Matiyu 9 - ALLALA KUMƐ

Hakɛ Makoto-Koe

¹ Yisa sigira kulɔn rɔ ka dalɛ tɛgɛ ka ta a warɛ soe burɔ.

² Kei min solomonya-faganɛ a la, mɔgɛ donu nara wo la Yisa wara. A sanɛ sanyili rɔ. Yisa ya anuna dɛnkɛninya-wɛ yen tumɛ min, a ya a fɔ kirayatoe wo ye ko, “N bɔ, i yisi sa! I hakɛnu ma ara koto.”

³ Nba, tɔn-karan-mɔgɛ donu ya a fɔ anu nyɔgɔn tɛma ko, “E, kei kɛ ye kumala iko Alla le ale la. A ye Alla lafɛyala.”

⁴ Yisa ya anuna miriya ragbɛ. A ko, “Wo ye wo mirila ko-yogomɛ ma nfenna?

⁵ Ka a fɔ ko i hakɛnu ma ara koto, anubɛ ka a fɔ ko i lasɔ ka tagama, nyamintan fɔɛ gbɛlɛ?

⁶ N si a yira wo la ko sɛnbɛ ye nde, Hadama-dan bolo dugu-kole kɛ kuma ka hakɛ makoto.” Woletɔ a ya a fɔ kirayatoe wo ye ko, “I lasɔ ka ila sanyili bi. Sɛgi i warɛ bɔn la!”

⁷ Kei wo ya a lasɔ. A sɛgira a warɛ.

⁸ Mɔgɛnu ya a yen tumɛ min, anu kawara. Anu ya Alla tanto bawo a ara sɛnbɛ-su wo di mɔgɛnu ma.

Matiyu Kele-Koe

⁹ Nba, Yisa bɔra nyɔ tumɛ min, a ya duti-makelelɛ do yen. A tɔgɛ Matiyu. A siginɛ ala wɔli-kɛ-tinɛ. Yisa ya a fɔ a ye ko, “Bila n fɛ.” Matiyu ya a lasɔ ka bila a fɛ.

¹⁰ Yisa ye fen-dɔn la Matiyula bɔn la tumɛ min, duti-makelelɛ siyaman anubɛ hakɛ-tigi siyaman nara ka sigi ale anubɛ ala karan-dannu fɛ nyɔ.

¹¹ Farisi donu ya wo yen min kɛ, anu ya a fɔ Yisala karan-dannu ye ko, “Nfenna wo karan-mɔgɔ ye fen-dɔn-kɛla duti-makelelɛnu anubɛ hakɛ-tiginu fɛ?”

¹² Yisa ya anu kan lamɔɛn nkɛkuna, a ya a fɔ anu ye ko, “Mɔgɛ minnu kɛndɛ, wonu mako sa bɛsi-bɔlɛ la fɔ minnu kirɛ.

¹³ Wo ta kumɛ kɛ kɔrɛ nyini Allata kitabu rɔ ko, ‘A sa nyinina saraka-soge ma ma bolo fɔ kinikinɛ,’ bawo n ma na mɔgɔ-telennɛnu kele tinɛ fɔ hakɛ-tiginu alako wonu ni bila n fɛ.”

Sun-Don-Koe Nyinikalɛ

¹⁴ Yɔni-Batasi-Kɛlɛ gba-fɛ-bilalɛnu nara Yisa wara ka a manyinika ko, “Malebɛ Farisinu bi sunyɛ donna tuma-wo-tuma kɔnɔ nfenna ila karan-dannu ti sunyɛ don mumɛ?”

¹⁵ Yisa ya anu yabi ko, “A ye wo burɔ ko mɔgɛ minnu bi kɔnyɔ-masɔɛ rɔ, fananta kɔnyɔ-tigi ye anu fɛ, wonu si di, wa? Wo ti ma mumɛ! Kɔnɔ a wati wa ke, anu ba kɔnyɔ-tigi wo bi anu tɛma tumɛ min, anu si sunyɛ don worɔ.

¹⁶ “Mɔgɛ ti kura-kundu-kɛndɛ bi ka duruku-kɔrɛ labɛtɛrɛ wo la bawo a kɛndɛ wo ra si don ka duruku-kɔrɛ wo rafara ka tenbi a fɔlɔtɛ la.

¹⁷ Mɔgɔ ti ke baan lamarala gbolo-bɔrɔ-kɔrɛ rɔ. Ni a ya wo ma, a wa kanfa, a si gbolo-bɔrɔ-kɔrɛ wo rafara. Baan wo si bon. Gbolo-bɔrɛ wo si tinya. Kɔnɔ baan la ni mara gbolo-bɔrɔ-kurɛ rɔ. A filɛ bɛɛ la si mara a kin na worɔ.”

