Matiyu 7 - ALLALA KUMƐ

Mɔgɔ Yiliki-Koe

¹ Yisa ko, “Wo kana mɔgɛnu yiliki, woletɔ Alla ti wole fanan yiliki

² bawo wo ye mɔgɛnu yilikila nya min, Alla ye wole fanan yilikila wo nya na le. Wo wa a ma mɔgɛnu ye nya min, Alla si a ma wole fanan ye wo nya na le.

³ Nfenna ko la, i si buriburi yen i ta-nyɔgɛ yɛ ma kɔnɔ kɔn-gbondon min bi ile nyɛrɛ yɛ ma, i hɛnkili sa tugula wo la?

⁴ I ye i sisila a fɔla i ta-nyɔgɛ ma kama worɔ ko, ‘Na, n ni buriburi bɔ i yɛ ma,’ ado kɔn-gbondon ye ile fɔlɔn yɛ ma?

⁵ Ile nyɛrɛ-mayiralɛ! Kɔn-gbondon bɔ ile fɔlɔn yɛ ma, wo kɔma, buriburi min bi i ta-nyɔgɛ yɛ ma, i si ke wo yenna ka wo bɔ a ma.

⁶ “Wo kana fen-sɛnimɛ di wulinu ma bawo ala ban, anu si sɛgi wo kan ma ka wo kin. Wo kana kuru-da-gbɛlɛnu nakɛ kɔsɛnu kɔrɔ bawo anu si wonu tatɛntɛn anu kian kɔrɔ.

Mako Sa-Koe Alla Tontɛ Kɔrɔ

⁷ “To tarali kɛla, wo si a sɔrɔn. To nyininɛ kɛla, wo si a yen. To dɛ matugula, a la si ka wo ye.

⁸ Min ba to tarali kɛla, wo si a sɔrɔn. Min ba to nyininɛ kɛla, wo si a yen. Min ba to dɛ matugula, a la si ka wo ye.

⁹ Yonna dan si a tara biredi ma, a ni kuri don a bolo?

¹⁰ A wa a tara yɛgɛ ma, a ni duguma-fan don a bolo?

¹¹ Hali wole min yogo, wo ya a lɔn ko a kin ka fen-nyimɛ di wola dannu ma. Wo Fa min bi Arinyɛni tɔ don, wo ti fen-nyimɛ di wo ma min tenbira wo la, wa? Ale ma tenbi wo la, wole min bi a tarala, kɔni?

¹² “Alla ya tɔn min di Nɛbi Musa ma anubɛ nɛbinuta karan, wo kɔrɛ le kɛ la ko, ‘Wo ye a fɛ, mɔgɛ donu ni min ma wo ye, wole fanan ni wo ma anu ye.’

Don-Da-Dɔgɔmanɛ Wara-Koe

¹³ “Wo ni don da-dɔgɔmanɛ la bawo kilɛ min bi tala nyahanama rɔ, wo don-dɛ kolo. A tagama-ko ma gbɛlɛ, ado mɔgɔ siyaman bi tala wo le fɛ.

¹⁴ Kilɛ min bi tala nimaya tinɛ, wo tagama-koe gbɛlɛ. A dɛ ma kolo, ado mɔgɔ siyaman sa a yenna.

Kɔlɔma anubɛ A Gbɔɛ Wara-Koe

¹⁵ “Wo ni a ma wo fɛrɛma foninya-nɛbinuna ko la. Anu si a fɔ ko anu bi kumala Alla ye kɔnɔ anu foni. Anu kungban-kungban ye nala wo wara iko sagɛnu kɔnɔ anu sɔn mani de iko suluku-kɔnkɔtoe.

¹⁶ Wo si anu lɔn anuna kɛwɔlɛnu fɛ. Mɔgɔ ti kɔn-gbɔɛ keri wɔnɔ-firɛ rɔ. Toro-gbɔɛ fanan ti keri tiri-wɔnɛ rɔ.

¹⁷ Kɔlɔma min sabatira, wo le si gbɔ wɛ-kɛ. Kɔlɔma min ma sabati, wo gbɔɛ ti mɔgɛ munanfaga.

¹⁸ Kɔlɔma min sabatira, wola gbɔɛ si mɔgɛ munanfaga. Kɔlɔma min ma sabati, wo le ti gbɔ wɛ-kɛ.

¹⁹ Kɔlɔma minna gbɔɛ ti mɔgɛ munanfaga, wo kuri si tɛgɛ ka a lakɛ tɛ rɔ.

²⁰ Nba, wo si foninya-nɛbinu lɔn anu gbɔɛ fɛ wo nya na le.

Yisa Ban-Koe Mɔgɔ-Yogomɛnu Na

²¹ “Min bɛɛ ye a fɔla ko ata Mari le nde la, wo bɛɛ ti don Allala mansayɛ rɔ fɔ minnu bi n Fa diyana-koenu kɛla, n Fa min bi Arinyɛni tɔ, kɔni.

²² Tele-laban-lunyɛ, mɔgɔ siyaman si a fɔ ko ata Mari le nde la ko a ya wɔlɔyiya-kumɛnu fɔ n tɔgɛ rɔ. A si a fɔ fanan ko a ya nyina siyaman gben n tɔgɛ rɔ ka kabana-ko siyaman kɛ n tɔgɛ rɔ!

²³ Nba, n si a fɔ wonu ye worɔ ko, ‘N ma wo lɔn mumɛ! Wo bɔ n fɛ, wole ko-yogoma-kɛlɛnu!’

Bon-Sɔla Filɛ Wara-Koe

²⁴ “Nba, mɔgɛ min bɛɛ ye nna kumɛ kɛ lamɔɛnna ka a bira, wo si ma iko kei-hɛnkilimɛ min ya ala bɔn sɔ fara-kole kuma.

²⁵ Banda-wɛ nara. Bɛnu fara. Fɔnyɔ tugura ala bɔn wo ma. Kɔnɔ bɔn wo ma bui bawo a sɔnɛ fara-kole kuma.

²⁶ Min bɛɛ ye nna kumɛ kɛ lamɔɛnna kɔnɔ anu sa a birala, wo si ma iko kei kun-takolɔn min ya ala bɔn sɔ kɛnkɛn ma.

²⁷ Banda-wɛ nara. Bɛnu fara. Fɔnyɔ tugura ala bɔn wo ma! Ala bɔn buira fugbu! A rakerikerita iko kolo lamurunɛ!”

Karan Kɛ-Koe Sɛnbɛ rɔ Yisa Bolo

²⁸ Yisa banta koe wonu fɔla tumɛ min, nyama kawara ala karan wo ma.

²⁹ Anu ko ale sa iko anuna tɔn-karan-mɔgɛnu bawo fanka ye ala karan la.