Matiyu 28 - ALLALA KUMƐ

Yisa Lawuli Koe

¹ Sulen-Tele kɔma, yanni bandɛ ni ka Lɛhɛrɛ ma, Mariyama Magadala kɛ anubɛ Mariyama doi tara kanba-mafɛlɛn-tinɛ.

² Tiriyante wo rɔ, dugi yɛrɛyɛrɛnta tun bɛrɛkɛ! Marita melika yigira ka bɔ Arinyɛni tɔ. Melika wo ya kuri makuru-kurun ka bɔ kanba-dɛ la ka a sigi a kuma.

³ A mafɛlɛn-nya mani de iko banda-nyin-masɔgɛ. Ala kurɛnu gbɛnɛ iko bɛgi-gbɛ.

⁴ Nyɔ-kandannɛnu kilanta kati ka yɛrɛyɛrɛn. Anu mara iko mɔgɔ-faganɛnu.

⁵ Melika wo kumara musi wonu ye. A ko, “Wo kana kilan. N ya a lɔn ko wo ye Yisa le nyinina min gbangbanta kɔlɔma ma nun.

⁶ A sa yan. A ara wuli iko a ya a fɔ nya min. Wo na a sa-tinɛ mafɛlɛn.

⁷ Nba, wo ta tiriya ka a fɔ ala karan-dannu ye ko, ‘A ara wuli ka bɔ furinu tɛma. A ye tala Kalili wo yarɔ. Wo si a yen nyɔ!’ N bara min fɔ wo ye, wo ni wo hɛnkili to wo ko.”

⁸ Woletɔ anu bɔra kanbɛ dafɛ tiriya kilan anubɛ sewɛ bolo. Anu burimatoe tara a fɔ ala karan-dannu ye.

⁹ Tiriyante wo rɔ, Yisa ya anu nabɛn kilɛ la. A ko, “Yisi-kimɛ ni to wo fɛ.” Anu ya a kian bira a bato-koe la.

¹⁰ Yisa ya a fɔ anu ye ko, “Wo kana kilan. Wo ta a fɔ n na-kelen-nyɔgɛnu ye ko anu ni ta Kalili. Anu si n yen nyɔ.”

Kandannɛnuta Dantɛgɛlɛ Wara-Koe

¹¹ Musinu tara tumɛ min, kɛlɛ-dan minnu bi kanbɛ kandanna, wonu sɛgira soe burɔ. Koe min bɛɛ kɛra, anu ya anu dantɛgɛ saraka-masɔla-wɛnu ye.

¹² Saraka-masɔla-wɛnubɛ Yahudiya-kɛmɔgɛnu ya anu nyɔgɔn nadɛn. Anu ya wodi-ba di kɛlɛ-dannu ma.

¹³ Anu ko, “Wo ni a fɔ ko wo ye kinɔgɛ rɔ tumɛ min, ala karan-dannu nara suyi rɔ ka a furi kankan.

¹⁴ Nba, ni kun-tigi Pailɛti ya wo lamɔɛn, ma si a madiya, hali wo ma hɔn fenfenna ko la.”

¹⁵ Kandannɛnu ya wodi wo bi. Anu ya a ma iko a fɔra anu ye nya min. Ha bi, kumɛ wo nyɛnsɛnnɛ Yahudiyanu tɛma.

Yisa Bɔ-Koe Gbɛ rɔ Ala Karan-Dannu Ye

¹⁶ Yisa ya a fɔ ala karan-den tan-ni-kelannu ye ko anu ni ta kɔnkɛ do kuma Kalili sigisɔn rɔ.

¹⁷ Anu ya a yen tumɛ min, anu ya a bato kɔnɔ hali wo, sikɛ ye anu tɔ.

¹⁸ Yisa nara sɔ anu tɛma. A ko, “Sɛnbɛ bɛɛ ara di n ma san-kole rɔ anubɛ dugu-kole kuma.

¹⁹ Nba, wo ni ta mɔgɛ bɛɛ wara ka anu ma nna karan-dannu na. Wo ni anu batasi Fa Alla anubɛ ala dan anubɛ ale Ni-Sɛnimɛ tɔgɔ rɔ.

²⁰ N bara anu karan koe min bɛɛ la, wo ni anu karan ko anu ni koe wo bɛɛ bira. Ado nfan, wo ni wo hɛnkili to kɛ ko, n si to wo fɛ tumɛ bɛɛ ha wati-laban.”