Matiyu 14 - ALLALA KUMƐ

Yɔni-Batasi-Kɛlɛ Faga Koe

¹ Mansa Hɛrodi min bi Kalili sigisɔn kun na, wo ya Yisa wara-koe lamɔɛn tumɛ min,

² a ya a fɔ ala mɔgɔ-banu ye ko, “Yɔni-Batasi-Kɛlɛ ara sɛgi a niyi la tun serr! Wo le ya a to, a ye kabana-koe kɛnu kɛla.”

³ Yɔni ye Hɛrodi miriya rɔ bawo a ya a ma nun, a ara Yɔni bira ka a kiri yele la. A ya wo ma ka a tɛgɛ a na-kelen-nyɔgɛ Filipila musi Hɛrodiyasila ko la.

⁴ Fɔlɔ-nun, Yɔni-Batasi-Kɛlɛ tora a fɔla Hɛrodi ye dɛɛ ko, “A ma bɛn, i ni i dɔgɛla musi bi a bolo!” A tora wo fɔla min kɛ,

⁵ Hɛrodi ye a fɛ ka a faga kɔnɔ a kilanta Yahudiyanu na bawo wonu ya Yɔni lɔn nɛbi la.

⁶ Hɛrodi sɔrɔn-tele kera tumɛ min, Hɛrodiyasila dunmusi ya a dɔn nyama bɛɛ yala. Dɔn wo ya Hɛrodi hɛnɛ kati!

⁷ A ya a keli dunmusi wo ye ko, “I wa n tara fenfen ma, n si wo di i ma!”

⁸ Ka a tɛgɛ a na ya min fɔ a ye, a ya Hɛrodi tara ko a ye nyinina Yɔni-Batasi-Kɛlɛ kunyɛ ma pileti ma.

⁹ Mɔnɛ donta mansɛ rɔ ka a tɛgɛ ala kelili wo ma. A ara a keli nyama yala min kɛ, a ko fɔ a ni wo di a ma.

¹⁰ Woletɔ a ya mɔgɛ do sɔ ka Yɔni kunyɛ tɛgɛ a la yele la.

¹¹ Anu nara a kunyɛ la pileti rɔ ka a di dunmusi wo ma. A tara a la a na wara.

¹² Yɔnila karan-dannu nara ka a furi bi ka ta a togon. Wo kɔma, anu tara wo fɔ Yisa ye.

Mɔgɔ Waga Loli De-Nyini-Koe Yisa Bolo

¹³ Yisa ya Yɔni faga-koe lamɔɛn tumɛ min, a sigira kulɔn rɔ ka ta kan tinɛ do rɔ mɔgɔ-wo-mɔgɔ sa kan min. Mɔgɛnu ya a ta-koe lamɔɛn min kɛ, anu bɔra anuna soenu tɔ ka ta a wara anu kian ma.

¹⁴ Yisa bɔra kulɔn rɔ tumɛ min, a ya nyama yen min kɛ, a yisi fara kinikini la anuna ko la. A ya anuna kirayatoenu nakɛndɛya.

¹⁵ Wura dɛ ara gbɛrɛn tumɛ min, ala karan-dannu nara a wara. Anu ko, “Suyi ara ke. Wulɛ le yan na. I ni mɔgɛnu nata so-mɛsɛnu tɔ alako anu ni dɔn-fan san anu nyɛrɛ ye.”

¹⁶ Yisa ya a fɔ anu ye ko, “Hali anu ma ta. Wole nyɛrɛ ni dɔn-fan di anu ma.”

¹⁷ Anu ya a fɔ a ye ko, “Biredi loli anubɛ yɛgɛ fila pe le ma bolo yan.”

¹⁸ Yisa ko, “Wo ni na wonu na n ma.”

¹⁹ A ya a fɔ mɔgɛnu ye ko anu ni sigi binyɛ kuma. Wo kɔma, a ya biredi loli anubɛ yɛgɛ filɛ wonu bi. A ya a yɛ layɛlɛ san ma ka baraka bira Alla ye. A ya biredi loli wo rakerikeri ka a don ala karan-dannu bolo. Karan-dannu ya wonu di mɔgɛnu ma.

²⁰ Bɛɛ ya fan dɔn ka fa pim! Anu datoe, ala karan-dannu ya sende tan-ni-fila lafa wonu na.

²¹ Minnu ya wo dɔn, a keimɛ wonu yatɛ le mɔgɔ waga loli nyɔgɔn (5,000) na. Musinu anubɛ dennɛnu sa yatɛ wo rɔ.

Yisa Tagama-Koe Yi Kuma

²² Yanni a ni nyama lata, Yisa ya ala karan-dannu sigi kulɔn rɔ ka anu nata a yarɔ dalɛ kɔma.

²³ A banta nyama masarala tumɛ min, a yɛlɛta kɔnkɛ kuma a dan na ka madiyali kɛ. Wurɛ kenɛ, a kelen pe le tora nyɔ.

²⁴ Wo wati ya a taran, kulɔn ara ta dalɛ tɛma pon! Yi-ramagɛ ya kulɔn latinki-tanka bawo fɔn-belebele sigira a rɔ.

²⁵ Yisa nara ke anu ma banda-ka-da-pinpi ma. A ye tagamana anu bara yi kuma.

²⁶ Karan-dannu ya a yen tagamana yi kuma tumɛ min, anu kun makɔra. Anu ya a lɔn ko yiyɛ le! Anu gbele-gbelenta kilan bolo.

²⁷ Yisa kumara anu ye tiriya! A ko, “Wo ni wo yisi-kimɛ! Nde le. Wo kana kilan!”

²⁸ Pita ko, “Mari, nba ile le min kɛ, a fɔ n ye ko n ni tagama yi kuma ka ta i wara.”

²⁹ Nba, Yisa ya a fɔ a ye ko, “Na!” Woletɔ Pita bɔra kulɔn rɔ. A ya tagama dabira yi kuma ka ta Yisa wara.

³⁰ Kɔnɔ fɔnyɔ tugura a ma tumɛ min, a ya wo yen min kɛ, a kilanta. A mara min kɛ ko a ye tola yi rɔ, a gbele-gbelenta ko, “Mari, n nakisi!”

³¹ Yisa ya a bole layigi tiriya ka Pita layɛlɛ. A ko, “Ila dɛnkɛninyɛ dɔgɔ kati! I sikara nfenna?”

³² Anu filɛ bɛɛ sigira kulɔn rɔ. Fɔnyɔ sigira-a-la don!

³³ Karan-dan minnu bi kulɔn rɔ, wonu ya Yisa bato. Anu ko, “Tonyɛ le, Allala dan le ile la!”

Kirayatoenu Nakɛndɛya-Koe Kɛnɛsarɛti Soe Burɔ

³⁴ Anu ya dalɛ tɛgɛ. Anu nara gbele ma Kɛnɛsarɛti soe dafɛ.

³⁵ Mɔgɛnu ya a lɔn Yisa la tumɛ min, anu ya kilayɛ lata anu dafɛ-nyamanɛ bɛɛ rɔ ko anu ni na kirayatoenu na Yisa wara.

³⁶ Anu ya a madiya ko, “I yandi, i ni sɔn kirayatoenu ni anu bole maga ila duruki da-gbole la.” Nba, min bɛɛ ya a bole maga a la, wonu kɛndɛyara.