Matiyu 23 - ALLALA KUMƐ

Kawandilɛ ka Bɛn Tɔn-Karan-Mɔgɛnu ma Yisa Bolo Tɔn-Karan-Mɔgɛnubɛ Farisinuna Ko La

¹ Wo kɔma, Yisa ya nyama makawandi anubɛ ala karan-dannu.

² A ko, “Sɛnbɛ ye tɔn-karan-mɔgɛnu anubɛ Farisinu bolo ka Nɛbi Musata tɔn rakaran mɔgɛnu ye

³ woletɔ wo ni anuna kumɛ bira. Anu bi wo karanna min bɛɛ la, wo ni wonu bira gben! Kɔnɔ anu bi koe min bɛɛ kɛla, wo kana wonu kɛ bawo anu bi mɔgɛnu karanna min na, anu denu sa wo kɛla.

⁴ Anu si dunu-wɛ lakiri ka a sigi mɔgɛnu kuma kɔnɔ anu denu ti sɔn hali ka anu bolo-nɔlɔnɛ tugu dunɛ wonu na.

⁵ Anu si anuna ko-nyimɛ bɛɛ kɛ alako mɔgɛ ni anu yen dɔrɔn! Allala kumɛ min sɛbɛnɛ ata kitabu rɔ, anu bi wo mala lɛsimɔgɛnu na ka wonu kiri anu telɛnu anubɛ anu bolenu ma. Wonu mafɛlɛn! Anuna duruku-yan bunsannu yanyɛ-nya fanan mafɛlɛn!

⁶ Ado nfan, sigi-tina-mayɛlɛnɛnu di anu ye ladiyɛ rɔ, anubɛ sigi-fan-nyimɛnu Yahudiya-dina-bɔnnu na.

⁷ Gbiliya-kɔndɔli di anu ye bari rɔ. A fɛrɛ sa fɔ mɔgɛnu ni anu kele ko, ‘Karan-mɔgɔ.’

⁸ Kɔnɔ wo kana sɔn, mɔgɛ ni wo kele ko, ‘karan-mɔgɔ’ bawo wo damasi na-kelen-nyɔgɛ gbansan, ado Karan-Mɔgɔ kelen pe le ye wo bolo.

⁹ Nba, wo kana mɔgɔ-wo-mɔgɔ kele duninya kɛ rɔ ko, ‘N fa,’ bawo Fa kelen pe le ye wo bolo Arinyɛni tɔ.

¹⁰ Wo kana mɔgɔ-wo-mɔgɔ kele ko, ‘n tigi’ bawo wo Tigi kelen pe ye nyɔ, wo le Allata-Mɔgɔ-Yabɔnɛ la.

¹¹ Min kolo wo bɛɛ ko wo tɛma, wo ni ma bɛɛta wɔli-kɛlɛ la.

¹² Min ba a nyɛrɛ kɔrɔbi, wo ma si yigi. Min ba a nyɛrɛ famayigi, wo la si yɛlɛ.

Tɔn-Karan-Mɔgɛnu Kiti-Nya Yisa Bolo

¹³ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, Alla min bi Arinyɛni tɔ, wo ara ata mansayɛ don-dɛ sɔgɔ mɔgɛnu yarɔ. Kɔnɔ wole fanan ti don, ado mɔgɛ minnu bi anu tayala don-koe ma, wo ti sɔn wonu ni don. [

¹⁴ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, wo ye kɛɛ-musinu kensunyala ka anuna bɔnnu bi anu bolo, wo kɔma ka wo nyɛrɛ mayira wota madiyali-yannu fɛ! Wo le ya a to, wota tɔrɔyɛ si yogoya bɛɛtɛ ko!]

¹⁵ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, wo si kɔgɔ-yi tɛgɛ ka ta nyamanɛ bɛɛ rɔ alako mɔgɔ-kelen-bɛrɛn si tubi ka don wola dina rɔ. Wo wa a sɔrɔn tumɛ min, wo si ale ma nyahanama-mɔgɛ la ka tenbi wo nyɛrɛ la!

¹⁶ “Wole fiyɔn kun-tiginu, gbalo-belebele ye wole kuma! Wo ye mɔgɛnu karanna ko, ‘Ni mɔgɔ ya a gboro Alla-Bato-Bɔn rɔ, ko-wo-ko ti bɔ a rɔ. Kɔnɔ sɛnɛ min bi Alla-Bato-Bɔn la, ni a ya a gboro wo rɔ, ko si bɔ wo rɔ.’

¹⁷ Wole fiyɔn kuntannu! Nyamintan tenbira a ta-nyɔgɛ la, sɛnɛ, ka, Alla-Bato-Bɔn min bi sɛnɛ wo sɛninyala?

¹⁸ Wo ye mɔgɛnu karanna fanan ko, ‘Ni mɔgɔ ya a gboro saraka-bɔ-tinɛ rɔ, ko ti bɔ wo rɔ. Kɔnɔ kɔ-fan min bi saraka-bɔ-tinɛ kuma, wo ko ni a ya a gboro wo rɔ, ko si bɔ wo rɔ.’

