Matiyu 21 - ALLALA KUMƐ

Yisala Don Koe Yerusalɛm Gbiliyɛ Rɔ

¹ Anu gbɛrɛnta Yerusalɛm ma tumɛ min, anu nara Bɛtafagi soe burɔ Ɔlifi kɔnkɛ dafɛ. Yisa ya ala karan-den fila lata anu yarɔ.

² A ya a sara anu na ko, “So-nɛ min bi wo yarɔ, wo ta nyɔ. Wo ye donna nyɔ nya min wo, wo si sofɛli-kirinɛ yen, ala dan ye a dafɛ. Wo ni anu fulen ka na anu na n bara.

³ Ni mɔgɔ-wo-mɔgɔ ya wo manyinika, wo ni a fɔ a ye ko, ‘Mari makoe ye anu na.’ Wo kɔma, a si anu boloka tiriya!”

⁴ Wo mara alako nɛbi wola kumɛ ni bɔ-a-la ko,

⁵ “A fɔ Mansa Dawudala so-burɔ-mɔgɛnu ye ko ala mansɛ ye nala a wara. A famayiginɛ. A siginɛ sofɛlɛ la. A siginɛ sofɛli-bulan la.”

⁶ Woletɔ ala karan-dan wonu tara. Yisa ya min fɔ anu ye, anu ya wo kɛ.

⁷ Anu nara sofɛlɛ wo la anubɛ ala dan ka anuna durukinu sa anu kuma. Yisa sigira duruki wonu kuma.

⁸ Nyama-ba ya anuna durukinu tasa kilɛ la. Donu ya kɔlɔma-bolɔnnu tɛgɛ ka anu sa kilɛ la.

⁹ Nyama min bi tagamana Yisa yarɔ anubɛ nyama min bi tagamana a kɔma, wonu ya gbele-gbelan dabira ko, “Mansa Dawudala dan, i ni sɛnɛ! Min bi nala Mari tɔgɛ rɔ, Allata duwɛ ni to wo kuma! Alla tanto!”

¹⁰ Yisa donta Yerusalɛm tumɛ min, soe bɛɛ lamagara. Mɔgɛnu ya nyinikali kɛ ko, “Yon bi kɛ la?”

¹¹ Nyama ya anu yabi ko, “Nɛbi Yisa le kɛ la ka bɔ Nasarɛti soe burɔ Kalili sigisɔn rɔ.”

Yisa Don-Koe Alla-Bato-Bɔn La

¹² Yisa donta Alla-Bato-Bɔn la tumɛ min, minnu bi sarakɛnu mayirala anubɛ minnu bi feri kɛla Alla-Bato-Bɔn la, a ya wo bɛɛ gben. A ya wodi-felennɛnuna tebulunu nabui anubɛ kangbo-ferilɛnuna sigi-fannu.

¹³ A ya a fɔ anu ye ko, “A sɛbɛnɛ Allata kitabu rɔ ko, ‘Anu si nna Bato Bɔn kele madiyali-kɛ-bɔn kɔnɔ wole ye a mala kankannu dogon tinɛ la!’ ”

¹⁴ Fiyɔnnu anubɛ minnu bi anu tonkanna, wonu nara a wara Alla-Bato-Bɔn la. A ya wonu nakɛndɛya.

¹⁵ Saraka-masɔla-wɛnu anubɛ tɔn-karan-mɔgɛnu ya Yisa yen kabana-koenu kɛla. Anu ya a lamɔɛn dennɛnu bi anu kan nabɔla Alla-Bato-Bɔn la ko, “Mansa Dawudala dan, i ni sɛnɛ!” Wo le ya a ma, anu diminyara.

¹⁶ Anu ya a fɔ Yisa ye ko, “Anu bi min fɔla, i sa wo lamɔɛnna?” Yisa ya anu yabi ko, “N bi a lamɔɛnna, yɔ! A sɛbɛnɛ Allata kitabu rɔ ko, ‘Dennɛnu bi tantoli-siginu sala a kilɛ fɛ.’ Wo ma wo karan bɛ, wa?”

