Matiyu 6 - ALLALA KUMƐ

Mɔgɔ Kɔ-Koe-Karan

¹ Yisa ko, “Wo wa wuli ko-nyimɛ kɛla tumɛ min, wo ni a ma wo fɛrɛma. Wo kana a ma gbɛ rɔ alako mɔgɛnu ni wo yen. Ni wo ya koe kɛnu ma gbɛ rɔ, wo ti barayi sɔrɔn wo Fa Alla bolo Arinyɛni tɔ.

² “Ni i ye a fɛ ka bolo-kolɔn kɔ, i kana a mayon alako mɔgɛ bɛɛ ni i yen mɔgɛ kɔla iko nyɛrɛ-mayiralɛnu. Wonu denu si wo ma Yahudiya-dina-bɔnnu na anubɛ barɛnu tɔ bawo anu bi a fɛ, mɔgɛnu ni anu matɔgɔ. Wo ni wo hɛnkili to kɛ ko! Wonu bara ban anu sarɛ sɔrɔnna feu!

³ Kɔnɔ i wa mɔgɛ kɔ, hali i diyana-mɔgɔ bɛrɛbɛrɛ kana a lɔn.

⁴ I ni a ma dogɔn rɔ. Woletɔ i Fa Alla min bi i yenna a kɔla dogɔn rɔ, wo si i barayi.

Madiyali-Koe-Karan

⁵ “Wo tenbi madiyali kɛla, wo kana a ma iko nyɛrɛ-mayiralɛnu! A di wonu ye ka madiyali kɛ anu kulu-mayɛlɛnɛ la Yahudiya-dina-bɔnnu na anubɛ sere tɛma alako mɔgɛnu ni anu yen. Wo ni wo hɛnkili to kɛ ko! Anu bara ban anu sarɛ sɔrɔnna feu!

⁶ Kɔnɔ i tenbi madiyali kɛla, i kelan ni don ila konko la ka a dɛ latogon. I ni i Fa Alla madiya, i sa min yenna. Ale i Fa Alla min bi i yenna a kɛla dogɔn rɔ, wo si i barayi.

⁷ “Wo tenbi madiyali kɛla, wo kana sɛgi wo gbɛ ma ka to kuma kelen fɔla ka a fɔ ka a fɔ iko Alla-lɔnbɛlɛnu si a ma nya min. Anu bi anu mirila ko Alla si anu kan lamɔɛn ka a tɛgɛ anuna madiyali-yannu fɛ.

⁸ Wo kana ma iko wonu. Yanni wo ni Alla madiya, wo makoe ye min na, wo Fa Alla ya wo bɛɛ lɔn.

⁹ “Wo ni madiyali kɛ ka le ko, ‘Ma Fa min bi Arinyɛni tɔ, i tɔgɛ ni sɛninya.

¹⁰ Ila mansayɛ ni na ma kuma. I sako ni kɛ duninya rɔ iko a ye kɛla Arinyɛni tɔ nya min.

¹¹ I ni bita dɔn-fan di ma ma.

¹² Ma ara bila i la minnu na, i ni ma makoto wonu na iko male bɛrɛn bi wonu makotola nya min, minnu bara bila ma la.

¹³ I kana sɔn, ma ni don kɔrɔbɔlɛ rɔ fɔ ka ma tanka Setanɛ ma.’

¹⁴ “Ado nfan, minnu bara ko-yogomɛ kɛ wo la, ni wo ya anu makoto, wo Fa Alla min bi Arinyɛni tɔ, wo si wo fanan makoto.

¹⁵ Kɔnɔ ni wo ma sɔn anu makoto-koe ma, wo Fa Alla fanan ti sɔn wo makoto-koe ma.

Sun-Don-Koe-Karan

¹⁶ “Wo wa sunyɛ don tumɛ min, wo kana wo yakɔrɛ sa-a-rɔ iko nyɛrɛ-mayiralɛnu si a ma nya min. Anu kɛnɛna anu nyɛrɛ makinikinina alako mɔgɛnu ni a lɔn ko anu bi sunyɛ le tɔ. Wo ni wo hɛnkili to kɛ ko! Anu bara ban anu sarɛ sɔrɔnna feu!

¹⁷ I wa sunyɛ don, i ni i yɛ laku ka i kunyɛ rabɔ,

¹⁸ woletɔ mɔgɔ ti a lɔn ko i ye sunyɛ rɔ. I ya sa i Fa Alla min na, wo si wo lɔn. I Fa Alla min bi i yenna a kɛla dogɔn rɔ, wo si i barayi.

