Maraka 9 - ALLALA KUMƐ

¹ A ya a fɔ anu ye tun ko, “Wo ni wo hɛnkili to kɛ ko! Donu bi wo tɛma yan, wonu ti faga fɔ anu ba Allala mansayɛ yen nala sɛnbɛ la.”

Yisala Gbiliyɛ Mayira-Koe

² Tele wɔrɔ kɔma, Yisa ya Pita anubɛ Yemesi anubɛ Yɔni bi ka ta anu na a bolo kɔnkɔ-layan-bɛ do kuma anu dan na. Anu yɛ bɛnnɛ Yisa ma tumɛ min, a yen-nya yɛlɛmanta anu yala.

³ Ala kurɛnu gbɛra iko bɛgi-gbɛ. Kura-kula fenfen sa duninya rɔ min si kurɛ gbɛ wo nya.

⁴ Wo kɔma, ala karan-den sawɛ wonu ya Nɛbi Ilaya anubɛ Nɛbi Musa yen kumala Yisa la.

⁵ Pita ya a fɔ Yisa ye ko, “N tigi, a bɛnta ma ye yan. Ma ni lele sawa sɔ, kelen itɛ, kelen Musatɛ, kelan Ilayatɛ.”

⁶ Ale anubɛ a ta-nyɔgɛnu kilannɛ kati! Pita ye min fɔla, a ma wo lɔn.

⁷ Banda-finyɛ burunta anu kun na. Kuman-kan bɔra banda-finyɛ wo rɔ. A ko, “N diyana-dan le kɛ la. Wo ni wo tole masɔ a la!”

⁸ Tiriyante wo rɔ, anu ya anu yɛ lakalan anuna foolɛ rɔ kɔnɔ anu ma mɔgɔ-gbɛrɛ yen fɔ Yisa min sɔnɛ anu fɛ.

⁹ Anu bi yigila kɔnkɛ la tumɛ min, Yisa ya a fɔ anu ye ko, “Wo ara ko-rayirɛ min yen kɛ, wo kana wo fɔ mɔgɔ-wo-mɔgɔ ye, ha nde, Hadama-dan ni wuli ka bɔ furinu tɛma tumɛ min.”

¹⁰ Anu ya ala kumɛ bira kɔnɔ anu ya wo fɔɛ dabira anu gbansan tɛma. Kɔnɔ anu ko, “ ‘Ka wuli ka bɔ furinu tɛma,’ wo kɔrɛ ye kama?”

¹¹ Anu ya Yisa manyinika ko, “Nfenna tɔn-karan-mɔgɛnu bi a fɔla ko Nɛbi Ilaya le fɔlɔn bi nala?”

¹² A ya anu yabi ko, “Nɛbi Ilaya le fɔlɔn si na serr! A wa na, a si koe bɛɛ sɛgi a gbɛ rɔ. Kɔnɔ nfenna a sɛbɛnɛ Allata kitabu rɔ ndela ko la ko nde, Hadama-dan si tɔrɔ ko mɔgɛnu si anu ban n na?

¹³ Kɔnɔ n bi a fɔla wo ye ko Nɛbi Ilaya ara na nun, ado mɔgɛnu ya anu diyana-koe bɛɛ kɛ a la iko a sɛbɛnɛ Allata kitabu rɔ nya min ala ko la.”

Nyinatoe Lakɛndɛya-Koe Yisa Bolo

¹⁴ Anu mɔgɔ nani kera Yisala karan-dan doinu ma tumɛ min, anu ya nyama-belebele yen nyɔ. Tɔn-karan-mɔgɛ donubɛ ala karan-dan donu bi anu nyɔgɔn sɔsɔla.

¹⁵ Nyama ya Yisa yen nya min wo, anu kawara kati! Anu burimatoe tara a labɛn tinɛ ka a kɔndɔn.

¹⁶ Yisa ya ala karan-dannu manyinika ko, “Wobɛ wonu bi wo nyɔgɔn sɔsɔla nfenna ko la?”