¹⁷ Yisa ya anu to nyɔ. A bɔra soe wo burɔ ka ta ki Bɛtani soe burɔ.

Toro-Kuri Danka-Koe Yisa Bolo

¹⁸ Wo banda kɛ subaga ma, Yisa sɛgimatoe soe burɔ, kɔnkɛ ya a bira.

¹⁹ A ya toro-kuri yen kilɛ dafɛ. A tara ke kɔlɔma wo ma kɔnɔ a ma fenfen yen a la fɔ yanba-kunyɛnu gbansan! Woletɔ a ya a fɔ toro-kuri ma ko, “Ile, i ti gbɔ tun!” Toro-kuri wo mafɔsɔra kelenna!

²⁰ Karan-dannu ya wo yen tumɛ min, anu kawara. Anu ya nyinikali kɛ ko, “Toro-kuri kɛ mafɔsɔra kama tiriya?”

²¹ Yisa ya anu yabi ko, “Wo ni wo hɛnkili to kɛ ko! Ni dɛnkɛninyɛ ye wo bolo, ado wo ma sika, n bara min kɛ toro-kuri kɛ la, wole fanan si ke wo nyɔgɔn kɛla. Wo dɔrɔn ma, wo si ke hali ka a fɔ kɔnkɛ kɛ ye ko, ‘Bɔ yan. I ni ta bui kɔgɔ-yi rɔ.’ Wo si ma le.

²² Ni dɛnkɛninyɛ ye wo bolo, wo wa fenfen tara madiyalɛ rɔ, wo si wo sɔrɔn.”

Sɛnbɛ Nyinikalɛ

²³ Yisa tara Alla-Bato-Bɔn la tun. A ye mɔgɛnu karanna tumɛ min, saraka-masɔla-wɛnu anubɛ Yahudiya-kɛmɔgɛnu nara a wara ka a manyinika ko, “I ye koe kɛnu kɛla nfen sɛnbɛ la? Yon ya sɛnbɛ kɛ di i ma?”

²⁴ Yisa ya anu yabi ko, “Nde fanan si wo manyinika nyinikali kelen dɔrɔn na. Ni wo ya n yabi, n bi koe kɛnu kɛla sɛnbɛ min na, n si wo fɔ wo ye.

²⁵ Yɔni ya batasilɛ kɛ sɛnbɛ min na, wo bɔra mi? A bɔra Alla le bolo, ka, a bɔra mɔgɛnu bolo?” Anu wulita anu nyɔgɔn masɔsɔla ko, “Ni ma ya a yabi ko, ‘A bɔra Alla le bolo,’ a si a fɔ ma ye ko, ‘Nba, nfenna wo ma la Yɔni la?’

²⁶ Kɔnɔ ni ma ko, ‘A bɔra mɔgɛ le bolo,’ mɔgɛnu si min kɛ, ma kilannɛ wo la bawo anu dama lanɛ a la ko Yɔni, nɛbi le.”

²⁷ Woletɔ anu ya Yisa yabi ko, “Ma ma a lɔn.” Nba, Yisa ya a fɔ anu ye ko, “Nde fanan bi koe kɛnu kɛla sɛnbɛ min na, n ti wo fɔ wo ye.”

Den Filɛ Wara-Koe

²⁸ Yisa tora kumala ko, “Nba, wo miriya ye kama kɛ la? Kei do ye nyɔ nun, den mɔgɔ fila ye a bolo. A tara a kinamɛ wara ka a fɔ a ye ko, ‘Nna dan, ta, i ni telen nna sɛnɛ rɔ bi.’

²⁹ “Wo ya a fɔ a fa ye ko, ‘N sa a rɔ.’ Kɔnɔ a laban, a ya a miriya yɛlɛma. A tara sɛnɛ rɔ.

