Matiyu 27 - ALLALA KUMƐ

Yisa ye Pailɛti Yakɔrɔ Tumɛ Min

¹ Subaga-dɛ ma, saraka-masɔla-wɛ bɛɛ anubɛ Yahudiya-kɛmɔgɛnu ya anu nyɔgɔn nadɛn ka sɔn Yisa faga-koe ma.

² Anu ya a kiri yɔlɔkɛ la ka ta a don Romu kun-tigi Pailɛti bolo.

Yudasi Faga-Koe

³ Yudasi min ya Yisa don anu bolo tɔ, wo ya a yen tumɛ min ko anu bara Yisa yiliki, a nimisara. A ya wodi-gbɛ bi-sawɛ wo lasɛgi saraka-masɔla-wɛnu anubɛ Yahudiya-kɛmɔgɛnu ma.

⁴ A ko, “N bara hakɛ kɛ ka mɔgɔ-magbalanɛ ladon wo bolo tɔ, ado a ye nala fagala!” Anu ya a fɔ a ye ko, “Malela ko sa wo rɔ. Ila koe le wo la!”

⁵ Yudasi ya wodi wo fili Alla-Bato-Bɔn burɔ. A tara. Wo kɔma, a tara a nyɛrɛ dun yili la.

⁶ Saraka-masɔla-wɛnu ya wodi wo matɔnbɔn. Anu ko, “Yele-wodi le kɛ la. Ni ma ya kɛ sa Alla-Bato-Bɔn wodi kuma, wo si mala tɔn tinya.”

⁷ Anu banta a rabɛnna tumɛ min, anu ya wodi wo bi ka bɔnku-daga-sɔlɛla dugi san wo la ka nyɔ ma sundan togon tinɛ la.

⁸ Wo le ya a to, ha bi, anu bi dugi wo kelela ko, “Yele-Dugi.”

⁹ Nba, Nɛbi Yɛrɛmaya ya min fɔ, wo bɔra-a-la bawo a ko, “Isirɛla mɔgɛ donu sɔnta ka a san wodi-gbɛ bi-sawɛ min na, anu ya wo bi

¹⁰ ka bɔnku-daga-sɔlɛla dugi san wo la iko Mari ya a fɔ n ye nya min.”

Yisa Fɛsɛfɛsɛ-Koe Pailɛti Bolo

¹¹ Yisa sɔra Romu kun-tigi Pailɛti yakɔrɔ. Wo ya Yisa manyinika ko, “Yahudiyanuna mansɛ le ile la, wa?” Yisa ya a yabi ko, “Ɔn, a ye iko i wara a fɔ nya min.”

¹² Kɔnɔ saraka-masɔla-wɛnu anubɛ Yahudiya-kɛmɔgɛnu ya a maburi minnu na, a ma fenfen fɔ wonu tɔ.

¹³ Wo kɔma, Pailɛti ya a fɔ a ye ko, “Anu bi i maburila koe min bɛɛ la, i sa wonu namɔɛnna, wa?”

¹⁴ Kɔnɔ hali dafa, Yisa ma a tɛgɛ. Woletɔ Pailɛti kawara a ma kati!

Yisa Faga-Koe Latɛgɛ-Koe

¹⁵ Nba, san-bo-san Kanan-Ko-Ladiyɛ kuma, anu si mɔgɔ kelen yabɔ ale kun-tigi si min kunka.

¹⁶ Wo wati ya a taran, mɔgɛ do ye yele la bɛɛ ya min lɔn, a tɔgɔ Yisa-Barabasi.

¹⁷ Nyama ladɛnta tumɛ min, Pailɛti ya anu manyinika ko, “Wo ye a fɛ, n ni yon boloka wo ye, Yisa-Barabasi, ka, Yisa anu bi min kelela ko Allata-Mɔgɔ-Yabɔnɛ?”

¹⁸ A ya a lɔn serr, ko Yahudiyanuna kun-tiginu bara Yisa don a bolo keliyɛ lela ko la.

¹⁹ Pailɛti siginɛ kiti-bɔn la tumɛ min, ala musi ya kilayɛ lata a ma ko, “I kana fenfen ma mɔgɔ-magbalanɛ wo la bawo n tɔrɔta nna kiyo rɔ suyi tenbinɛ kɛ rɔ ala ko la kati!”

²⁰ Saraka-masɔla-wɛnu anubɛ Yahudiya-kɛmɔgɛnu ya a lagbɛlɛya nyama kuma ko anu ni Pailɛti manyinika Barabasi boloka-koe ma ka ale Yisa faga.

²¹ Nba, kun-tigi Pailɛti ya anu manyinika ko, “Wo ye a fɛ, n ni yon boloka wo ye mɔgɔ filɛ kɛnu tɔ?” Anu ya a yabi ko, “Barabasi!”

