Matiyu 2 - ALLALA KUMƐ

Hɛnkilimɛnu Bɔ-Koe Tele-Bɔɛ-Wara La

¹ Yisa sɔrɔnta Bɛtalehɛm soe burɔ Yudiya nyamanɛ rɔ wo tumɛ Hɛrodi ye mansayɛ la nyɔ kun na. A ma mɛ wo kɔma, minnu ya lolenu-karan lɔn, wo donu bɔra tele-bɔɛ ka na Yerusalɛm.

² Anu ya nyinikalɛ kɛ ko, “Dennɛ min sɔrɔnta ka na ma mansɛ la Yahudiyanu kun na, wo ye mi? Ma ara a sɔrɔn-tamasere-lole yen ma warɛ tele-bɔɛ min kɛ, ma ara na a bato tinɛ.”

³ Mansa Hɛrodi ya anuna nyinikalɛ lamɔɛn tumɛ min, wo ya a yisi tɔrɔ bɛrɛkɛ, ado kumɛ wo ya Yerusalɛm kɛ bɛɛ tɔrɔ.

⁴ A ya saraka-masɔla-wɛnu anubɛ tɔn-karan-mɔgɛnu nadɛn ka anu manyinika ko, “Wola Kirasiti kɛ si sɔrɔn kan tinɛ mintan tɔ?”

⁵ Anu ya a yabi ko, “A si sɔrɔn Bɛtalehɛm soe burɔ Yudiya nyamanɛ rɔ. Ma ya wo lɔn bawo nɛbi do ya a sɛbɛ nun ko,

⁶ ‘Ile Bɛtalehɛm soe, so dɔgɔmanɛ ma i la tun Yuda nyamanɛ rɔ bawo kun-tigi do si bɔ ile rɔ min si kun-tigiyɛ kɛ Isirɛla mɔgɛnu kun na, Marita mɔgɛnu, kɔni.’ ”

⁷ Wo kɔma, Mansa Hɛrodi ya hɛnkilimɛ wonu kele dogɔn rɔ alako a ni a lɔn anu bolo, lole wo bɔra gbɛ rɔ anu ye wati min gbɛn!

⁸ A ya anu sɔ Bɛtalehɛm ka anu masara ko, “Wo ta dennɛ wo nyini bɛrɛkɛ! Wo wa a yen tumɛ min, wo ni na a rakaran n ye. Nde bɛrɛn ni ta a bato.”

^9-10 Mansɛ ban wo fɔla, hɛnkilimɛ wonu wulita ka ta. Anu bi kilɛ la tumɛ min, anu ya lole min yen tele-bɔɛ, wo bɔra gbɛ rɔ anu ye tun. Anu ya a yen tumɛ min, anu sewara kati! Lole wo sɔra anu yarɔ san ma ha a nara sɔ kan tinɛ wo rɔ dennɛ wo ye kan min.

¹¹ Anu donta bɔn la dennɛ anubɛ a na Mariyama ye kan min. Anu ya dennɛ yen min kɛ, anu ya anu nyɛnkin ka a bato. Wo kɔma, anu ya anuna bɔrɛnu naka ka a sanbɛnu di a ma. Anu ya a sanba sɛnɛ la, anubɛ isɛnti min tɔgɛ farankinsɛnsɛ, anubɛ tulu-suma-diyamɛ min tɔgɛ mira.

¹² Kɔnɔ Alla ya hɛnkilimɛ wonu nalɔn kiyo rɔ ko anu kana sɛgi Mansa Hɛrodi wara tun, woletɔ anu sɛgira anu barɛ kila-gbɛrɛ fɛ.

Yusufunu Buru-Koe Mansa Hɛrodi Kɔrɔ

¹³ Wo kɔma, Marita melika bɔra gbɛ rɔ Yusufu ye kiyo rɔ. A ko, “I lasɔ. I ni dennɛ anubɛ a na bi ka wo buri ka ta Iyipiti nyamanɛ rɔ. Hɛrodi kɛ si dan kɛ nyini a faga-koe la. Wo ni to nyɔ ha n ni a fɔ i ye tumɛ min ko wo ni bɔ nyɔ.”

¹⁴ Woletɔ Yusufu ya dennɛ anubɛ a na bi suyi wo rɔ ka Iyipiti nyamanita-kilɛ bira.

¹⁵ Wonu tora nyɔ ha Mansa Hɛrodi tenbira. Wo mara alako Mari ya min fɔ nɛbi ye nun, wo la ni kanbali bawo nɛbi le ya a fɔ ko Mari ya ala dan kele ko a ni bɔ Iyipiti.

Dennɛnu Faga-Koe

¹⁶ Hɛrodi ya a lɔn tumɛ min ko tele-bɔ-hɛnkilimɛnu bara a yanfa, a yisi bɔra bɛrɛkɛ! A ya a fɔ ko den-kei min bɛɛ ye Bɛtalehɛm soe burɔ anubɛ a dafɛ-soenu tɔ, a ko dan minnu sɔrɔn ma tenbi san fila la, wo bɛɛ ni faga. Hɛnkilimɛnu ya lole wo yen wati min, ale Hɛrodi ya san-fila-koe wo latɛgɛ wola ko la.

¹⁷ Nɛbi Yɛrɛmaya ya min fɔ, wo bɔra-a-la. A ko,

¹⁸ “Ma ya diyi-kɛ-kan anubɛ sɔnkɔ-sɔnkɛ lamɔɛn Rema soe burɔ. Resɛli ye dila ala dannuna ko la. A ye dila, ado a ma ti diya bawo anu bara ala dan bɛɛ faga.”

Sɛgi Koe Isirɛla Nyamanɛ rɔ ka Bɔ Iyipiti

¹⁹ Mansa Hɛrodi tenbi kɔmɛ, Marita melika bɔra gbɛ rɔ Yusufu ye kiyo rɔ Iyipiti nyamanɛ rɔ.

²⁰ A ko, “I lasɔ. I ni dennɛ anubɛ a na bi. I ni sɛgi anu na Isirɛla nyamanɛ rɔ bawo minnu ya anu taya dennɛ kɛ faga-koe ma, wonu bara tenbi.”

²¹ Nba, Yusufu ya a lasɔ. A ya dennɛ anubɛ a na bi ka Isirɛla nyamanita-kilɛ bira.

²² A ya a lamɔɛn tumɛ min ko Hɛrodila dan Akileyasi ara sigi mansayɛ la a fa gbɛ rɔ Yudiya nyamanɛ kun na, Yusufu kilanta nyɔ-sigi-koe ma. Marita melika ya a lalɔn kiyo rɔ tun ko a kana sigi nyɔ rɔ. Wo le ya a ma, anu tara sigi Kalili sigisɔn rɔ.

²³ Anu sigira soe do burɔ min tɔgɛ Nasarɛti. Wo mara tumɛ min, nɛbinu ya min fɔ kɔrɔma la, wo kanbalita ko, “Mɔgɛnu si a lɔn Nasarɛti kɛ la.”