¹⁷ Mɔgɔ kelen bi nyama tɛma, wo ya a yabi ko, “Karan-mɔgɔ, n bara na nna dan la i wara bawo nyina-yogomɛ ye a fɛ. A ti ke kumala.

¹⁸ Nyinɛ wa wuli a la tuma-wo-tuma, a si a labui dugi ma. A da-kanfɛ si bɔ. A si a nyin makinkin. A fɛrɛ bɛɛ si sɔngbɔn. N ya ila karan-dannu madiya ko anu ni nyinɛ wo gben kɔnɔ anu ma ke a gbenna.”

¹⁹ Yisa ya a fɔ anu ye ko, “Wole fanan. Dɛnkɛninya sa wo bolo! N ni to wo fɛ ha tumɛ nyamintan tɔ tun? N si n munyu wo kɔrɔ ha tumɛ nyamintan? Wo ni a lana n ma!”

²⁰ Anu nara a la Yisa wara. Nyinɛ ya Yisa yen nya min wo, a ya dan wo lasɔngbɔn. A buira ka a makuru-kurun dugi ma. A da-kanfɛ ye bɔla.

²¹ Yisa ya dan wo fa manyinika ko, “Nyinɛ kɛ ara wati yili bɔ a fɛ?” A ya a yabi ko, “Kebi a dennɛ.

²² Nyinɛ wo ara a raya a faga-koe ma wati siyaman. A ye a labuila tɛ anubɛ yi rɔ. Ni i si ke a mala, kinikini ma ma ka ma dɛnbɛ!”

²³ Yisa ko, “Nfenna i ko ni n si ke? Dɛnkɛninyɛ ye min bolo, wo si ke koe bɛɛ kɛla.”

²⁴ Tiriyante wo rɔ, dan wo fa ya a kan labɔ, a ko, “Dɛnkɛninyɛ ye n bolo kɔnɔ a ma kolo. N dɛnbɛ!”

²⁵ Yisa ya a yen ko nyama ye a gbɛrɛnna anu ma min kɛ, a ya nyina-yogomɛ wo makuma. A ko, “Ile, nyina bobo-tolo-gberan, n bi a fɔla i ye, bɔ dan kɛ fɛ. I kana bila a fɛ tun!”

²⁶ Nyinɛ ye bɔla a fɛ tumɛ min, a gbele-gbelenta ka dan wo lasɔngbɔn bɛrɛkɛ! Dan wo mara iko mɔgɔ-faganɛ, wo le ya a to, mɔgɛ bɛɛ ko, “E, a ara faga!”

²⁷ Kɔnɔ Yisa ya dan wo bole bira ka a dɛnbɛ a lasɔla. A ya a lasɔ.

²⁸ Yisa donta bɔn la tumɛ min, ala karan-dannu ya a manyinika dogɔn rɔ ko, “Nfenna male ma ke nyinɛ wo gbenna?”

²⁹ Yisa ya anu yabi ko, “Fen-gbɛrɛ ti ke wo sifa gbenna fɔ madiyalɛ.”

Yisa Faga-Koe Fɔ-Koe Tun

³⁰ Anu bɔra nyɔ ka Kalili sigisɔn ratagama. A ma di Yisa ye ko mɔgɔ-wo-mɔgɔ ni a lɔn a ye kan min nun

³¹ bawo a ye ala karan-dannu karan tinɛ. A ko, “Anu si nde, Hadama-dan don mɔgɛnu bolo tɔ. Anu si n faga. Kɔnɔ a tele sawa nyɔgɛ, Alla si n nawuli tun ka bɔ furinu tɛma.”

³² Kɔnɔ anu ma kumɛ wo kɔrɛ lɔn, ado anu kilanta a manyinikala.

Yon Kolo Bɛɛ Ko?

³³ Karan-dannu kera Kapereniyam soe burɔ. Anu donta bɔn la tumɛ min, Yisa ya anu manyinika ko, “Wo ye wo nyɔgɔn sɔsɔla nfen ma nun kilɛ la?”

