Nihɛmaya 1 - ALLALA KUMƐ

¹ Hakalayala den Nihɛmaya ya kumɛ minnu sɛbɛ, wo le kɛnu na. Pasiya Mansa Atasakasila mansayɛ san mogan ma, wo karɛ min tɔgɛ Kisilɛfi, wo ya a taran, nde, Nihɛmaya ye Susa so-karantan burɔ Pasiya nyamanɛ rɔ nun.

Nihɛmaya Miri-Koe Yerusalɛm Wara-Koe Ma

² N na-kelen-nyɔgɛ min tɔgɛ Hanani, wonubɛ a ta-nyɔgɛ donu nara ka bɔ Yuda nyamanɛ rɔ. N ya anu manyinika Yerusalɛm soela ko ma anubɛ ma ta-nyɔgɛ Yahudiya mɔgɔ-birani-kɔrɛ minnu bara bɔ yan ka ta nyɔ.

³ Wonu ko mɔgɔ-birani-kɔrɛ minnu kunyɛ ma to-a-rɔ, wonu sɛgira Yerusalɛm. Anu kɔndɔfilinɛ kaka dɔgɔma-ma-de! Anu ko fanan ko sibolo-gbɛrɛ minnu bi anuna foolɛ rɔ, wonu yigi tɛgɛnɛ anu tɔ. Anu ya min fɔ n ye Yerusalɛm wara-koe rɔ ko kebi anu ya nyɔ-tarɛ keri ka a don-dɛnu mintan, ha bi, nyɔ tinyanɛ. A la ma dan bɛ.

⁴ N ya wo lamɔɛn nkɛkuna, n ya n sigi ka don diyi-kɛ rɔ. Tele siyaman, n bi diyi kɛ kun na, ado fen-dɔn-sɔgɔ ma n bira. N ya Arinyɛnɛ-Tigi-Alla matara, n ko,

⁵ “E, Mari Alla-makawanɛ min bi san-kole rɔ, i kolo, ado ma ye i gbiliyala. Ma sarata min ma, i ye itɛ wo lakandanna ita mɔgɛnu ye, i di minnu ye, kɔni. Anu si i sako kɛ fanan.

⁶ I yandi, n mafɛlɛn i kolan la ka i wɔlɔ matɔlɔ nna matarali-kan la. N bi mataralɛ kɛla Isirɛla mɔgɛnu ye su-ni-tele. N bara n sɔ a la ko mabɛ Isirɛla mɔgɛnu bara hakɛ kɛ. Min sanɛ wo kuma, wo le n fata kebilɛtɛ la.

⁷ I ya ila tɔn minnu don Nɛbi Musa bolo Isirɛla mɔgɛnuna ko la, ma ma sɔn wonu birala. Ma ara ko yogomɛ kɛ i la. Wo le wara a ma, ma ara bila i la.

⁸ I yandi, i wara koe minnu fɔ Nɛbi Musa ye nun, i fonde lamiri wonu ma. I ko ni male Isirɛla mɔgɛnu ma ma telen i ye, i si ma ranyɛnsɛn sibolo-gbɛrɛnu tɛma.

⁹ Kɔnɔ ni ma sɛgira i ma tun ka ileta tɔnnu bira, i si ma kundɛn tun kan tinɛ wo rɔ ile ya min yabɔ i bato-tinayɛ la. I ko hali ma basanta duninya-tonko-nanɛ bɛɛ la, i si ma kundɛn tun.

¹⁰ “Mari, i yandi, ita wɔli-kɛlɛ anubɛ ita mɔgɛ le anu na. I ya anu kunyɛ bɔ gbaran rɔ ita sɛnbɛ-makawanɛ la.

¹¹ I wɔlɔ matɔlɔ nta matarali-kan la anubɛ minnu bi i gbiliya-koenu mala ka wonu fananta matarali-kan lamɔɛn. I yandi, n ba ta n sɔ mansɛ yakɔrɔ bi, n ba ko-wo-ko fɔ a ye, wo la ni tɔnbagaya. A ma, mansɛ ni a ya-nyimɛ yira n na.” Mansɛla baan-bɔlɛ le nde la wo wati rɔ.