²² Pailɛti ya anu manyinika ko, “Anu bi Yisa min kelela Allata-Mɔgɔ-Yabɔnɛ, wo ye a fɛ, n ni nfen ma wo la worɔ?” Anu dama ya sɔnkɔ layɛlɛ ko, “A gbangban kɔlɔma ma!”

²³ Kɔnɔ Pailɛti ya anu manyinika ko, “A ya ko-yogomɛ nyamintan kɛ?” Anu sɔnkɔra ha ka a dan natenbi ko, “A gbangban kɔlɔma ma!”

²⁴ Pailɛti ya a yen tumɛ min ko a ti nɔ-ko sɔrɔn anu ma, ado sɔnkɔ-sɔnkɛ ye nala bɔla-a-rɔ le, a ya yi bi ka a bole laku nyama yala. A ko, “Ndeta sa kei kɛ faga-koe rɔ! Wota kɛwɔli le wo la!”

²⁵ Nyama bɛɛ ya a fɔ a ye tun ko, “A faga-ko-tɔrɛ ni to male anubɛ mala dannu kuma!”

²⁶ Ale Pailɛti ya Barabasi boloka. A ya a ma, anu ya Yisa gbesi ka a don anu bolo a gbangban-koe la kɔlɔma ma.

Yisa Mayɛlɛn-Koe Kɛlɛ-Dannu Bolo

²⁷ Nba, Pailɛtila kɛlɛ-dannu ya Yisa bi ka ta a la ala bɔn la. Anu dama ya a lafoo.

²⁸ Anu ya a mawuran ka duruku-yan-wulenmɛ don a kan na.

²⁹ Anu ya wɔnɛ ma mansaya-fulɛ la ka wo sigi a kunyɛ la ka kɔlɔma don a bolo-nyimɛ rɔ. Wo kɔma, anu ya anu nyɛnkin a kɔrɔ a mayɛlɛn-koe la. Anu ko, “Yahudiyanuna mansɛ, alamɛ i mɛra!”

³⁰ Anu ya anu nɔgɔ-yi kɛ a ma. Anu ya kɔlɔma wo bi a bolo ka a gbesi a kunyɛ rɔ.

³¹ Anu banta a mayɛlɛnna tumɛ min, anu ya duruku-yan wo bɔ a kan na ka a nyɛrɛta fanɛnu don a ma tun. Anu tara a la a gbangban tinɛ kɔlɔma ma.

Yisa Gbangban-Koe Kɔlɔma Ma

³² Anu bi tala tumɛ min, anu bɛnta kei do la ka bɔ Sairini soe burɔ min tɔgɛ Saimon. Anu ya a fɔrɔsɛ ka Yisala faga-kɔlɔma bi.

³³ Anu nara ke kan tinɛ do min tɔgɛ Kalakata min kɔrɛ le ko, “Kun-kole ye kan min.”

³⁴ Gbɛɛ min yabasannɛ fen-kunayanɛ la min si a ma, a ti dumɛ lɔn bɛrɛkɛ, anu ya wo di Yisa ma alako a ni a min. Kɔnɔ a ya a mafɛlɛn a nagan la tumɛ min, a ma sɔn a min-koe ma.

³⁵ Anu ya a gbangban kɔlɔma ma. Wo kɔma, anu ya korɔn lakɛ ala durukinu tatala-koe ma anu nyɔgɔn tɛma.

³⁶ Wo kɔma, anu sigira a kandan tinɛ.

³⁷ Mɔgɛnu ya a maburi minna ko la, anu ya wo sɛbɛ ka a sa a kunyɛ kuma. A ko, “Yahudiyanuna Mansa Yisa le kɛ la.”

³⁸ Mɔgɔ fila min kɛnɛna buila mɔgɛnu ma, anu ya wonu gbangban kɔlɔmanu ma Yisa fɛ, kelen a bolo-nyimɛ rɔ, kelen a bolo-maran rɔ.

³⁹ Mɔgɔ-tenbimatoenu ya anu kunyɛ radɔn Yisa ma ka a lafɛya.

⁴⁰ Anu ko, “Ile. I ko i si Alla-Bato-Bɔn wayan ka a sɔ tun tele sawa kɔrɔ! Ni Allatalata dan le ile la, i nyɛrɛ lakisi. Yigi ka bɔ kɔlɔma ma gbɛ!”

⁴¹ Saraka-masɔla-wɛnu anubɛ tɔn-karan-mɔgɛnu anubɛ Yahudiya-kɛmɔgɛnu fanan ya a mayɛlɛn wo nya le.

⁴² Anu ko, “A ya mɔgɛnu kisi kɔnɔ a ti ke a nyɛrɛ lakisila! Ni Isirɛlata mansɛ le ale la, a ni yigi ka bɔ kɔlɔma ma kaka, ma si dɛnkɛninya a ma!

⁴³ A lara Allatala la. A ko Allala dan le ale la. Nba, ma ni a mafɛlɛn, ni a sɔgɛ ye Alla la ka a lakisi!”

