Maraka 7 - ALLALA KUMƐ

Benba Namu Nyinikalɛnu

¹ Nba, Farisinu anubɛ tɔn-karan-mɔgɛ minnu bɔra Yerusalɛm, wo donu kinkinta Yisa la.

² Anu ya a yen ko ala karan-dan donu bi fen dɔnna anu bolo-lakubɛlɛ la. Anu ma anu naku a kilɛ fɛ iko anuna namu ye nya min. (

³ Farisinu anubɛ Yahudiyanu ya namu min sɔrɔn anu benbanu bolo, wo le ko anu ti fen dɔn fɔ anu ba anu bole laku a kilɛ fɛ.

⁴ Wo kɔma fanan, anu ko anu ba fenfen san feri-kɛ-tinɛ, anu ti wo dɔn fɔ anu ba anu nyɛrɛ sɛninya fɔlɔn. Namu siyaman gbɛrɛ ye anu bolo, anu ya minnu sɔrɔn anu benbanu bolo iko yi-lafɛ maku-nya anubɛ dagɛnu anubɛ bara-mawulannu.)

⁵ Woletɔ Farisinu anubɛ tɔn-karan-mɔgɛ wonu ya Yisa manyinika ko, “Nfenna ila karan-dannu sa ma benbanuna namu birala fɔ ka fen-dɔn-kɛ anu bolo-lakubɛlɛ la?”

⁶ Yisa ya anu yabi ko, “Aiseya ya wɔlɔyiyɛ min kɛ wolela ko la, wo telenta! Nyɛrɛ-mayiralɛ le wole la iko a ya a sɛbɛ nya min. A ya a sɛbɛ ko Alla ko, ‘Mɔgɛ kɛnu bi a fɔla anu da rɔ ko n di anu ye kɔnɔ n bara-koe sa anu yisi-kunyɛ la!

⁷ Anu bi n batola fu bawo anu bi mɔgɛnu nabilala anuta tɔnnu na iko nta tɔn le!’ ”

⁸ Nba, Yisa ko, “Wo ara Allala tɔn boloka ka mɔgɛnuna namu bira.”

⁹ A ko fanan, “Ado nfan, halliya-kilɛ ye wo bolo ka wo ban Allala tɔn la alako wo ni wo nyɛrɛla namu bira nya min!

¹⁰ Bawo Nɛbi Musa ya a fɔ ko, ‘Wo ni wo fanu anubɛ wo nanu gbiliya.’ A ko fanan, ‘Ni mɔgɔ-wo-mɔgɔ ya kuma-yogomɛ fɔ a na anubɛ a fa ma, fɔ wo tigi ni faga serr!’

¹¹ Kɔnɔ wole ye mɔgɛnu karanna ko ni kɔ-fan do ye mɔgɛ bolo a si a na anubɛ a fa dɛnbɛ min na kɔnɔ ni a si a fɔ anu ye ko, ‘Allatɛ le kɛ la,’

¹² hali a ma a na anubɛ a fa dɛnbɛ kɔ-fan wo la tun.

¹³ Wo ara Allala kumɛ ma fuyi la wola namunu fɛ worɔ, ado wo ye donu karanna wonu na. Nba, wo ye kɛ siyaman-su kɛla.”

Fan Minnu si Mɔgɔ Latinya

¹⁴ Wo kɔma, Yisa ya nyama kele a wara tun ka a fɔ anu ye ko, “Wo ni wo tole masɔ ka koe kɛ nya-yen a kilɛ fɛ!

¹⁵ Mɔgɛ ye fan min bɛɛ dɔnna, wo fenfen ti a latinya kɔnɔ min bi bɔla mɔgɔ yisi rɔ, wo le si a latinya. [

¹⁶ Ni min si ko nya-yen, a ni a tole masɔ!”]

¹⁷ Yisa bɔɛ nyama fɛ ka don bɔn la tumɛ min, ala karan-dannu ya a manyinika tili wo kɔrɛ ma.

¹⁸ Yisa ya a fɔ anu ye ko, “Ha ka, wo ma hɛnkili sɔrɔn kɛ ma? Fenfen ti yigi mɔgɔ burɔ min si a latinya

¹⁹ bawo dɔn-fan ti don a yisi rɔ fɔ ka yigi a buyi burɔ. Wo kɔma, a si bɔ a bagbuyi rɔ.” (Yisa ya kɛ fɔ alako a la ni gbɛ ko a bɛnnɛ mɔgɛ ni dɔn-fen-su bɛɛ dɔn.)

