Matiyu 8 - ALLALA KUMƐ

Fɛrɛma-Yogoma Kirayatoe Lakɛndɛya-Koe Yisa Bolo

¹ Yisa bɔra kɔnkɛ kuma tumɛ min, nyama tugura a fɛ.

² Nba, fɛrɛma-yogoma-kirayatoe do nara a wara ka a nyɛnkin Yisa kɔrɔ. A ko, “N fa, ni i ye a fɛ ka n nakɛndɛya, n ya a lɔn ko wo sɛnbɛ ye ile bolo ka n nakɛndɛya.”

³ Yisa ya a bole sa kirayatoe wo kuma. A ya a fɔ a ye ko, “N bara sɔn i lakɛndɛya-koe ma.” A fɛrɛ kɛndɛyara tiriya!

⁴ Wo kɔma, Yisa ya a fɔ a ye ko, “I tole masɔ! I kana kɛ fɔ mɔgɔ-wo-mɔgɔ ye kɔnɔ ta saraka-masɔlɛ wara tiriya! I ni i nyɛrɛ yira a la iko tɔn ya a fɔ nya min. Nɛbi Musa ya sarakɛ minna ko fɔ, i ni wo bɔ ka a yira mɔgɛ bɛɛ la ko i wara kɛndɛya.”

Romu Kɛlɛ-Kunyɛ, Wola Lanayɛ Wara-Koe

⁵ Yisa donta Kapereniyam soe burɔ tumɛ min, Romu kɛlɛ-den-kun-tigi do nara a wara. A ya Yisa madiya a dɛnbɛn-koe la.

⁶ A ko, “N fa, nna wɔli-kɛlɛ kirɛ sani bɔn la. A ti ke a mamagala. A tɔrɔnɛ dumɛ bolo kati!”

⁷ Yisa ko, “N si ta a lakɛndɛya.”

⁸ Kɛlɛ-den-kun-tigi wo ya a fɔ a ye ko, “Ade, n fa. A ma bɛn, i ni i salɛ ladon nde sufala bɔn la. Hali i kumara le dɔrɔn, nna wɔli-kɛlɛ si kɛndɛya.

⁹ Nde ye kɛlɛ-den-kunyɛ donu kɔrɔ. Kɛlɛ-dannu bi nde fanan kɔrɔ. N ba a fɔ wo do ye ko, ‘Ta!’ A si ta. N ba a fɔ, ‘Na!’ A si na. N ba a fɔ nna yɔɔn ye ko, ‘Kɛ ma!’ A si wo ma.”

¹⁰ Yisa ya wo lamɔɛn tumɛ min, a kawara. A ya a fɔ a gba-fɛ-bilalɛnu ye ko, “Wo ni wo hɛnkili to kɛ ko! N ma kɛ-nyɔgɔn-dɛnkɛninyɛ yen mɔgɔ-wo-mɔgɔ bolo Isirɛla mɔgɛnu tɛma.

¹¹ Wo ni wo hɛnkili to kɛ ko! Mɔgɔ siyaman si na ka bɔ duninya fan bɛɛ rɔ ka ladiyɛ kɛ Iburayima anubɛ Isiyaka anubɛ Yakoba fɛ Allata mansayɛ rɔ min bi Arinyɛni tɔ.

¹² Kɔnɔ minnu bɛnnɛ nun ka don Allata mansayɛ rɔ, wonu na si fili pinpi-makilannɛ rɔ. Anu si di nyɔ ka anu nyin masɔgɔ dumɛ bolo.”

¹³ Wo kɔma, Yisa ya a fɔ kun-tigi wo ye ko, “Ta ila bɔn la. Ila wɔli-kɛlɛ ara kɛndɛya ka a tɛgɛ ila dɛnkɛninyɛ ma.” Nba, kun-tigi wola wɔli-kɛlɛ kɛndɛyara wati wo nyɛrɛ rɔ.

Pita Biran-Musila Kɛndɛya-Koe

¹⁴ Yisala tɛ Pitala bɔn la, a ya Pita biran-musi fɛrɛma-kaliyanɛ sanɛ taran nyɔ.

¹⁵ Yisa ya musi wo bole bira tumɛ min, fɛrɛma-kaliyɛ ya a boloka. Musi wo ya a lasɔ ka wɔlɛ kɛ dabira Yisa ye.

