Matiyu 22 - ALLALA KUMƐ

Kɔnyɔ-Masɔɛ Wara Koe

¹ Yisa wulita tilinu sala mɔgɛnu ye tun.

² A ko, “Alla min bi Arinyɛni tɔ, wota mansayɛ mani de iko mansɛ min ya ala den-keila kɔnyɔ-masɔɛ rabɛn.

³ Kɔnyɔ-masɔɛ sara minnu kɔrɔ, a ya ala wɔli-kɛlɛnu sɔ wonu kele tinɛ kɔnɔ wonu ma sɔn nala.

⁴ Woletɔ kɔnyɔ-masɔɛ sara minnu kɔrɔ, a ya a sara ala wɔli-kɛla-gbɛrɛnu na ko, ‘Wo ta a fɔ wonu ye ko koe bɛɛ ra ara bɛn. N bara turɛnu anubɛ ninki-den-tɔlɔnɛnu faga. Ma ara fan bɛɛ rabɛn. Anu ni na kɔnyɔ-masɔɛ rɔ!’

⁵ Kɔnɔ minnu kelenɛ, wonu ma anu tole masɔ wo la. Anu tara anu nyɛrɛ makoenu tɔ. Kelen tara ala sɛnɛ rɔ. Do tara feri-kɛ-tinɛ.

⁶ Kɔnɔ donu fanan ya ala wɔli-kɛlɛnu bira ka anu gbesi ka anu faga.

⁷ Mansɛ diminyara bɛrɛkɛ! A ya ala kɛlɛ-dannu nata mɔgɔ-fagalɛ wonu faga tinɛ ka anuna soe mintan.

⁸ Wo kɔma, a ya ala wɔli-kɛlɛnu kele tun. A ko, ‘Ma ara kɔnyɔ-masɔɛ rabɛn kɔnɔ n ya minnu kele, a ma kɛn, anu ni na tun.

⁹ Nba, wo ta wo sɔ kila-tangbɛnu tɔ. Wo wa mɔgɔ-wo-mɔgɔ yen, wo ni wonu kele kɔnyɔ-masɔ-ladiyɛ ma.’

¹⁰ Nba, wɔli-kɛlɛnu tara kila-tangbɛnu tɔ. Anu ya mɔgɛ min bɛɛ yen, anu ya wonu nadɛn, a nyima wo, a yogoma wo, a bɛɛ. Kɔnyɔ-masɔ-ladiya-bɔn fara mɔgɛnu na pim!

¹¹ “Mansɛ tara ladɛn rɔ. A ya minnu kele, a ya wonu mafɛlɛn. Yaga, a ya kei do yen kɔnyɔ-masɔ-duruki sa wo kan na.

¹² Mansɛ ya a manyinika ko, ‘N bɔ, ile donta yan kama, kɔnyɔ-masɔ-duruki sa i kan na?’ A ma ke fenfen fɔla.

¹³ Mansɛ ya a fɔ ala wɔli-kɛlɛnu ye ko, ‘Wo ni a bole anubɛ a kian lakiri ka a lakɛ pinpi rɔ pon! Mɔgɛnu si di ka anu nyin masɔgɔ dumɛ rɔ kan min.’ ”

¹⁴ Yisa ya kumɛ wo kundon ko, “Mɔgɔ siyaman kelenɛ kɔnɔ minnu yabɔnɛ, wonu ma siya.”

Duti-Sara-Ko Nyinikalɛ

¹⁵ Farisinu tara ka gbundu kiri anu si ta Yisa da-kɔrɔbɔ nya na.

¹⁶ Anu ya anuna karan-dan donubɛ Mansa Hɛrodila fɛ-bilalɛnu nata Yisa ma. Wonu ko, “Karan-mɔgɔ, ma ya a lɔn ko mɔgɔ-telennɛ le ile la. I ye mɔgɛnu karanna tonyɛ la Alla sako rɔ. I ti kilan mɔgɔ-wo-mɔgɔ la, ado bɛɛ rakɛn ile yala.

¹⁷ Nba, i miriya ye kama? Ka duti sara Romu nyamani-kun-tigi wara, mala tɔn-tinyɛ le wo la, ka, a sa wo nya? Wo fɔ ma ye.”

¹⁸ Kɔnɔ gbundu-koe min kirinɛ a kan ma, Yisa ya wo bɛɛ lɔn. Woletɔ a ko, “Wole nyɛrɛ-mayiralɛnu, wo ye n da-kɔrɔbɔ-koe rɔ nfenna?

¹⁹ Wo ni duti-wodi do yira n na!” Anu nara wodi-mɛlan do la a ma.

²⁰ A ya anu manyinika ko, “Yon yakɔrɛ anubɛ a tɔgɛ ye kɛ ma?”

²¹ Anu ya a yabi ko, “Romu nyamanɛ kun-tigi-ba.” Nba, Yisa ya a fɔ anu ye ko, “Romu nyamani-kun-tigitɛ ye min na, wo ni wo di ale ma. Allatɛ ye min na, wo ni wo di Alla ma.”