Mɔgɛ Donu Nakɛndɛya-Koe

¹⁸ Nba, Yisa ye kɛ fɔla anu ye tumɛ min, Yahudiyanuna kun-tigi do nara a wara ka a nyɛnkin a kɔrɔ. A ko, “Nna dunmusi faga-san le. I yandi, na. I ni i kɔɛn sa a kuma alako a niyi ni sɛgi a rɔ tun.”

¹⁹ Nba, Yisa ya a lasɔ. Anubɛ ala karan-dannu bilara kun-tigi wo fɛ.

^20-21 Anu tamatoe, musi do ye nyɔ musinuna kirayɛ ye min na san tan-ni-fila kɔrɔ. A ya a fɔ a yisi rɔ ko, “Ni n ya n bole tugu ala duruki da-gbole la dɔrɔn, n si kɛndɛya.” Woletɔ a nara Yisa kɔma ka a bole tugu ala duruki da-gbole la.

²² Yisa ya a tintan tumɛ min, a ya ale musi yen. A ya a fɔ a ye ko, “N na, i yisi ni kimɛ! Ila dɛnkɛninyɛ ara i lakɛndɛya.” Musi wo kɛndɛyara wati kelan wo kɔrɔ tiriya!

²³ Nba, anu ke, Yisa donta kun-tigi wola bɔn la. A ya saya-sigi-salɛnu anubɛ saya-di-kɛlɛnu yen tumɛ min,

²⁴ a ko, “Wo bɛɛ bɔ yan! Dunmusu kɛ fagani ma. A ye kinɔgɛ le tɔ dɔrɔn.” Anu dama ya Yisa mayɛlan dabira.

²⁵ Mɔgɛnu banta bɔla nya min wo, Yisa donta furi wo kuma bɔn la ka a bira a bole ma. Dunmusi ya a lasɔ.

²⁶ Wo yen mɔgɛnu bolo, ala kabana-ko-mankan nyɛnsɛnta nyamanɛ wo kan tinɛ bɛɛ rɔ.

Fiyon Filɛ Lakɛndɛya-Koe

²⁷ Yisa bɔra nyɔ tumɛ min, kei-fiyon fila bilara a fɛ. Anu bi gbele-gbelenna ko, “Mansa Dawudala dan, kinikini ma ma!”

²⁸ Yisa donta bɔn la tumɛ min, kei-fiyon filɛ wonu nara a wara. A ya anu manyinika ko, “Wo lanɛ a la ko n si ke wo yɛ lakala, wa?” Anu ya a yabi ko, “Ma tigi, ɔnde!”

²⁹ Nba, Yisa ya a bole tugu anu yɛ la. A ko, “A ni ma wo ye iko wo dɛnkɛninyanɛ nya min!”

³⁰ Tiriyɛ wo rɔ, anu yɛ lakara. Yisa ya anu makawandi bɛrɛkɛ! A ko, “Wo kana kɛ fɔ mɔgɔ-wo-mɔgɔ ye de!”

³¹ Kɔnɔ anu tara Yisata kabana-koe wo nyɛnsɛn nyamanɛ wo kan tinɛ bɛɛ rɔ.

Nyinato Bobe Kɛndɛya-Koe

³² Nba, mɔgɔ filɛ wonu bi bɔla bɔn la ka wo, mɔgɛ donu nara kei do la Yisa wara min ti ke kumala bawo nyinatoe le.

³³ Yisa ya nyinɛ gben nya min wo, kei wo ya kumɛ dabira. Mɔgɛ bɛɛ kawara! Anu ko, “Ma ma kɛ nyɔgɔn kabana-koe yen bɛ Isirɛla nyamanɛ rɔ mumɛ!”

³⁴ Kɔnɔ Farisinu ya a fɔ ko, “Nyina-mansɛ le ye sɛnbɛ wo dila a ma ko a ni nyinɛnu gben.”

Yisa Kinikini-Koe Mɔgɛnu Ma

³⁵ Nba, Yisa tara so-wɛnu anubɛ so-mɛsɛnu tɔ. A ya mɔgɛnu kɔndɔn ka anu karan Yahudiya-dina-bɔnnu na. A ya kibara-nyimɛ kawandili bɔ ka kiraya-sufa bɛɛ lakɛndɛya mɔgɛnu na.

³⁶ A ya nyama yen tumɛ min, a yisi lafara kinikinɛ la anuna ko la bawo anu kɔndɔfilinɛ. Anu ti ke anu nyɛrɛ fɛ-birala iko sagɛ minnu fɛ-birala sa.

³⁷ Nba, a ya a fɔ ala karan-dannu ye ko, “Fui-fan-tɛgɛtɛ kolo kɔnɔ a tɛgɛlɛnu ma siya.

³⁸ Wo ni sɛni-tigi madiya alako a ni wɔli-kɛlɛnu nata ala fui-fan tɛgɛ tinɛ.”