¹⁹ Fiyɔn-bɛrɛbɛrɛ le wole la! Nyamintan tenbira a ta-nyɔgɛ la, kɔ-fan, ka, saraka-bɔ-tinɛ min bi kɔ-fan sɛninyala?

²⁰ Nba, mɔgɔ wa a gboro saraka-bɔ-tinɛ rɔ tumɛ min, a ye a gborola a rɔ anubɛ kɔ-fan min bi a kuma.

²¹ Mɔgɔ wa a gboro Alla-Bato-Bɔn rɔ tumɛ min, a ye a gborola a rɔ anubɛ Alla min siginɛ nyɔ burɔ.

²² Mɔgɔ wa a gboro Arinyɛni tɔ tumɛ min, a ye a gborola Allala mansaya-sigi-fan rɔ anubɛ ale min siginɛ a rɔ.

²³ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, wo ye yaka bɔla nako-fen-mɛsɛnu tɔ kɔnɔ wo ye wo banna karan-kolomɛnu bira-koe ma. Tɔn minnu bi iko telenbagayɛ, kinikini, anubɛ dɛnkɛninyɛ, wo bannɛ wonu ma. A bɛnta, wo ni kɛnu denu ma anubɛ wo ye doi min bɛɛ kɛla.

²⁴ Fiyɔn-kun-tiginu! Wo ye wola min-kɛ-yi maserendila alako mɛnɛ-mɛnɛnɛnu ni bɔ a rɔ kɔnɔ wo ye nyomɛ lakununa!

²⁵ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, wo ye wola yi-lafɛnu anubɛ piletinu kɔmɛ makula, ado wo ya min sɔrɔn kɔrɔndiyɛ anubɛ wunduyogoyɛ la, a burɛ fanɛ fan wonu na.

²⁶ Wole Farisi fiyɔnnu! Wo ni yi-lafɛ-burɛ sɛninya fɔlɔn. Ni wo ya wo ma, a kɔmɛ fanan si sɛninya worɔ!

²⁷ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, wo mani de iko kanba-magbɛnɛnu minnu mafɛlɛn-nya kin a kɔma kɔnɔ a burɛ fanɛ mɔgɔ-faganɛnu kolenu na anubɛ fen-tulinɛnu.

²⁸ Wo ye wo nyɛrɛ mala mɔgɔ-nyimɛnu na mɔgɛ bɛɛ yala wo nya le. Wo kɔmɛ kin kɔnɔ wo burɛ fanɛ foninyɛ anubɛ hakɛnu na.

Farisinuna Tɔrɔyɛ Fɔ-Koe Yisa Bolo

²⁹ “Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, nɛbi minnu ya telenbagayɛ kɛ fɔlɔ-nun, wo ye kanba-nyimɛnu sinna wonu ye ka bɔnnu sɔ kanbɛ wonu kuma.

³⁰ Wo ye a fɔla ko ni wole ye wo benbanuta wati rɔ nun, anu ya min kɛ nɛbinu na ka anu faga, wole ti wo kɛ nun.

³¹ Woletɔ wo ara wo sɔn a la ko minnu ya nɛbinu faga, wonu bɔnsɔn le wole la!

³² Nba, wo benbanu ya min dabira, wo ni wo raya ka wo laban!

³³ Wo sɔn yogo iko duguma-fannu anubɛ duguma-fen-dannu! Wo si kisi nyahanama ma kama?

³⁴ Nba, a nɛbi wo, a hɛnkilima wo, a karan-mɔgɔ wo, n si wonu nana wo ma. Wo si donu faga ka donu gbangban kɔlɔma ma ka donu gbesi Yahudiya-dina-bɔnnu na. Wo si to anu gbenna soenu tɔ.

³⁵ Mɔgɔ-magbalanɛ min bɛɛ fagara, wo si wonuna tɔrɔyɛ sɔrɔn. Ka a bi Ebɛlita sayɛ ma ale min magbalanɛ, kɔni, ha ka a sigi Bɛrɛkayala dan Sakarayata sayɛ la, wo si tɔrɔyɛ wo bɛɛ sɔrɔn, ado wo ya ale Sakaraya faga Alla-Bato-Bɔn anubɛ saraka-bɔ-tinɛ tɛma.

³⁶ Wo ni wo hɛnkili to kɛ ko! Wole si tɔrɔyɛ sɔrɔn wo damala ko la!

Yisala Keninteyɛ Yerusalɛm Soela Ko La

³⁷ “E, Yerusalɛm, Yerusalɛm! I ye nɛbinu fagala nun tolon! Alla ara kilayɛ minnu sɔ i wara, i ya wonu mabon kurinu na! A sɔgɛ ye n na wati siyaman ka ila mɔgɛ bɛɛ ladɛn iko sisi-denbɛ si ala dannu nadɛn a kanban kɔrɔ nya min kɔnɔ i ma sɔn n ni wo ma!

³⁸ Nba, Alla-Bato-Bon rakolonyanɛ si to feu!

³⁹ N bi kɛ fɔla i ye. I wa a fɔ tumɛ min ko, ‘Min bi nala Mari tɔgɛ rɔ, Allata duwɛ si to wo fɛ.’ Nba, wo si n yen tun wati wo le tɔ.”