³⁰ “Anu fa tara ala den-dɔgɔmɛ wara ka a fɔ wo fanan ye wo nya. “Wo ya a fɔ a fa ye ko, ‘N fa, n si ta.’ Kɔnɔ tɔ-a-la, a ma ta.

³¹ “Nba, wo filɛ tɛma, yon ya a fa sako kɛ?” Anu ya a yabi ko, “A kinamɛ.” Yisa ya a fɔ anu ye ko, “Nba, wo ni wo hɛnkili to kɛ ko! Duti-makelelɛnu anubɛ yɛlannu si don Allala mansayɛ rɔ wo yarɔ.

³² Wo si na ma le bawo Yɔni-Batasi-Kɛlɛ nara ka kila-latelennɛ yira wo la. Wo ma la a la. Kɔnɔ duti-makelelɛnu anubɛ yɛlannu lara a la. Hali wo yen wo bolo, wo ma wo miriya yɛlɛma ka la a la.”

Ki-Fen Fɛ-Biralɛnuta Tili

³³ Yisa ko, “Wo ni wo tole masɔ tili-gbɛrɛ la. Dugu-tigi do ye nyɔ nun min ya ki-fannu ki ka a masansan. A ya gbere-kole ladan ka bɛndɛnu sɔ. Wo kɔma, a ya mɔgɛ donu sinka nyɔ la. A bɔra a warɛ ka ta tagama rɔ.

³⁴ Anu gbɔ-keri-wati kera tumɛ min, a ya ala wɔli-kɛlɛnu nata anu ma ko anu ni atɛ don wonu bolo.

³⁵ Anu ya ala wɔli-kɛlɛ wonu bira ka kelen gbesi ka do faga ka do mabon kuri la.

³⁶ Wo kɔma, a ya wɔli-kɛla-gbɛrɛnu nata tun minnu siya a fɔlɔtɛnu ko. Anu ya wonu fanan bira wo nya.

³⁷ Tɔ-a-la, a ya ala dan lata anu ma. A ko, ‘Anu si nna dan gbiliya, yɔ.’

³⁸ Kɔnɔ anu ya ala dan wo yen nala tumɛ min, anu ya a fɔ anu nyɔgɔn ye ko, ‘Ki-fen-tigila dan le nala kɛ la. Wo na, ma ni a faga. Ma si a bolo-fannu sɔrɔn worɔ!’

³⁹ Woletɔ anu ya a bira. Anu ya a gben ka bɔ ki-fannu tɛma ka a faga.”

⁴⁰ Yisa ya nyinikali kɛ. A ko, “Nba, ki-fen-tigi wa na tumɛ min, a si nfen ma kɛnu na?”

⁴¹ Anu ya a yabi ko, “A si mɔgɔ-yogomɛ wonu faga serr, ka mɔgɔ-gbɛrɛnu sinka a la minnu si atɛ di a ma a keri-wati rɔ.”

⁴² Yisa ya a fɔ anu ye ko, “A sɛbɛnɛ Allata kitabu rɔ ko, ‘Bon-sɔlɛnu ya anu ban kuri min na, wo le ara ma sɛbɛna-kuru-tɔnɔnamɛ la. Mari nyɛrɛ-nyɛrɛ ya kɛ ma, ado wo mara kabana-ko-wɛ la ma yala!’ Ha bi, wo ma wo karan bɛ, wa?

⁴³ Woletɔ n bi a fɔla wo ye. Allala mansayɛ si bi wole bolo ka di wonu ma minnu si ko-latelennɛ ma. [

⁴⁴ Min ba bui kuri kɛ kuma, wo kolenu ta si kerikeri, ado ni kuri kɛ buira min ma fanan, a si wo ramɔsɔkɔn.”]

⁴⁵ Saraka-masɔla-wɛnu anubɛ Farisinu ya Yisala tilinu namɔɛn. Anu ya a lɔn ko a ye kumala anu denu ma.

⁴⁶ Woletɔ anu ya anu taya a bira-koe ma. Kɔnɔ anu kilanta nyama la minnu bi anu mirila Yisa ma ko nɛbi le.