¹⁶ Wo wulɔn wurɛ la, mɔgɛnu nara nyinatoe siyaman na Yisa wara. Yisata kumɛ ya nyina-yoge wonu gben. Min bɛɛsi kirɛ, a ya wo bɛɛ lakɛndɛya.

¹⁷ A ya wo ma alako Nɛbi Aiseya kan ni bɔ-a-la ko, “A ya mala kirayɛnu bi ma ye ka mala gbandayɛnu bɔ ma rɔ.”

Yisa Gba-Fɛ-Bilalɛnu Wara-Koe

¹⁸ Yisa ya a yen min kɛ a lafoonɛ nyama-belebele-wɛ la tumɛ min, a ya a fɔ ala karan-dannu ye ko, “Ma ni ta dalɛ kɔgɔma.”

¹⁹ Tɔn-karan-mɔgɛ do nara a wara. A ko, “Karan-mɔgɔ, i tara kan-bo-kan, n tabɛnnɛ ka bila i fɛ nyɔ.”

²⁰ Yisa ya a fɔ a ye ko, “Farannu bi banbannu bolo anu si ki kan min. Kona-nyagannu bi konanu bolo fanan kɔnɔ kun sa tinɛ sa nde, Hadama-dan bolo.”

²¹ Ala karan-dan do ya a fɔ a ye ko, “N fa, sɔn, n ni ta n fa togon fɔlɔn.”

²² Yisa ya a fɔ a ye ko, “Bila n fɛ. Mɔgɔ-faganɛnu ni anuna mɔgɔ-faganɛ togon.”

Fɔnyɔ-Makuma-Koe Yisa Bolo

²³ Yisa anubɛ ala karan-dannu siginɛ kulɔn wo rɔ.

²⁴ A ma mɛ, fɔn-belebele kerita anu kun na. Nba, yi burunda lunku-lankana ka kɛ kulɔn rɔ. Kɔnɔ wo ya a taran, Yisa ye kinɔgɔ rɔ nun.

²⁵ Karan-dannu tara a wara ka a lakunden. Anu ko, “Mari, ma lakisi! Ma ye nala fagala!”

²⁶ Yisa ya a fɔ anu ye ko, “Wo kilannɛ nfenna? Wola dɛnkɛninyɛ ma kolo mumɛ!” Wo kɔma, a ya a lasɔ ka fɔnyɔ anubɛ yi makuma. Fɔnyɔ anubɛ yi wo sigira-a-la don!

²⁷ Karan-dan wonu bɛɛ kawara. Anu ya anu nyɔgɔn manyinika ko, “Nfen mɔgɔ-sufa ye kɛ la? Hali fɔnyɔ anubɛ yi ye ata kumɛ birala!”

Nyinato Filɛ Lakɛndɛya-Koe

²⁸ Yisa tara Kadara kɛnuna nyamanɛ rɔ dalɛ tɔnkɔn kelan rɔ. Nyinato fila ya a taran nyɔ minnu siginɛ kaburu-soe burɔ. Nyinɛnu bi mɔgɛ wonu fɛ, ado gbalo-mɔgɛ le wonu na kati! Anu yogoyara ha mɔgɔ-wo-mɔgɔ ti sisi bɔla kilɛ wo fɛ.

²⁹ Tiriyante wo rɔ, anu gbele-gbelenta ko, “Allala dan, i ye nfen nyinina ma fɛ? I wara na ma tɔrɔ-koe la, yanni ma kiti-wati ni ke, wa?”

³⁰ Kɔsɔ-mɛlan-wɔrɛ taranta anu de-nyinina nyɔ.

³¹ Nyinɛnu tora Yisa madiyala ko, “Ni i ye ma gbenna le, nba, ma ladon kɔsɔ-mɛlan kɛnu tɔ.”

³² Yisa ya a fɔ anu ye ko, “Wo ta.” Woletɔ anu tara ka don kɔsɛnu tɔ. Kɔsɛ wo bɛɛ burumatoe yigira kɔnkɔ-kerikerinya la ka bui dalɛ rɔ. Anu fagara nyɔ.

³³ Nba, minnu bi kɔsɛ wonu fɛ-birala nun, wonu burumatoe tara soe. Koe min mara nyinato-kɔrɛnu anubɛ kɔsɛnu na, anu ya wo bɛɛ lakaran mɔgɛnu ye.

³⁴ Min bɛɛ ye soe wo rɔ, wonu nara Yisa labɛn tinɛ. Anu ya a yen tumɛ min, anu ya a madiya ko, “I yandi, bɔ mala nyamanɛ kɛ rɔ.”