Nɔnfulu-Tigiya-Koe

¹⁹ “Wo kana wola nɔnfuli lamara wola bɔnnu na duninya kɛ rɔ, kɔrɔkɔrɔyɛ anubɛ kisinu si a tinya kan min. Kankannu fanan si ila bɔn keri ka a kankan.

²⁰ Kɔnɔ wo ni a lamara Arinyɛni tɔ, kɔrɔkɔrɔyɛ anubɛ kisinu ti ke a tinyana kan min. Kankannu ti ke a bila nyɔ,

²¹ ado mɔgɔla nɔnfuli ye kan min, a hɛnkili si ta nyɔ tuma-wo-tuma.

Fɛrɛ-Bɔnkɛta Waan Wara-Koe

²² “Mɔgɔ yɛ mani de a fɛrɛ-bɔnkɛ ye iko lɛnpu-lamalannɛ. Ni mɔgɛ yɛ kɛndɛ, a fɛrɛ-bɔnkɛ bɛɛ si to waan rɔ.

²³ Kɔnɔ ni mɔgɛ yɛ ma kɛndɛ, a fɛrɛ-bɔnkɛ si to pinpi rɔ. A yɛ min si waan ladon a fɛrɛ-bɔnkɛ rɔ, ni a yɛ wo ma kɛndɛ, a si ma pinpi-makilannɛ la worɔ!

Alla anubɛ Nɔnfuli

²⁴ “Mɔgɔ ti ke wɔli-kɛla tigi fila ye wati kelan rɔ. Ni a ya wo ma, kelen si diya a ye, kelen si gboya a ye. A si kelan gbiliya ka kelan lafɛya. Wole fanan bi wo nya le. Wo ti Alla anubɛ nɔnfuli nyini nya-kun-kelen.

²⁵ “N bi a fɔla wo ye worɔ, wo makoe ye fan min bɛɛ la, a mara dɔn-fan la wo, a mara fɛrɛya-bɔɛ la wo, wo kana hɔn wonuna ko la. Niyi ma tenbi dɔn-fan la, wa? Fɛrɛ-bɔnkɛ ma tenbi fɛrɛya-bɔɛ la, wa?

²⁶ Wo ni konanu mafɛlɛn. Anu ti sugi fui. Anu ti a tɛgɛ. Anu ti a sa birɛ la. Kɔnɔ wo Fa min bi Arinyɛni tɔ, wo le ye anu dama kandanna! Wole ma tenbi konanu na, wa?

²⁷ Yon bi wo tɛma min si hɔn koe do la ha a ni san do sa a nyɛrɛ siyi kuma?

²⁸ “Wo ye hɔnna fɛrɛya-bɔɛ la nfenna? Wo ni kɔn-ferenu sabatinɛ mafɛlɛn. Anu sa wɔlila ka anu nyɛrɛ fɛrɛya bɔ.

²⁹ Kɔnɔ n bi a fɔla wo ye ko, hali Silamɛni min mara bana la nun, a makiri-nya ma ke kɔn-fere kɛ kelen tɔ.

³⁰ Binyɛ don? A ye nyɔ wati-ni dɔrɔn, wo kɔma, tɛ ni a mintan. Alla ye binyɛ wo fɛrɛya bɔla. Alla ti to wole fanan fɛrɛya bɔla wo nya na, wa? Wola dɛnkɛninyɛ dɔgɔ de!

³¹ “Woletɔ wo kana hɔn ka a fɔ ko, ‘N si dɔn-fan sɔrɔn mintɔ? N si yi mintan min? N si fɛrɛya-bɔɛ nyamintan don?’

³² (Hali Alla-lɔnbɛlɛnu bi nyinina kɛnu denu ma tuma-wo-tuma.) Kɔnɔ wo Fa Alla min bi Arinyɛni tɔ, wo ya a lɔn ko wo makoe ye fan kɛ bɛɛ la.

³³ Wo ni Allala mansayɛ anubɛ ata telenbagayɛ fɔlɔn nyini. Wo kɔma, ale ni na to fan kɛ bɛɛ dila wo ma.

³⁴ Woletɔ wo kana hɔn sinanna ko la. Sina ye nala yakɔrɔ-mamɔɛ min na a bolo, wo ara a bɔ. Wo kana tɔrɔyɛ do sa bita tɔrɔyɛ kuma bawo tele bɛɛ anubɛ ata tɔrɔyɛ le.”