Matiyu 10 - ALLALA KUMƐ

Kilaya Tan-ni-Filɛ Wara Koe

¹ Yisa ya ala karan-den mɔgɔ tan-ni-filɛ kele anu nyɔgɔn fɛ ka anu masara. A ya nyina-gben-sɛnbɛ di anu ma. A ya kiraya-sufa bɛɛ lakɛndɛya-sɛnbɛ fanan di anu ma.

² Kilaya tan-ni-filɛ wonu tɔgɛ le kɛnu na. Saimon (min tɔgɔ fanan Pita) anubɛ wo na-kelen-nyɔgɛ Anduru anubɛ Sɛbɛdila den Yemesi, wonubɛ wo na-kelen-nyɔgɛ Yɔni.

³ Filipi anubɛ Batalamiyu, Tamasi anubɛ Matiyu (duti-makelelɛ, kɔni), Alifala den Yemesi anubɛ Tadiyasi,

⁴ Saimon (min si kɛlɛ kɛ ala nyamanɛla ko la) anubɛ Yudasi-Isakariyati min ya Yisa don a yogenu bolo tɔ.

Mɔgɔ Tan-ni-Filɛ Wonu Masara-Koe

⁵ Yisa ya mɔgɔ tan-ni-filɛ wonu masara ka anu nata ko, “Wo kana ta sibolo-gbɛrɛnuna nyamani-wo-nyamani rɔ, hali Samariya kɛnuna soenu tɔ.

⁶ Kɔnɔ wo ye min mala, wo ta Isirɛla mɔgɛnu bara min filifilinɛ iko sagɛnu.

⁷ Wo ta anu makawandi ko, ‘Alla min bi Arinyɛni tɔ, wota mansayɛ ara gbɛrɛn!’

⁸ Wo ni kirayatoenu nakɛndɛya ka furinu nawuli. Wo ni kunatoenu nakɛndɛya ka nyinɛnu fanan gben. N bara sɛnbɛ wo di wo ma. Wo ma a sɔnkɔ bɔ, wo don ka a sɔnkɔ makele.

⁹ Wo kana ta wodi-wo-wodi la wo bolo.

¹⁰ Bɔrɔ wo, duruku fila nyɔgɔ wo, sanbara wo, hali sewuri, wo kana ta wo fenfen na wo bolo tagama wo rɔ. Wo makoe taranta fan minnu na, wo ye tala minnu bara, wonu si wo di wo ma.

¹¹ “Wo wa don so-wo-so burɔ, ni min si sɔn wo yiya-koe ma, wo ni ta wo warɛ. Wo ni to ale fɛ ha wo bɔ-tumɛ nyɔ.

¹² Wo wa don bɔn la tumɛ min, wo ni a fɔ ko, ‘Alamɛ yisi-kimɛ dira wo ma.’

¹³ Ni bonna-mɔgɛ wonu ya wo rabira a kin na, wola yisi-kima-duwa-kɔndɔli si to anu fɛ. Kɔnɔ ni anu ma wo rabira, wo ni Alla madiya ko wola duwɛ ni bɔ anu fɛ.

¹⁴ Ni mɔgɛ do ye bɔn wo la, ni wo ma, soe wo burɔ min ma sɔn wo rabirala ka anu tole masɔ wola kumɛ la, wo ni bɔ nyɔ rɔ. Wo ni wo kin-gbangban ragbɔngbɔn anu kan ma nyɔ rɔ.

¹⁵ Wo ni wo hɛnkili to kɛ ko! Kiti-tɛgɛ-tele rɔ, Alla si kinikini Sɔdɔm anubɛ Kɔmɔra soe mɔgɛnu ma ka tenbi soe wo la!

Gbɛlɛyɛ Natoe Wara-Koe

¹⁶ “Wo ni wo tole masɔ! N bi wo latala sulukinu tɛma iko sagɛnu. Wo ni halliya iko duguma-fannu. Wo ni ma kɛlɛ-tɛgɛbɛlɛ la iko kangbɔɛnu.

¹⁷ Wo ni a ma wo fɛrɛma bawo mɔgɛ donu bi nyɔ minnu si wo bira ka ta wo la kiti tɛgɛ tinɛ. Anu si wo gbesi Yahudiya-dina-bɔnnu na.

¹⁸ Ka a tɛgɛ nde ma, anu si wo rasagan kun-tiginu anubɛ mansɛnu yakɔrɔ. Wo si nta kibara-nyimɛ fɔ wonu ye anubɛ sibolo-gbɛrɛnu fanan.

¹⁹ Anu ba ta wo la nyɔ, wo si min fɔ anubɛ wo si a fɔ nya min, wo kana hami wola ko la. A wati wa ke, wo ye nala min fɔla, wo si wo sɔrɔn

²⁰ bawo wo ye min fɔla, wota kuma ma wonu na. Kumɛ wonu bi bɔla wo Fa Allala Ni-Sɛnimɛ le bolo min bi kumala wo rɔ.

²¹ “Mɔgɛnu si anu na-kelen-nyɔgɛnu kunyɛ madon anu yogenu bolo alako anu ni anu faga. Fanu si wo nyɔgɔn ma anuna dannu na. Dannu si wuli anu sɔrɔnnɛnu kan ma hali ka anu nadon sayɛ rɔ.

