Matiyu 25 - ALLALA KUMƐ

Sunkurun Tan Wara Koe

¹ “Koe kɛnu ba ma tumɛ min, Alla min bi Arinyɛni tɔ, ata mansayɛ si ma iko sunkurun tan minnu ya anuna lɛnpunu bi ka ta kɔnyɔ-tigi labɛn kilɛ la.

² Mɔgɔ loli, kun-takolɔn le wonu na, a to loli, hɛnkilimɛ le wonu na.

³ Kun-takolɔn wonu ya anuna lɛnpunu bi kɔnɔ anu ma na tulu-gbɛrɛ la anu bolo.

⁴ Kɔnɔ hɛnkilimɛnu ya miran donu nafa tuli la ka na wonu na anu bolo anubɛ min bi anuna lɛnpunu tɔ.

⁵ Kɔnyɔ-tigi ma na yona, woletɔ sunkurɔn wonu ya anu dabira ka yunkun. Anu kinɔgɔra.

⁶ “Suyi tɛma, gbele-gbelen-kan bɔra ko, ‘Kɔnyɔ-tigi ara na! Wo na a labɛn!’

⁷ Sunkurun tan kundenta ka anuna lɛnpunu tabɛn.

⁸ Kun-takolon loli wonu ya a fɔ hɛnkilimɛnu ye ko, ‘Wo ni ma kɔ wola tuli do rɔ bawo mala lɛnpunu bi dufenna.’

⁹ “Hɛnkilimɛnu ya anu yabi ko, ‘Ade, a ti a bɔ ma dama bolo wona. Wo ta a ferelɛnu bara ka do san wo nyɛrɛ ye.’

¹⁰ “Woletɔ sunkurun-kun-takolɔn wonu tara tulu san tinɛ. Anu tara tumɛ min, kɔnyɔ-tigi nara anu kɔma. Sunkurun loli minnu tabɛnnɛ, wonu donta a fɛ kɔnyɔ-masɔ-ladiyɛ rɔ. Nba, wɔli-kɛlɛnu ya nyɔ-dɛ latogon.

¹¹ “Wo kɔma, sunkurɔn doi wonu nara. Anu ko, ‘N fa! N fa! Dɛ laka ma ye, ma ni don!’

¹² “Kɔnɔ kɔnyɔ-tigi ya anu yabi ko, ‘Nde ma wo lɔn mumɛ!’ ”

¹³ Yisa ko, “Nba, wo ni wo yɛ lakalan bawo wo ma n na-tele anubɛ a wati lɔn.

Wɔli-Kɛla Sawɛ Wara-Koe

¹⁴ “Alla min bi Arinyɛni tɔ, ata mansayɛ si ma ka le. Kei do bɔra a warɛ ka ta tagama rɔ. A ya ala wɔli-kɛlɛnu kele ka a bolo-fannu kerifa anu na.

¹⁵ A ya fan do don anu kelen-kelennamɛ-bɛɛ bolo iko anuna kusanyɛ ye nya min. A ya sɛnɛ-bɔrɔ loli don kelen bolo. A ya bɔrɔ fila don do bolo. A ya bɔrɔ kelen don do bolo. Wo kɔma, a tara tagama rɔ.

¹⁶ “Wɔli-kɛlɛ min ya sɛnɛ-bɔrɔ loli sɔrɔn, wo tara tiriya ka feri kɛ ata sɛnɛ la. A ya bɔrɔ-loli-gbɛrɛ sɔrɔn tɔnɛ la.

¹⁷ Wɔli-kɛlɛ min fanan ya sɛnɛ-bɔrɔ fila sɔrɔn, wo fanan ya a ma wo nya le. A ya bɔrɔ-fila-gbɛrɛ sɔrɔn tɔnɛ la.

¹⁸ Kɔnɔ wɔli-kɛlɛ min ya sɛnɛ-bɔrɔ kelen sɔrɔn, wo tara ka denkɛ sin dugi rɔ ka a tigila sɛnɛ dogon nyɔ.

¹⁹ “Wati-yan tenbira tumɛ min, wɔli-kɛlɛ wonu tigi sɛgira ka anuna wodi dan.

²⁰ Wɔli-kɛlɛ min ya sɛnɛ-bɔrɔ loli sɔrɔn, wo nara ka sɛnɛ-bɔrɔ loli-gbɛrɛ don a bolo. A ko, ‘N fa, i ya sɛnɛ-bɔrɔ loli don n bolo, sɛnɛ-bɔrɔ loli-gbɛrɛ mafɛlɛn n bara min sɔrɔn tɔnɛ la.’

²¹ “A tigi ko, ‘Wɔli-kɛla-nyimɛ, lanaya-mɔgɛ, i wara ko-nyimɛ kɛ! I wara lanayɛ kɛ ko-dɔgɔmanɛ rɔ, woletɔ n si a kinama-wɛ don i bolo. I ni don, ma ni sewa ma nyɔgɔn fɛ!’

²² “Wo kɔma, a ya sɛnɛ-bɔrɔ filɛ don min bolo, wo nara. A ko, ‘N fa, i ya sɛnɛ-bɔrɔ fila don n bolo. Sɛnɛ-bɔrɔ fila-gbɛrɛ mafɛlɛn, n bara min sɔrɔn tɔnɛ la.’

²³ “A tigi ko, ‘Wɔli-kɛla-nyimɛ, lanaya-mɔgɛ, i wara ko-nyimɛ kɛ! I wara lanayɛ kɛ ko-dɔgɔmanɛ rɔ, woletɔ n si a kinama-wɛ don i bolo. I ni don, ma ni sewa ma nyɔgɔn fɛ!’

