Nehami 3 - ALLALA KUMƐ

¹ Wole Ninɛfa kɛnu, foninya-fɔlɛnu anubɛ niyi-bɔlɛnu bi wola soe min tɔ, soe wo si kasara pɔ! Wola soe wo lafanɛ mɔgɛnuna fen-kolomɛ minnu na, wo yogenu si na wonu bi wo bolo ka ta wonu na pon!

² Wo ni wo tole masɔ soeenu-gbesi-kan la soi! Kirindinu-kiannu bi tala sɔnkɔla, gbɔgɔn gbɔgɔn gbɔgɔn! Soeenu bi anu burila, barr barr barr! Kirindinu bi anu burila, gbara gbara gbara!

³ Wo ni wo yɛ lata so-laburilɛnu ma. Anu bi anuna soeenu naburila wɛ kɛ. I ma a yen? Anuna faannu anubɛ anuna tanbɛnu silɛ ye tiila anu ma. Mɔgɔ ti ban furi minnu dan lɔnna, i ma anu siyamɛnu nadɛnnɛ yen tala anu nyɔgɔn kuma? Mɔgɛnu bi belenna anu kian natugula furi wonu na.

⁴ Ninɛfa kɛnu, wola soe mani de iko musu-yɛlan, woletɔ Alla ye ale soe tɔrɔla. Ale musu-yɛlan-miran si kei bira a kila-bɛrɛbɛrɛ fɛ, ado tɔ-a-la, bɛsɛ ye a bolo min si kei wo warata-kilɛ lafaga a ma. Wola soe kɛ miran diginta nyamani-gbɛrɛkɛ-mɔgɛnu ma ka anu ma yɔɔn la ka le.

⁵ Mari Sɛnbɛ-Bɛɛ-Tigi ko a si ile Ninɛfa soe tɔrɔ. A ko a si ile Ninɛfa lakolonya alako duninya ni i lakolɔn yen.

⁶ A ko a si buriburi rawuya i rɔ alako i ni a lɔn ko i gbo a ye. Min ba i yen, wo si nyima i rɔ.

⁷ Mɔgɔ-wo-mɔgɔ wa i yen, a si sɛgi a kɔma kilɛ la kilan bolo. Anu si a fɔ ko, “Ninɛfa ara yɛlɛma sundu-kunyɛ la.” Mari ko a ma mɔgɔ-wo-mɔgɔ yen a kolan la min si di Ninɛfa soe kɛla ko la. A wu-bɔ-sɔgɔ ti mɔgɔ-wo-mɔgɔ bira.

⁸ Ile Ninɛfa soe, i miri ko i fisa Tibisi soe ko Iyipiti nyamanɛ rɔ? Iko mɔgɔ ti ke Nayɛli bɛ tɛgɛla nya min, min bi ile Tibisi soe dafɛ a latanka-koe la, Yufereti bɛ min bi Ninɛfa soe dafɛ, mɔgɔ ti ke wo fanan tɛgɛla wo nya na le.

⁹ Tibisi soe kɛ, Sudan nyamanɛ tora ale le kɔrɔ. Iyipiti mumɛ fanan tora ale le kɔrɔ. Ata sɛnbɛ-dan ma taran. Anubɛ Puti kɛnu anubɛ Libiya kɛnu tora ko-kelen tɔ.

¹⁰ Kɔnɔ hali wo, ale Tibisi kɛnu yogenu tara anu dununa pon! Anu yogenu ya anuna dannu bi ka anu gbesi dugi la ha anu fagara. Anu ya wo ma kan-tina-siyaman tɔ soe wo burɔ. Anu ya anuna mɔgɔ-banu kiri yɔlɔkɛnu na. Wo kɔma, anu ya mɔgɔ-ba wonu tatala koron-nakɛ fɛ.

¹¹ A si ma ile Ninɛfa nyɛrɛ yala iko i wara i min ha i kun ta ara fin. I si i dogon-tinɛ nyini i yogenu kɔrɔ alako i si kisi nya min kɔnɔ i ti wo yen muk!

¹² Wole Ninɛfa kɛnu, wola so-latankanɛ kɛ si ma iko toro-kuri min mɔɛ ye a la bawo mɔgɔ wa a gbisin-gbisin doni, a gbɔɛ wonu si yalan a da rɔ.

¹³ Wola kɛlɛ-dannu ma kɛlɛ-kɛ-kɛwuya fenfen lɔn tun. Anu mun na ara tɛgɛ iko musi. Wola nyamanɛ mumɛ ti ke anu nyɛrɛ kumafunfanna tun. Tɛ si wola tarɛ-da-rasɔgɔ-fan mintan.

¹⁴ Wole Ninɛfa kɛnu, wo ni wo raya ka wo mabɛn kɛlɛ fɛ-yan-bɛla ko la. Wo ni yi madunu wola soe burɔ bawo wola soe kuruntɔɛ le. Wo ni wola tarɛ sɔ fanka rɔ. Wo ni wola bulɔku-gbesi-fannu nadan ka dugu-namɛ laboro kɛnti!

¹⁵ Hali wo ya wo raya nya-wo-nya, ni min kunyɛ ma to kɛlɛ rɔ, tɛ si wo tigi mintan gburr! Wo wara-koe si ka-a-la iko kondɔnnu si ki-fan wara-koe ka-a-la nya min. Wo ni wo raya! Wo ni siyaya iko kondɔnnu.

¹⁶ Yila minnu bi wo tɛma, wonu siya nun iko lolenu. Kɔnɔ kaka, yila wonu bara gban ka wo boloka iko kondɔnnu ba ban fala, wonu bi gbanna nya min ka ta anu ye.

¹⁷ Wola mɔgɔ-banu mani de iko tɔngbangbɛ minnu bi sigila bon-dandan ma kimɛ rɔ. Kɔnɔ kimɛ wa ka tumɛ min, anu ni gban anu ye ka ta. Mɔgɔ-wo-mɔgɔ ti a lɔn anu bi anu kun telenna kannu na.

¹⁸ Ile Asiriya mansɛ, ila kun-tiginu bara faga don! Ila nyamanita-mɔgɛnu ta ara nyɛnsɛn kɔnkɛnu kuma iko sagɛ minnu kandanna sa. Kun-tigi wo kun-tigi sa anu bolo min si anu kundɛn soe burɔ tun.

¹⁹ Bɛsi-wo-bɛsi sa wola tɛlɛnuna ko la, ado wola tɛlɛ wonu ti kɛndɛya muk! Mɔgɔ-wo-mɔgɔ wa a lamɔɛn ko wo ara halaki, wo si lɛnkɛ gbesi sewɛ bolo bawo wo ara karagbɛlɛya-siyaman sigi mɔgɛnu na nun.