²² Wo si gboya mɔgɛ bɛɛ ye ndela ko la kɔnɔ ni min si a munyu ha a laban, wo tigi si kisi.

²³ Anu ba a lagbɛlɛya wo kuma so kelen tɔ tumɛ min, wo ni wo buri ka ta so-gbɛrɛ rɔ. Wo ni wo hɛnkili to kɛ ko! Yanni nde, Hadama-dan ni na, wo ti wola wɔli laban Isirɛla nyamanɛ soe bɛɛ burɔ.

²⁴ “Karan-den wo karan-den ma tenbi a karan-mɔgɔ la. Yɔɔn-wo-yɔɔn ma tenbi a tigi la.

²⁵ Nba, karan-dan wa ke a karan-mɔgɔ rɔ, a bɛnta, wo ni a wasa. Yɔɔn fanan ba ke a tigi rɔ, a bɛnta, wo ni a wasa. Ni anu ya denbaya-tigi kele ko, Biyɛsiba, denbayɛ toenu si tɔgɔ-yogomɛ sɔrɔn ka tenbi ale la!

Mɔgɛ ni Kilan min Na

²⁶ “Nba, wo kana kilan mɔgɛnu na. Fenfen yamatogonnɛ, wo yama si ka. Gbundu-koe bɛɛ la si bɔ gbɛ rɔ.

²⁷ N bi min fɔla wo ye pinpi rɔ, wo ni wo fɔ tun waan rɔ. Wo ara min namɔɛn n bolo dogɔn rɔ, wo ni wo fɔ gbɛ rɔ bɛɛ yala.

²⁸ Minnu si ke fɛrɛ-bɔnkɛ fagala kɔnɔ a ti ke niyi fagala, wo kana kilan wonu na. Wo ni kilan Alla la bawo wo si ke niyi anubɛ fɛrɛ-bɔnkɛ le kɛla nyahanama rɔ nya-kun-kelen.

²⁹ I si ke kona-mɛsɛ fila sanna kaba kelen na. Hali wo, kona-kelen-bɛrɛn ti bui dugi ma, wo Fa Alla sa min kalama.

³⁰ Nba, wole don, hali wo kun-sigi, Alla ya wo bɛɛ yatɛ lɔn.

³¹ Woletɔ wo kana kilan bawo wo tenbira kona siyamɛnu na.

Mɔgɔ Sɔn-Koe anubɛ A Ban-Koe Yisa la Mɔgɛnu Yala

³² “Mɔgɔ-wo-mɔgɔ wa a sɔn a la gbɛ rɔ ko ntɛ le ale la, n si wo nyɔgɔn ma n Fa Alla yakɔrɔ min bi Arinyɛni tɔ.

³³ Kɔnɔ mɔgɔ-wo-mɔgɔ wa a ban n na gbɛ rɔ, nde fanan si n ban a la worɔ n Fa Alla yakɔrɔ min bi Arinyɛni tɔ.

Yisi-Kimɛ Ma, Fɔ Kɛlɛ

³⁴ “Wo mirinɛ ko n bara na yisi-kimɛ la duninya kɛ rɔ, wa? Ade, n ma na yisi-kimɛ la fɔ kɛlɛ.

³⁵ N bara na ka kɛlɛ lawuli den-keinubɛ anu fanu tɛma, dunmusinubɛ anu nanu tɛma, mama-musu-nɛnubɛ anu mamanu tɛma.

³⁶ I yogo-bɛrɛbɛrɛ si taran ila denbayɛ tɛma.

³⁷ “Mɔgɔ-wo-mɔgɔ wa a na, ni wo ma, a fa keni ka tenbi nde la, a ma bɛn, wo tigi ni bila n fɛ. Mɔgɔ-wo-mɔgɔ wa ala dan keni ka tenbi nde la, a ma bɛn, wo tigi ni bila n fɛ.

³⁸ Min ti a nyɛrɛ faga-kɔn bi ka bila n kin-gbɛ fɛ, a ma bɛn, wo tigi ni bila n fɛ.

³⁹ Min ba a raya ka a nyɛrɛ niyi lakisi, wo si bɔnɔ a rɔ. Min ba bɔnɔ a niyi rɔ ndela ko la, wo si a sɔrɔn.

Barayi Wara-Koe

⁴⁰ “Mɔgɔ-wo-mɔgɔ min ba wole, nta karan-dannu tabira, wo ara nde rabira. Nba, ni min ya nde rabira, a ara ale fanan tabira min ya n sɔ.

⁴¹ Min ba Allala kilayɛ rabira bawo Allala kilayɛ le, ale fanan si barayi sɔrɔn iko kilayɛ wo. Min ba mɔgɔ-nyimɛ rabira bawo mɔgɔ-nyimɛ le, ale fanan si barayi sɔrɔn iko mɔgɔ-nyimɛ wo.

⁴² Wo ni wo hɛnkili to kɛ ko! Min ba yi-kimɛ di nna mɔgɔ-dɔgɔmani kelen ma bawo nna mɔgɛ le, ale fanan si barayi sɔrɔn, yɔ!”