²² Anu ya wo lamɔɛn tumɛ min, anu kawara kati! Anu bɔra a fɛ ka ta anu ye.

Furi Lawuli-Ko Nyinikalɛ

²³ Tele kelan wo rɔ, Sadusi donu nara Yisa wara. (Wonu denu bi a fɔla ko mɔgɛnu ti wuli ka bɔ sayɛ rɔ.)

²⁴ Anu ya Yisa manyinika ko, “Karan-mɔgɔ, Nɛbi Musa ya ma karan ko, ‘Ni kei fagara, a ma den to, a na-kelen-nyɔgɛ ni kɛɛ-musi wo bi alako wo ni dan sɔrɔn kei wo ye min fagara.’

²⁵ Nba, kei na-kelen-nyɔgɔ wɔrɔnfila ye nyɔ nun. Anu kɔrɔ ya musi furu. A fagara. A ma den to. Ala musi tora kei wo tagbara-sɛ ye.

²⁶ Ale fanan mara wo nya le. A sawa nyɔgɛ fanan mara wo nya le. Ala ban, a wɔrɔnfilɛ bɛɛ fagara wo nya na le.

²⁷ Wo kɔma, musi nyɛrɛ fagara.

²⁸ Nba, furinu ba wuli tumɛ min, musi wo si ma yontɛ la anu tɛma, ado a sigira anu dama wara nun?”

²⁹ Yisa ya anu yabi ko, “Wo ara sama feu! Wo ma Allata kitabu lɔn anubɛ Allata sɛnbɛ.

³⁰ Furinu ba wuli tumɛ min, anu si ma iko Arinyɛnitɔ-melikanu. Keinu ti musi furu. Musinu ti ta kei-wara-sigi rɔ.

³¹ Nba, ka furi-lawuli-koe fɔ, Alla ya min fɔ wo ye, wo ma wo karan bɛ, wa? A sɛbɛnɛ ko

³² Iburayimata Alla le ale la anubɛ Isiyakata Alla anubɛ Yakobata Alla. Wo kɔrɛ le ko mɔgɔ-nimɛnuta Alla le ale la, furinuta ma.”

³³ Nyama ya wo lamɔɛn tumɛ min, anu kawara Yisala karan ma.

Tɔn-Belebele Wara-Koe

³⁴ Farisinu ya a lamɔɛn tumɛ min ko Yisa ara Sadusinu dɛ latogon don, anu fanan ya anu nyɔgɔn nadɛn.

³⁵ Anuna tɔn-karan-mɔgɛ do ya a raya a da-kɔrɔbɔɛ ma nyinikalɛ do fɛ.

³⁶ A ko, “Karan-mɔgɔ, tɔn nyamintan kolo tɔn bɛɛ ko?”

³⁷ Yisa ya a yabi ko, “A sɛbɛnɛ ko, ‘I ni ita Mari Alla keni i yisi bɛɛ la anubɛ i sɔndɔmɛ bɛɛ la anubɛ i hɛnkili bɛɛ la.’

³⁸ Tɔn wo kolo tɔn bɛɛ ko.

³⁹ A fila nyɔgɛ min tugunnɛ wo la, wo le kɛ la ko, ‘I ni i sigi-nyɔgɛ keni iko i nyɛrɛ.’

⁴⁰ Alla ya tɔn min bɛɛ di Nɛbi Musa ma anubɛ nɛbi doinuna karan bɛɛ dunnɛ tɔn filɛ kɛ la.”

Nyinikalɛ ka Bɛn Allata-Mɔgɔ-Yabɔnɛ Ma

⁴¹ Farisinu nadɛnnɛ tumɛ min, Yisa ya anu manyinika ko,

⁴² “Wota miriya ye kama Allata-Mɔgɔ-Yabɔnɛla ko la? Yon bɔnsɔn ye ale la?” Anu ya a yabi ko, “Mansa Dawuda bɔnsɔn le.”

⁴³ Yisa ya anu manyinika ko, “Nfenna worɔ, Allala Ni-Sɛnimɛ ya a ma, Mansa Dawuda ya a kele ko, ‘Mari’? Ado nfan, Mansa Dawuda ya a fɔ ko,

⁴⁴ ‘Mari ya a fɔ nta Mari ye ko a ni a sigi a bolo-nyimama-kɔɛn wara la ha ale Mari ni a yogenu sa a tontɛ kɔrɔ.’

⁴⁵ Nba, ni Mansa Dawuda ya a kele ko, ‘Mari,’ Allata-Mɔgɔ-Yabɔnɛ si bɔ Dawuda bɔnsɔn rɔ kama worɔ?”

⁴⁶ Hali dafa, mɔgɔ kelen ma a tɛgɛ. Ka a dabira wo tele ma, mɔgɔ-wo-mɔgɔ ma sisi a manyinikala nyinikali-gbɛrɛ la tun.