⁴⁴ Hali bui-ma-kɛlɛ minnu gbangbanta kɔlɔmanu ma a fɛ, wonu fanan ya a lafɛya wo nya na le.

Yisa Niyi-Bɔ-Koe

⁴⁵ Tele latelan, pinpi burunta nyamanɛ wo bɛɛ kuma ha hawa sawa.

⁴⁶ Tele-makima-wati, Yisa gbele-gbelenta. A ko, “Ilaya, Ilaya, lama sabakatani?” Wo kɔrɛ le, “Nta Alla, nta Alla, i wara n boloka nfenna?”

⁴⁷ Mɔgɛ donu sɔnɛ nyɔ, wonu ya a kan lamɔɛn. Anu ko, “A ye Nɛbi Ilaya le rakele tinɛ wo la!”

⁴⁸ Mɔgɔ kelen ya a buri tiriya ka sefuna-fuyi bi ka a layigi gbɛɛ-kunayanɛ rɔ. Wo kɔma, a ya a dun kɔlɔma kunyɛ la ka a ma ko Yisa ni a min a la.

⁴⁹ Kɔnɔ donu ko, “A makɔni, ma ni a yen ni Nɛbi Ilaya si a lakisi!”

⁵⁰ Yisa ya a kan labɔ tun bɛrɛkɛ, ka a niyi laban lafɛ.

⁵¹ Nba, yorolan min dunnɛ Alla-Bato-Bɔn tɛma, wo farata fila la ka a dabira a kuma ha a kɔrɔ. Dugi yɛrɛyɛrɛnta ha kurinu tatiira.

⁵² Kanbɛnu nakara. Allala mɔgɛ minnu bara faga fɔlɔ-nun, wonu siyaman wulita ka niyi lafɛ tun.

⁵³ Anu bɔra kanbɛnu tɔ, ado Yisa wulita ka bɔ furinu tɛma tumɛ min, anu tara so-sɛnimɛ rɔ Yerusalɛm, mɔgɔ siyaman ya anu yen kan min.

⁵⁴ Kɛlɛ-den-kun-tigi anubɛ ala kɛlɛ-dan minnu bi Yisa kandanna, wonu ya dugu-yɛrɛyɛran yen tumɛ min, anubɛ koe min bɛɛ kera, anu kumakɔra kati! Anu ko, “Alla nyɛrɛta dan le kɛ la nun serr!”

⁵⁵ Musu siyamɛ minnu bilara Yisa fɛ a dɛnbɛn-koe rɔ ka bɔ Kalili, wonu bi nyɔ nun. Anu sɔra wula-yan la ka a mafɛlɛn.

⁵⁶ Mariyama Magadala kɛ ye wonu tɛma anubɛ Mariyama, Yemesi anubɛ Yusufu na, kɔni, anubɛ Sɛbɛdila dannu, wonu na.

Yisa Togon-Koe

⁵⁷ Wurɛ kera tumɛ min, nɔnfulu-tigi do nara ka bɔ Arimatiya soe burɔ. A tɔgɛ Yusufu. Yisala karan-dan le wo fanan na.

⁵⁸ A tara Pailɛti wara ko anu ni Yisa furi don a bolo. Pailɛti ya a fɔ ko anu ni Yisa furi don ale Yusufu bolo.

⁵⁹ Nba, Yusufu ya a bi ka a kasankɛ linɛn-kura-kurɛ la.

⁶⁰ Anu ya a sa ale Yusufula kanbɛ rɔ min sinnɛ farɛ rɔ. Wo kɔma, a ya kuru-belebele makuru-kurun ka a sa kanba-dɛ la. A tara.

⁶¹ Mariyama Magadala kɛ anubɛ Mariyama doi siginɛ nyɔ. Anu yɛ bɛnnɛ kanbɛ ma.

Kanba Kandannɛnu Bara-Koe

⁶² Sulen-Tele wo ma, saraka-masɔla-wɛnu anubɛ Farisinu tara Pailɛti wara.

⁶³ Anu ko, “N fa, foninya-fɔlɛ wo ya min fɔ wo tumɛ a kɛndɛ, ma hɛnkili tonɛ wo ko. A ko tele sawa wa tenbi tumɛ min, a si wuli tun ka bɔ furinu tɛma.

⁶⁴ Nba, i ni a fɔ ko anu ni kanbɛ wo kandan gben, ha a tele sawa nyɔgɛ. Woletɔ ala karan-dannu ti ke tala ka a furi kankan. Ni anu ya wo ma, anu si a fɔ ko, ‘A ara wuli ka bɔ furinu tɛma,’ ado foninya-laban kɛ si yogoya ka tenbi a fɔlɔtɛ la worɔ.”

⁶⁵ Pailɛti ya a fɔ anu ye ko, “Wo ni a kandannɛnu bi. Anu ni a kandan anu se-koe-bɛɛ la.”

⁶⁶ Woletɔ anu tara ka kanbɛ latogon a kin na ka mandan sa farɛ wo ma. Anu ya a kandannɛnu to nyɔ.