti

³⁰ anubɛ Sanowa anubɛ Adulam soenu tɔ anubɛ nyɔ-dafɛ-so-mɛsɛnu tɔ. Anu sigira fanan Lesi soe anubɛ togodɛ minnu bi nyɔ dafɛ. Anu sigira Asika soe anubɛ nyɔ-dafɛ-so-mɛsɛnu tɔ. Soe min bɛɛsi madannɛ kɛ la, wonu bi Biri-Siba soe anubɛ Hinom lɛɛ tɛma le Yuda nyamanɛ rɔ.

³¹ Bɛnyamɛ bɔnsɔn-mɔgɛnu sigira Kiba anubɛ Mikimasi anubɛ Eyai anubɛ Bɛtɛli soenu tɔ anubɛ nyɔ-dafɛ-so-mɛsɛnu tɔ.

³² Anu sigira Anatɔti anubɛ Noba anubɛ Ananaya anubɛ

³³ Hesɔ anubɛ Rema anubɛ Kita anubɛ

³⁴ Hededi anubɛ Sebom anubɛ Nebalati anubɛ

³⁵ Lodi anubɛ Ono soenu tɔ anubɛ lɛɛ wo rɔ anu si min kele ko Boloma-Wɔli Kɛlɛnuna Lɛɛ.

³⁶ Anu ya Lifayi kurɔn donu bi alako anu ni bɔ Yuda bɔnsɔn-mɔgɛnu tɛma ka ta sigi Bɛnyamɛ bɔnsɔn-mɔgɛnu tɛma.