Matiyu 11 - ALLALA KUMƐ

Yɔni-Batasi-Kɛlɛta Kilayɛnu Wara-Koe

¹ Yisa banta a sarala ala karan-den tan-ni-filɛ la tumɛ min, a bɔɛ nyɔ, a tara Kalili nyamanita soenu tɔ ka mɔgɛnu karan anubɛ ka kawandili bɔ.

² Yɔni-Batasi-Kɛlɛ ye yele la tumɛ min, a ya Allata-Mɔgɔ-Yabɔnɛla wɔli-kɛ-tɔgɛ lamɔɛn, Yisa, kɔni. Woletɔ a ya ala karan-dan donu nata Yisa wara.

³ Anu ke, anu ya Yisa manyinika ko, “A fɔ ma ye, wa, Yɔni ya minna na-koe fɔ, ile le wo la, ka, ma ni dogbɛrɛ makɔni?”

⁴ Yisa ya anu yabi ko, “Wo ye min namɔɛnna ka min tayen wo nyɛrɛ yɛ la, wo sɛgi ka wo dantɛgɛ Yɔni ye.

⁵ Ya-fiyɔnnu bi fan yenna, namarɛnu bi tagamana, kunatoenu bara kɛndɛya, tolo-gberenu bi ko lamɔɛnna, furinu na ara wuli ka niyi lafɛ, kibara-nyima-kawandili ara bɔ bolo-kolɔnnu ye.

⁶ Sika sa ale min tɔ ndela ko la, duwa-dan le wo tigi la!”

⁷ Yɔnila karan-dannu sɛgimatoe, Yisa ya Yɔni wara-koe fɔ nyama ye. A ko, “Wo tara Yɔni wara wulɛ rɔ tumɛ min, wo miriya ye nfen yen-koe ma nun? Fɔnyɔ ye kalɛ min namagala nun, ba? Wo dɔrɔn?

⁸ Nba, wo tara nfen yen-koe la worɔ? Kei min fɛrɛya bɔnɛ kura-nyimɛ la, wa? Ade! Mɔgɛ fɛrɛya bɔnɛ sufa, wonu bi mansɛnuna bolɔn burɔ!

⁹ Wo ni a fɔ n ye, wo miriya ye nfen yen-koe ma nun? Nɛbi, wa? Ɔnde kɔnɔ n bi a fɔla wo ye, wo ya min yen, wo tenbira nɛbi la de,

¹⁰ ado a sɛbɛnɛ Allata kitabu rɔ Yɔni lela ko la nun ko ala kilayɛ le Yɔni kɛ la. Alla ko, ‘N bi nna kilayɛ latala i yarɔ ka kilɛ laka i ye.’

¹¹ Wo ni wo hɛnkili to kɛ ko! Yɔni-Batasi-Kɛlɛ makawara ka tenbi mɔgɛ bɛɛ la nun. Kɔnɔ Alla min bi Arinyɛni tɔ, ale min dɔgɔ ata mansayɛ rɔ, wo makawara Yɔni ko.

¹² Ka a dabira Yɔnila kawandili-bɔ-wati ma, ha ka a sigi bi tele nyɛrɛ la, karagbɛlɛnu bi anu tayala Allala mansayɛ kɛlɛla ka ala fanka bi anu nyɛrɛ ye fɔrɔsɛ la.

¹³ Alla ya tɔn min di Nɛbi Musa ma anubɛ nɛbi doinuta kumɛ, wo bɛɛ ye Allala mansaya-koe fɔla ha ka ke Yɔnita wati kɛ ma.

¹⁴ Nba, ni wo si la anuna kumɛ la, Yɔni le ale Nɛbi Ilaya wo la, a fɔra min ma ko a ye nala.

¹⁵ Nba, ni min si ko nya-yen, a ni a tole masɔ!

¹⁶ “Nba, n si bi-tele-kɛ-mɔgɛnu sanka nfen ma? Anu mani de iko dennɛ minnu bi tolonna barɛ rɔ. Dennɛnu bi anu kan nabɔla anu ta-nyɔgɛnu ma.