³⁴ Kɔnɔ anu ma ke a yabila bawo anu ya sɔsɔli sa anu nyɔgɔn tɛma kilɛ la ni mɔgɔ-ba ye min na anu tɛma.

³⁵ Yisa sigira ka anu karan-den tan-ni-filɛ ladɛn. A ya a fɔ anu ye ko, “Ni mɔgɔ-wo-mɔgɔ ye a fɛ ka ma mɔgɔ fɔlɔtɛ la, fɔ a ni ma a laban la ka ma bɛɛta wɔli-kɛlɛ la.”

³⁶ A ya dennɛ do bi ka a sɔ anu tɛma. A ya a sigi a kɔnkɔn tɔ ka a fɔ anu ye ko,

³⁷ “Ni min ya dennɛ sifa kɛ rabira n tɔgɛ rɔ, wo ara nde rabira, ado ni min ya nde rabira, wo ara n sɔlɛ fanan tabira.”

Min Sa Ma Kan ma, Wo ye Mala Ko La

³⁸ Lunyɛ do, Yɔni ya a fɔ Yisa ye ko, “Karan-mɔgɔ, ma ya kei do yen nyinɛnu gbenna i tɔgɛ rɔ. Ma ya a fɔ a ye ko a ni fara wo la bawo mala mɔgɔ ma ale la.”

³⁹ Yisa ya a fɔ Yɔni ye ko, “Wo kana a lakala bawo ni min bi kabana-koe kɛla n tɔgɛ rɔ, wo ti ke kuma-yogomɛ fɔla n ma wati kelan wo rɔ,

⁴⁰ ado ni min sa ma kan ma, wo ye mala ko la.

⁴¹ Wo ni wo hɛnkili to kɛ ko! Min ba min-kɛ-yi di wo ma bawo nde, Allata-Mɔgɔ-Yabɔnɛtɛ le wo le la, wo si ata barayi sɔrɔn serr!

Magbɛrɛnkɛ Hakɛla Ko La

⁴² “Dennɛ kɛ minnu dɛnkɛninyanɛ n ma, ni min ya a ma, wo ni don hakɛ rɔ ha a ni bɔ n fɛ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi rɔ.

⁴³ Woletɔ ni i bole ya a ma, i ni hakɛ kɛ, a tɛgɛ a la! A fisa, ni i bɔnɔta i bolo kelan rɔ ka ta nimayɛ rɔ wo nya, yanni i fɛrɛ bɛɛ la ni don nyahanama-tɛ-dufenbɛlɛ rɔ, [

⁴⁴ ‘anuna tunbinu ti faga kan min mumɛ, ado tɛ ti dufen nyɔ habadan!’]

⁴⁵ “Nba, ni i kian ya a ma, i ni hakɛ kɛ, a tɛgɛ a la! A fisa, ni i bɔnɔta i kin kelan rɔ ka ta nimayɛ rɔ wo nya, yanni i fɛrɛ bɛɛ la ni don nyahanama-tɛ-dufenbɛlɛ rɔ, [

⁴⁶ ‘anuna tunbinu ti faga kan min mumɛ, ado tɛ ti dufen nyɔ habadan!’]

⁴⁷ “Nba, ni i yɛ ya a ma, i ni hakɛ kɛ, a bɔ a rɔ! A fisa, ni i bɔnɔta i ya-kelan rɔ ka ta Allata mansayɛ rɔ wo nya, yanni i fɛrɛ bɛɛ la ni don nyahanama-tɛ-dufenbɛlɛ rɔ,

⁴⁸ ‘anuna tunbinu ti faga kan min mumɛ, ado tɛ ti dufen nyɔ habadan!’

⁴⁹ “Tɛ le si mɔgɛ bɛɛ sɛninya iko kɔgɛ wa kɛ soge ma, a ti tuli yona nya min.

⁵⁰ “Kɔgɛ kin kɔnɔ ni a diyɛ bɔra a la, mɔgɛ si ke a mala kɔgɛ la kama tun? Kɔgɛ ni taran wola diyanayɛ rɔ, ado yisi-kimɛ ni taran wo nyɔgɔn fɛ.”