²⁰ A ko, “Min si bɔ mɔgɔ yisi rɔ, wo le si a latinya.

^21-22 Miriya-yogomɛ minnu si mɔgɔ don kisimiriya-koe rɔ, wo le kankanyɛ wo, mɔgɔ-fagɛ wo, yɛlɛnyɛ wo, nata-yogomɛ wo, ko-yogoma-su bɛɛ wo, yanfɛ wo, ko-kɔsɔnɛ wo, keliyɛ wo, mɔgɔ-rafɔɛ wo, wasinteyɛ wo, anubɛ kalokalonteyɛ. Wonu denu si bɔ mɔgɔ yisi rɔ.

²³ Ko-yogomɛ wo bɛɛ ye bɔla mɔgɔ yisi le tɔ, ado wonu denu si a latinya.”

Sibolo-Gbɛrɛ-Musi Dola Dɛnkɛninyɛ

²⁴ Wo kɔma, Yisa bɔra nyɔ ka ta Taya anubɛ Saidon dafɛ-soenu tɔ. A yiyara mɔgɛ dola bɔn la nyɔ. A ma di a ye mɔgɔ-wo-mɔgɔ ni a lɔn ko a ye nyɔ kɔnɔ hali wo, a ma ke a dogonna.

²⁵ Nyinɛ ye musi minna dunmusi fɛ, wo ya Yisa wara-koe lamɔɛn. Musi wo nara a wara tiriya ka a sa a kian kɔrɔ.

²⁶ Musi wo, sibolo-gbɛrɛ le min sɔrɔnta Finisiya sigisɔn rɔ Siriya nyamanɛ rɔ. A ya Yisa madiya ko a ni nyinɛ wo gben ala dunmusi fɛ.

²⁷ Kɔnɔ Yisa ya a fɔ a ye ko, “Ma ni Yahudiya-dennɛnu de-nyini fɔlɔn. A ma bɛn ka anuna dɔn-fan bi ka a lakɛ wulinu kɔrɔ.”

²⁸ Musi wo ya a yabi ko, “N fa, hali wuli minnu bi tebulu kɔrɔ, wonu si dennɛnuna dɔn-fen-buriburi dɔn de!”

²⁹ Yisa ya a fɔ a ye ko, “Ka a tɛgɛ ila yabilɛ kɛ ma, ta i warɛ. Nyinɛ ara bɔ ila dunmusi fɛ!”

³⁰ Woletɔ a sɛgira a warɛ. A ya ala dunmusu-nɛ sani taran sa-fan rɔ nyɔ. Nyinɛ ara bɔ a fɛ feu!

Kei-Tolo-Gbere Lakɛndɛya-Koe

³¹ Wo kɔma, Yisa bɔra Taya soela foolɛ rɔ. A tenbira Saidon anubɛ kilɛ wo fɛ min bi so-kun-tan waralɛ rɔ ha Kalili dalɛ dafɛ.

³² Mɔgɛ donu nara kei-tolo-gberan la, kuma-koe gbɛlɛ min kuma kati! Anu ya Yisa madiya ko a ni a bole sa a kuma.

³³ Woletɔ Yisa ya a bi ka a bɔ nyama tɛma ka ta a la a dan na. A ya a bolo-nɔlɔnɛnu nadon a tolenu tɔ. Wo kɔma, a ya a da-yi kɛ a bolo-nɔlɔnɛ ma ka wo nɔrɔ kei wo nagan ma.

³⁴ Yisa ya a yɛ layɛlɛ san ma. A ya a niyi lafɛ kinikinɛ ma fɛɛɛ! A ya a fɔ kei wo ye ko, “Tole, i la ni ka!”

³⁵ Tiriyante wo rɔ, kei wo tole lakara. A nagan fulenta. A ya kumɛ dabira, a kuman-kan latɛgɛnɛ feu!

³⁶ Wo kɔma, Yisa ya a fɔ anu dama ye ko anu kana wo fɔ mɔgɔ-wo-mɔgɔ ye. Kɔnɔ iko a ya a fɔ anu ye nya min ko anu kana a fɔ mɔgɔ-wo-mɔgɔ ye, anu denu tora a fɔla ka tenbi wo la.

³⁷ Min bɛɛ ya wo lamɔɛn, wonu kawara kati! Anu ko, “A ye koe bɛɛ kɛla a kin na! Hali tolo-gberannu, a ye wonu tole lakala ka bobenu nagan lafulen!”