¹⁷ Anu bi a fɔla ko, ‘Ma ara kɔnyɔ-masɔ-sigi sa wo ye kɔnɔ wo ma wo dɔn! Ma ara saya-sigi sa wo ye kɔnɔ wo ma di!’

¹⁸ Nba, Yɔnila nɛ, a ma na fen-dɔn anubɛ minni-koe la dɔrɔn. Bɛɛ ko nyinatoe le ale la!

¹⁹ Nde, Hadama-danla nɛ, n ya fen dɔn ka n min. Bɛɛ ko, ‘Kei kɛ mafɛlɛn! Nugulamɛ anubɛ gbɛɛ-minnɛ le. Duti-makelelɛnu anubɛ hakɛ-tiginu diyana-mɔgɛ le.’ Hali wo, Allata hɛnkilimayɛ ara yen ata kɛwɔli-latelennɛnu fɛ ko tonyɛ le.”

So-Dɛnkɛninyabɛlɛnu

²⁰ Wo kɔma, Yisa ya kabana-ko-siyaman kɛ soe minnu tɔ nun, a ya a dabira ka soe wonu sigilɛnu makuma bawo anu ma tubi ka anu kɛ-nya yɛlɛma.

²¹ A ko, “Ile Koresin so-burɔ-mɔgɛnu, gbalo ye wo kuma! Ile Bɛti-Sayida so-burɔ-mɔgɛnu, gbalo ye wole fanan kuma bawo kabana-koe minnu bara kɛ wo rɔ, ni wo nyɔgɔn kɛra Taya anubɛ Saidon soenu tɔ nun, nyɔ-mɔgɛnu bara tubi nun, bi ma! Anu si kasa-kurɛ don anu kan na nun ka ta-gbangban kɛ anu kunyɛ rɔ ka a yira ko anu bara anu kɛ-nyanu yɛlɛma!

²² Nba, n ni a fɔ wo ye. Kiti-tɛgɛ-lunyɛ, Alla si kinikini Taya anubɛ Saidon so-burɔ-mɔgɛnu ma ka tenbi wole la.

²³ Nba, ile Kapereniyam so-burɔ-mɔgɛnu! Wo ye a fɛ ka wo nyɛrɛ layɛlɛ ha ka ke Arinyɛni tɔ, nyɛ? Ade, Alla si wo lafili ka wo ladon nyahanama rɔ bawo kabana-koe minnu bara kɛ wole tɛma, ni wonu kɛra Sɔdɔm so burɔ nun, a ye nyɔ nun ha bi!

²⁴ Nba, n ni a fɔ wo ye. Kiti-tɛgɛ-tumɛ wa ke, Alla si kinikini Sɔdɔm so-burɔ-mɔgɛnu ma ka tenbi ile la.”

Sulen-Koe Karan

²⁵ Wo wati ya a taran, Yisa ya a fɔ ko, “E, n Fa, san-kole anubɛ dugu-kole Mari! N bi baraka birala i ye bawo i wara koe min dogon hɛnkilimɛnu anubɛ mɔgɔ-karannɛnu ma, i wara wo yira karanbɛlɛnu na.

²⁶ Ɔnde, n Fa, ado wo bɛɛ ara i wasa ka a ma wo nya.

²⁷ “N Fa ara fan bɛɛ di n ma. Mɔgɔ-wo-mɔgɔ ma nde, Allala dan lɔn fɔ a Fa Alla. Mɔgɔ-wo-mɔgɔ ma n Fa Alla lɔn fɔ nde, ala dan anubɛ n bi a fɛ ka a yira minnu na.

²⁸ “Min bɛɛ ara bandan ala dunu-gbilimɛ kɔrɔ, wo ni na nde wara. N si sulen di wo tigi ma.

²⁹ Wo ni nta dunɛ bi ka wo sa wo kuma. Wo ni karan nde fɛ bawo n dinyanɛ, n famayiginɛ. Nba, wo si wo sulen worɔ.

³⁰ N si dunɛ min di wo ma, a ma gbili, ado n si dunɛ min sa wo kuma, wo fɛ kati!”