²⁴ “Wo kɔma, wɔli-kɛlɛ min ya sɛnɛ-bɔrɔ kelan sɔrɔn, wo nara. A ko, ‘N fa, n ya a lɔn ko i wara-koe gbɛlɛ. I ye min tɛgɛla, mɔgɔ-gbɛrɛ ya wo fui. I ma sugi ki kan min, i ye a gbɔɛ kerila nyɔ.

²⁵ N kilanta, woletɔ n tara ka ila sɛnɛ dogon dugi rɔ. Wo le kɛ la! Itɛ le. A bira.’

²⁶ “A tigi ko, ‘Ile, wɔli-kɛla-fuyi! Tinya-mansa-yogomɛ! Ile yala, n bi min tɛgɛla, mɔgɔ-gbɛrɛ le ya wo fui, nyɛ? N ma sugi ki kan min, n bi a gbɔɛ kerila nyɔ, nyɛ?

²⁷ Nba, a fisa nun, i ni nna sɛnɛ dɔndɔ alako n ba na tumɛ min, n ni a bɛɛ sɔrɔn anubɛ a tɔnɛ.

²⁸ Awa, wo ni wo bi a bolo wona. Wo ni a di sɛnɛ-bɔrɔ tan-tigi ma

²⁹ bawo fan do ye min bolo, do si sa wo kuma wonu ye. A si siyaman sɔrɔn. Kɔnɔ fen sa min bolo, hali a dɔgɔmanɛ min bi a bolo, wo si bi a bolo.

³⁰ Nba, wo ni wɔli-kɛla-fufafuyi kɛ lakɛ pinpi rɔ pon! Mɔgɛnu si di nyɔ ka anu nyin masɔgɔ dumɛ bolo.’

Kiti-Tɛgɛ-Laban Wara-Koe

³¹ “Nde, Hadama-dan wa na nta mansayɛ rɔ tumɛ min nta melikanu fɛ, n si n sigi nta mansaya-sigi-fan rɔ.

³² Duninya-mɔgɛ bɛɛ la si dɛn n yakɔrɔ. N si anu fara kurun fila la iko saga-fɛ-biralɛ si sagɛnu fara baanu na nya min.

³³ N si sagɛnu nadɛn n bolo-nyimɛ rɔ ka baanu nadɛn n bolo-maran rɔ.

³⁴ Wo kɔma, nde, mansɛ si a fɔ n bolo-nyimarɔ-mɔgɛnu ye ko, ‘N Fa Alla ara ata duwɛ layigi wole min kuma, wo na! Wo na mansayɛ sɔrɔn min tabɛnnɛ wo ye kebi duninya danta.

³⁵ Kɔnkɛ ya n bira tumɛ min, wo ya dɔn-fan di n ma. N kan lagbalata tumɛ min, wo ya yi di n ma. A taranta, bɔn sa n bolo min kɛ, wo ya n yiya wo warɛ.

³⁶ N gbu-makolɔn tumɛ min, wo ya n fɛrɛya-bɔ. N kirayara, wo ya n fɛ-bira. N bi yele la tumɛ min, wo tara n kɔndɔn.’

³⁷ “Telenbagɛnu si a fɔ nde, mansɛ ye worɔ ko, ‘Mari, ma ya i kɔnkɔtoe yen tumɛ nyamintan ka dɔn-fan di i ma? Ma ya i kan-lagbalanɛ taran tumɛ nyamintan ka yi di i ma?

³⁸ Ma ya i taran, bɔn sa i bolo tumɛ nyamintan ka i yiya ma warɛ? Ma ya i gbu-makolɔn taran tumɛ nyamintan ka i fɛrɛya-bɔ?

³⁹ Ma ya i kirɛ yen tumɛ nyamintan ka i fɛ-bira? Ma ya i yen yele la tumɛ nyamintan ka i kɔndɔn?’

⁴⁰ “Nde, mansɛ si anu yabi ko, ‘Wo ni wo hɛnkili to kɛ ko! Min dɔgɔ nta mɔgɛnu tɛma, wo ya wo ma wo mɔgɔ kelen na, wo ya a ma nde le la wo la!’

⁴¹ “Wo kɔma, minnu bi n maran rɔ, n si a fɔ wonu ye ko, ‘Wo ni wo bɔ n fɛ, wole min bi Allala dankɛ kɔrɔ! Wo ta habadan-tɛ rɔ min tabɛnnɛ Setanɛ anubɛ ata melikanu ye!

⁴² Kɔnkɛ ya n bira kɔnɔ wo ma sɔn dɔn-fan dila n ma. N kan lagbalata kɔnɔ wo ma sɔn yi dila n ma.

⁴³ A taranta, bɔn sa n bolo kɔnɔ wo ma sɔn n yiyala wo warɛ. N gbu-makolɔn tumɛ min, wo ma sɔn n fɛrɛya-bɔla. N kirayara, wo ma sɔn n fɛ-birala. N taranta yele la kɔnɔ wo ma sɔn n kɔndɔnna.’

⁴⁴ “Nba, anu si n yabi ko, ‘Mari, ma ya i kɔnkɔtoe yen tumɛ nyamintan, ka, i kan-lagbalanɛ, ka, bon sa i bolo, ka, i gbu-makolɔn, ka, i kirayanɛ, ka, i ye yele la, ma ma sɔn i dɛnbɛna?’

⁴⁵ “Nde, mansɛ si anu yabi ko, ‘Wo ni wo hɛnkili to kɛ ko! Min dɔgɔ nta mɔgɛnu tɛma, wo ma wo ma wo la min kɛ, wo ma a ma nde le la wo la!’

⁴⁶ “Nba, wonu si ta habadan-tɔrɔyɛ rɔ kɔnɔ telenbagɛnu si ta habadan-nimayɛ rɔ.”